KIRAPIM TOKTOK
LESEN 6
No Ken Pret Long Autim Tok
Stiatok: “Mipela i strongim bel na i no surik long tokim yupela long gutnius bilong God.”—1 Tes. 2:2.
Samting Jisas i Mekim
1. Lukim VIDIO, o ritim Luk 19:1-7. Na skelim ol dispela askim:
Ating i gat wanem as na sampela manmeri i no laik bung wantaim Sakius?
Wanem samting i kirapim Jisas long autim gutnius long em?
Yumi Kisim Wanem Skul Long Jisas?
2. Yumi no ken pret long autim tok bilong Kingdom long olgeta kain man.
Bihainim Pasin Bilong Jisas
3. Trastim Jehova. Spirit bilong God i bin strongim Jisas long autim tok, na em inap strongim yu tu. (Mat. 10:19, 20; Luk 4:18) Askim Jehova long strongim yu long autim tok long ol man em yu pret long autim tok long ol.—Apo. 4:29.
4. No ken skelim ol man. Ating yumi pret long autim tok long sampela manmeri bikos long lukluk bilong ol, sindaun bilong ol, ol bilip bilong lotu bilong ol, o bikos ol i maniman o man i gat nem. Tasol tingim:
Jehova na Jisas inap lukim bel bilong ol man; yumi no inap.
Jehova i kamapim pasin marimari bilong em long olgeta man.
5. No ken pret na soim pasin rispek na was gut. (Mat. 10:16) No ken tok pait. Sapos man i no laik harim tok o yu pilim olsem hevi inap kamap, long gutpela pasin tokim man bilong haus olsem yu no inap toktok moa wantaim em na lusim na go.—Prov. 17:14.