KIRAPIM TOKTOK
LESEN 5
Mekim Tok Long Gutpela Pasin
Stiatok: “Oltaim tok bilong yupela i mas gutpela.” —Kol. 4:6.
Samting Pol i Mekim
1. Lukim VIDIO, o ritim Aposel 17:22, 23. Na skelim ol dispela askim:
Pol i pilim olsem wanem taim em i lukim ol imis bilong ol lotu giaman long Atens?—Lukim Aposel 17:16.
Olsem wanem Pol i mekim tok long gutpela pasin taim em i stori long ol bilip bilong ol Atens na bai em i ken autim gutnius long ol na em i no daunim ol?
Yumi Kisim Wanem Skul Long Pol?
2. Ol man bai amamas long harim tok bilong yumi sapos yumi tingim gut ol tok yumi mekim, hau yumi mekim, na taim stret bilong toktok.
Bihainim Pasin Bilong Pol
3. Skelim gut ol tok yu bai mekim. Olsem, taim yu toktok wantaim wanpela i no Kristen, yu mas senisim tok bilong yu taim yu laik stori long Baibel o taim yu laik stori long Jisas.
4. No ken hariap long stretim tok bilong man. Larim em i kamapim tingting bilong em. Sapos em i mekim wanpela tok i no stret wantaim tok bilong Baibel, no ken tok pait wantaim em long dispela. (Jems 1:19) Taim yu putim gut yau long em, bai yu kisim save long tingting bilong em.—Prov. 20:5.
5. Taim i stret long mekim, wanbel wantaim tok man i mekim na tok amamas long em. Ating em i bilip olsem ol bilip bilong lotu bilong em i stret. Pastaim stori long samting yutupela i wanbel long en, na bihain isi isi helpim em long kliagut long tok bilong Baibel.