Yu Tokaut Strong Taim Yu Autim Tok?
1 Maski ol birua i kalabusim ol na tok strong long ol i no ken autim tok, Pita na Jon i strong yet long autim tok bilong Kingdom na ol i no pret. (Ap 4:17, 21, 31) Long nau taim yumi tok olsem yumi mas tokaut strong long taim bilong autim tok, dispela i makim wanem samting?
2 Autim Tok Strong: Narapela tok wankain olsem dispela tok “tokaut strong” em “i no pret,” na insait bilong en i olsem “i no pret liklik, stap strong, na karim hevi.” Taim ol Kristen tru i tokaut strong long taim ol i autim tok, dispela i makim olsem ol i no pret liklik long toktok long ol narapela sapos i gat rot long autim tok long ol. (Ap 4:20; 1 Pi 3:15) Dispela i makim olsem yumi no sem long autim gutnius. (Sng 119:46; Ro 1:16; 2 Ti 1:8) Olsem na pasin bilong tokaut strong em wanpela pasin yumi mas i gat bilong mekim wok yumi kisim, em wok bilong autim gutnius bilong Kingdom nau long dispela taim bilong pinis. Dispela pasin i save kirapim yumi long autim tok long ol man long wanem wanem hap yumi bungim ol.—Ap 4:29; 1 Ko 9:23.
3 No Ken Pret Long Autim Tok Long Skul: Olsem wanem? Pasin bilong pret o sem i mekim na yu hatwok long autim tok long ol wanskul? Tru, sampela taim em i hatwok liklik; na sampela taim em i hatwok tru. Tasol Jehova bai strongim yu sapos yu beten askim em long helpim yu long tokaut strong taim yu autim tok long ol narapela. (Sng 138:3) Pasin bilong tokaut strong na i no pret bai helpim yu long kamapim olsem yu wanpela Witnes Bilong Jehova na long sanap strong long ol traim. Sapos yu autim tok long skul, dispela inap helpim ol lain i harim tok bilong yu long kisim laip.—1 Ti 4:16.
4 No Ken Pret Long Autim Tok Long Ples Wok: Olsem wanem? Ol man long ples wok i save olsem yu wanpela Witnes Bilong Jehova? Ating wanpela rot tasol bilong ol wanwok bilong yu i ken harim gutnius em long taim yu autim tok long ol. Na tu, pasin bilong no ken pret em inap helpim yu long kisim malolo long wok bambai yu ken i go long ol miting Kristen na ol kibung.
5 No Ken Pret Long Taim Bilong Traim: Taim ol man i birua long yumi em i bikpela samting long yumi mas strongim bel. (1 Te 2:1, 2) Dispela pasin i save helpim yumi long holimpas bilip bilong yumi taim ol man i tok ol bai bagarapim yumi, na tok bilas long yumi, o ol i mekim nogut long yumi. (Fl 1:27, 28) Taim planti hevi i painim yumi na dispela i laik pulim yumi long brukim ol lo bilong God bilong yumi, em Jehova, dispela pasin i save helpim yumi long sanap strong. Pasin bilong strongim bel bai helpim yumi long stap bel isi taim ol narapela i laik tok pait wantaim yumi.—Ro 12:18.
6 Maski wanem wanem hevi i painim yumi, yumi mas wok yet long tokaut strong na no ken pret taim yumi autim gutnius.—Ef 6:18-20.