Autim Strong Tok Bilong God na No Ken Pret
1 Yumi ol wokman Kristen i save olsem i no olgeta man bai amamas long harim tok yumi autim. (Mt. 10:14) Tasol yumi no larim dispela samting i pasim yumi long autim gutnius. (Snd. 29:25) Wanem samting i helpim yumi long wok yet long autim strong tok bilong God?
2 Aposel Pol i bilip olsem save em i bin kisim long Krais Jisas “em i samting tru.” Dispela i kirapim em long strong long autim tok. (Fl. 3:8; 1 Te. 1:5) Maski sampela i ting olsem dispela tok em i autim i kranki, Pol i save olsem dispela tok i gat “strong bilong kisim bek olgeta man i bilip.” (Ro. 1:16) Olsem na maski ol man i birua long em, em “i no pret long autim tok.”—Ap. 14:1-7; 20:18-21, 24.
3 Man Bilong Givim Strong Long Yumi: I no long strong bilong Pol yet em inap long autim strong tok. Pol i tok long em yet na Sailas olsem: “Mipela i bin i stap long taun Filipai, na mipela i bin kisim pen, na ol i bagarapim bodi bilong mipela. Tasol taim mipela i kam long yupela, God bilong yumi em i strongim bel bilong mipela, na mipela i no surik long ol dispela birua. Nogat. Mipela i sanap strong na mipela i autim gutnius bilong God long yupela.” (1 Te. 2:2; Ap. 16:12, 37) Long taim Pol i stap long kalabus long Rom, em i tokim ol Kristen long beten long God i ken helpim em na bai em inap “daunim pret na tokaut strong long ol manmeri.” (Ef. 6:18-20) Pol i bilip long strong bilong Jehova long helpim em na i no long strong bilong em yet, na long dispela rot em inap long autim strong tok bilong God na em i no pret.—2 Ko. 4:7; Fl. 4:13.
4 Dispela i wankain tu long nau. Wanpela brata i pilim hatwok long autim tok long ol wanwok bilong em na long tokim ol olsem em i wanpela Witnes Bilong Jehova. Em i beten long Jehova long dispela samting na em i kirap autim tok long ol wanwok bilong em. Pastaim wanpela wanwok bilong em i no laik harim tok, tasol taim brata i stori long em long kirap bek, dispela i kirapim em long putim yau na em i kirap stadi. Kirap long dispela taim na i kam, dispela brata i wok long autim tok taim rot i op long em i mekim olsem. Long taim em i kirap wok long narapela ples wok, em i helpim 34 wanwok bilong em long kisim baptais insait long 14 yia. Yumi ken bilip tru olsem Jehova bai strongim yumi tu long ‘autim tok bilong em, na yumi no ken pret.’—Ap. 4:29.