Tingim Gut Narapela na Mekim Gutpela Pasin
1 Wanpela meri em bipo em i no bin laikim ol Witnes, em i tingim namba wan taim em i bungim wanpela Witnes na em i tok: “Mi no inap tingim wanem samting mitupela i bin toktok long en, tasol samting mi inap tingim em pasin bilong dispela Witnes long toktok gut long mi na mekim gutpela pasin pren long mi. Dispela i mekim na mi laikim em.” Ol dispela tok i kamapim klia olsem em i bikpela samting long mekim gutpela pasin long ol man yumi bungim long taim yumi autim tok.—Fl. 2:4.
2 Laikim Ol Narapela na Mekim Gutpela Pasin: Wanpela rot yumi inap soim olsem yumi laikim ol narapela, em long mekim gutpela pasin long ol. (1 Ko. 13:4) Man i gat gutpela pasin i save tingim gut ol narapela na painim rot bilong helpim ol. Tru, wok bilong autim tok em wanpela rot bilong mekim gutpela pasin long ol man. Tasol dispela tasol i no inap, yumi mas mekim sampela samting moa bilong kamapim olsem yumi tingim tru ol. Pasin yumi mekim long ol man taim yumi autim tok long ol—pasin pren, gutpela pasin, pasin bilong yumi long putim yau, ol tok yumi mekim na pasin bilong toktok gut, na pes bilong yumi tu bai kamapim klia olsem yumi tingim ol.—Mt. 8:2, 3.
3 Na tu, pasin bilong tingim gut ol man bai kirapim yumi long helpim ol. Taim wanpela brata painia i autim tok long ol haus, em i bungim wanpela lapun meri wanpis. Taim dispela meri i kisim save olsem em i wanpela Witnes, em i no laik harim tok. Em i tokim brata olsem em i bin stap antap long lata bilong putim nupela lait long haus kuk taim brata i paitim dua bilong haus bilong em. Brata i tokim dispela lapun meri olsem: “Em i no gutpela long yu yet i senisim lait, nogut yu kisim bagarap.” Em i tokim brata long kam insait long haus. Brata i senisim pinis lait na em i go. I no longtaim bihain, pikinini man bilong em i kam bilong lukim em, na em i tokim pikinini long samting i bin kamap. Pikinini man i kirap nogut long pasin brata i mekim na em i kirap painim dispela brata bilong tok tenkyu long em. Dispela i opim rot bilong tupela long toktok gut wantaim, na dispela man i orait long kirap stadi.
4 Taim yumi mekim gutpela pasin long ol man, yumi kamapim pasin laikim bilong Jehova long ol na yumi givim biknem long tok bilong Kingdom. Olsem na long olgeta taim yumi mas ‘stap wokman bilong God . . . na mekim gut long ol manmeri.’—2 Ko. 6:4, 6.