Sapta 19
Wok Yet Long Autim Tok Bilong God na No Ken Pret
1. (a) Ol disaipel bilong Jisas i autim wanem gutnius? Tasol sampela Juda i mekim wanem? (b) I gat wanem ol askim yumi ken tingim?
KLOSTU 2,000 yia i go pinis, God i makim Pikinini bilong em, Jisas Krais, long kamap King i bosim olgeta hap bilong graun. Ol bikman bilong lotu i birua long Jisas na i kirapim ol man long kilim em i dai, tasol Jehova i kirapim em bek. Long rot bilong Jisas ol man inap kisim laip i stap gut oltaim. Tasol taim ol disaipel bilong em i kirap autim dispela gutnius, ol man i birua long ol. Ol i kalabusim sampela, paitim ol na tambuim ol long autim tok long nem bilong Jisas. (Aposel 4:1-3, 17; 5:17, 18, 40) Ol bai mekim wanem? Sapos yu bin i stap wantaim ol, bai yu mekim wanem? Bai yu wok yet long autim tok na yu no pret?
2. (a) I gat wok long autim wanem gutpela tok long nau? (b) Em wok bilong husat long autim gutnius?
2 Long 1914, King bilong Kingdom bilong God, Jisas Krais, em i sindaun long sia king long heven na i kirap mekim wok king namel long ‘ol birua bilong em.’ (Song 110:2) Bihain, ol i rausim Satan wantaim ol spirit nogut i kam daun long graun. (KTH 12:1-5, 7-12) Orait las de bilong pasin nogut bilong nau i kirap. Taim dispela hap taim i pinis, God bai pinisim olgeta pasin bilong graun Satan i bosim. (Daniel 2:44; Matyu 24:21) Ol manmeri i winim dispela taim ol inap kisim laip oltaim long graun i kamap Paradais. Sapos yu bilip pinis long dispela gutnius, orait bai yu gat laik long autim dispela tok long ol narapela man. (Matyu 24:14) Tasol taim yu autim tok, ol man bai mekim wanem?
3. (a) Taim yumi autim tok bilong Kingdom, sampela man i mekim wanem? (b) Yumi mas tingim wanem askim?
3 Taim yu autim gutnius bilong Kingdom, sampela man i amamas long harim dispela tok, tasol planti i les long harim. (Matyu 24:37-39) Sampela inap tok bilas long yu o birua long yu. Jisas i tok ol wanblut tu inap birua long yu. (Luk 21:16-19) O ating long ples wok o long skul sampela bai mekim olsem long yu. Long sampela kantri gavman i tambuim wok bilong ol Witnes Bilong Jehova. Olsem wanem? Taim kain hevi olsem i kamap, bai yu wok yet long autim tok bilong God na “sanap strong long bilip”?—1 Korin 16:13.
I No Long Strong Bilong Yumi Yet
4. (a) Bilong soim olsem yumi ol wokboi bilong God i stap gut long em, yumi mas mekim wanem bikpela samting? (b) Bilong wanem ol miting Kristen i bikpela samting?
4 Bilong yumi ken stap gut na mekim wok bilong Jehova, yumi mas kisim ol gutpela samting bilong spirit em i givim yumi. Wanpela bilong ol dispela samting em ol miting bilong kongrigesen. Baibel i tok yumi no ken lusim ol miting. (Hibru 10:23-25) Ol Witnes bilong Jehova husat i bin stap gut oltaim long Jehova, ol i bin wok strong long i go oltaim long ol miting wantaim ol wanlotu. Long ol dispela miting, save bilong yumi long Baibel i go bikpela. Na tu, bai yumi save gut moa long ol tok i tru yumi save pinis long en, na bai yumi save gut moa long rot bilong mekim wok long ol dispela tok. Bai yumi pas gut moa wantaim ol brata Kristen bilong yumi na wanbel long mekim lotu na strong moa long mekim laik bilong God. Spirit bilong Jehova i stiaim yumi long rot bilong kongrigesen, na long rot bilong dispela spirit Jisas i stap wantaim yumi.—Matyu 18:20; KTH 3:6.
5. Taim gavman i tambuim wok bilong ol Witnes Bilong Jehova, olsem wanem ol i save mekim ol miting?
5 Olsem wanem? Yu save go long olgeta miting? Yu save bihainim ol tok yu harim long ol dispela miting? Sampela taim gavman i tambuim wok bilong ol Witnes Bilong Jehova, na ol brata i mas bung long ol liklik liklik grup bilong mekim ol miting long haus bilong sampela brata. Ating ol i save senisim senisim taim na ples bilong bung, na sampela taim i hatwok long ol i go, long wanem, ol i mas bung long biknait samting. Tasol maski i hatwok o birua inap painim ol, ol brata sista i stap gut long Jehova ol i wok strong long i go long olgeta miting.
6. Olsem wanem yumi soim olsem yumi wet long Jehova i mas helpim yumi? Olsem wanem dispela inap helpim yumi na bai yumi no pret long autim tok?
6 Yumi kisim pasin bilong wet long Jehova i helpim yumi taim yumi save olsem God i mas helpim yumi na oltaim yumi beten long em. Yu save mekim olsem? Taim Jisas i mekim wok bilong em long graun, oltaim em i beten. (Luk 3:21; 6:12, 13; 22:39-44) Na long apinun paslain long ol i kilim em i dai, em i tokim ol disaipel long mekim olsem: “Yupela i mas was na prea i stap. Nogut traim i kamap long yupela na yupela i pundaun.” (Mak 14:38) Sapos ol man i les long harim tok bilong Kingdom, dispela inap mekim na yumi slek liklik long mekim dispela wok. Sapos ol man i tok bilas o mekim nogut tru long yumi, yumi inap tingting long pasim maus na bai ol hevi i no ken painim yumi. Tasol sapos yumi beten strong askim God long givim spirit bilong em long helpim yumi long autim tok na no ken pret, bai yumi no slek o pasim maus.—Luk 11:13; Efesus 6:18-20.
Ol i No Pret Long Autim Tok
7. (a) Bilong wanem yumi laik save long ol stori i stap long Buk Aposel? (b) Bekim ol askim i stap long pinis bilong dispela paragraf, na kamapim klia olsem wanem ol dispela tok inap helpim yumi.
7 Yumi olgeta i laik save long ol stori i stap long Buk Aposel. Em i stori long ol aposel na ol narapela disaipel bilong pastaim—em ol man wankain olsem yumi—na em i stori long olsem wanem ol i bin winim ol hevi na i stap gut long wok bilong autim tok bilong Jehova na ol i no pret. Orait, nau yumi ken skelim wanpela hap bilong Buk Aposel long rot bilong ol askim na skripsa. Taim yumi mekim olsem, tingim olsem wanem ol tok yu ritim inap helpim yu.
Ol aposel i bin winim bikpela skul o nogat? Yu ting em i pasin bilong ol aposel long ol i no save pret, maski wanem samting i kamap? ( Jon 18:17, 25-27; 20:19; Aposel 4:13)
Wanem samting i helpim Pita na em i no pret long autim tok long ai bilong kaunsil bilong ol Juda em dispela kaunsil i bin tok Pikinini bilong God i mas i dai? (Matyu 10:19, 20; Aposel 4:8)
Sampela wik paslain long taim ol aposel i kot long bikpela kaunsil bilong ol Juda, ol i bin mekim wanem? (Aposel 1:14; 2:1, 42)
Taim ol hetman i tambuim ol aposel long autim tok long nem bilong Jisas, Pita na Jon i bekim wanem tok long ol? (Aposel 4:19, 20)
Taim ol i lusim kot, ol i askim husat gen long helpim ol? Ol i beten olsem pasin birua i mas pinis, o ol i beten long wanem samting? (Aposel 4:24-31)
Olsem wanem Jehova i helpim ol aposel taim ol birua i laik pasim ol long autim tok? (Aposel 5:17-20)
Ol aposel i mekim wanem bilong soim olsem ol i save long as na Jehova i helpim ol long lusim kalabus? (Aposel 5:21, 41, 42)
Maski ol disaipel i ranawe nabaut taim ol man i birua long ol, ol i wok yet long mekim wanem? (Aposel 8:3, 4; 11:19-21)
8. Wanem gutpela samting i kamap long wok autim tok bilong ol disaipel bilong pastaim? Olsem wanem yumi insait long en?
8 Wok bilong ol long autim gutnius i no lus nating. Inap 3,000 disaipel i kisim baptais long Pentikos, 33 C.E. Baibel i tok: “Planti manmeri moa yet i bilip long Bikpela, na ol i kam insait long lain bilong en.” (Aposel 2:41; 4:4; 5:14) Bihain, wanpela man i bin biruaim tru lain bilong God, em Sol bilong Tarsus, em i kamap Kristen na em i kirap autim tok i tru na i no pret. Bihain ol i kolim em aposel Pol. (Galesia 1:22-24) Dispela wok i kirap long taim bilong ol aposel em i stap yet. Na nau long taim bilong las de, dispela wok i kamap bikpela na i go long olgeta hap bilong graun. Yumi ken insait long dispela gutpela wok, na taim yumi mekim olsem, pasin bilong ol witnes i bin stap gut long God long bipo i ken lainim yumi.
9. (a) Pol i autim tok long wanem ol rot? (b) Yu save autim tok bilong Kingdom long wanem ol rot?
9 Taim Pol i kisim save long tok i tru bilong Jisas Krais, em i mekim wanem? “Em i go stret . . . na em i autim tok olsem, ‘Jisas em i Pikinini Bilong God.’ ” (Aposel 9:20) Em i pilim gutpela pasin sori God i bin mekim long em, na em i save olsem olgeta man i mas harim dispela gutnius em i bin kisim. Pol em i wanpela Juda, na olsem ol Juda i save mekim long dispela taim, em i go long haus lotu bilong autim tok. Em i go tu long ol haus na autim tok, na em i toktok gut wantaim ol man long maket. Na em i redi long i go long ol nupela teritori bilong autim gutnius.—Aposel 17:17; 20:20; Rom 15:23, 24.
10. (a) Pol i no pret long autim tok, tasol em i bihainim wanem gutpela tingting taim em i autim tok? (b) Olsem wanem yumi ken bihainim pasin bilong Pol taim yumi autim tok long ol wanblut, wanwok, o wanskul?
10 Pol i no pret long autim tok, tasol em i bihainim gutpela tingting olsem yumi tu i mas mekim. Taim Pol i autim tok long ol Juda, em i kirapim ol long tingim ol tok promis God i bin mekim long ol tumbuna bilong ol. Taim em i autim tok long ol Grik, em i toktok long ol samting ol Grik i save long en. Sampela taim em i stori long olsem wanem em i bin lainim tok i tru na em i mekim wok long dispela stori bilong autim tok long ol man. Em i tok: “Mi save mekim dispela olgeta wok bilong mekim gutnius bilong Jisas i kamap strong, bai mi tu mi ken kisim ol gutpela samting Bikpela i redim pinis bilong givim long ol man i bilip long gutnius.”—1 Korin 9:20-23; Aposel 22:3-21.
11. (a) Pol i mekim wanem na bai em i no ken tok pait planti taim wantaim ol birua? (b) Wanem taim yumi ken bihainim gutpela pasin bilong Pol? Olsem wanem yumi ken mekim? (c) Yumi kisim we strong bilong autim tok i go na i no ken pret?
11 Taim ol man i birua long gutnius, Pol i lusim dispela hap na i go autim tok long narapela hap. Em i no laik tok pait planti taim wantaim ol man i birua long tok i tru. (Aposel 14:5-7; 18:5-7; Rom 12:18) Tasol em i no sem long autim gutnius. (Rom 1:16) Pol i no amamas long tok bilas na pasin nogut ol birua i mekim long em, tasol ‘God i strongim bel bilong em, na em i no surik’ long autim tok. Em i tok: “Bikpela yet i bin sambai long mi na givim strong long mi. Olsem na mi autim gutnius inap tru.” (1 Tesalonaika 2:2; 2 Timoti 4:17) Het bilong kongrigesen Kristen, em Jisas, i wok yet long givim strong yumi mas kisim bilong mekim dispela wok em i bin tok profet long en bai kamap long taim bilong yumi.—Mak 13:10.
12. Wanem samting i kamapim klia pasin bilong ol Kristen long ol i no pret long autim tok? Wanem as bilong dispela?
12 Olsem na i gat as tru na yumi no ken pret long autim tok bilong God, olsem Jisas na ol gutpela wokman bilong God long taim bilong ol aposel i bin mekim. I no olsem yumi gat hatpela pasin na yumi subim ol man long harim tok, maski ol i no laik. Tasol yumi no lusim dispela wok, long wanem, ol man i les long harim tok o ol i birua long yumi. Olsem Jisas i bin mekim, yumi tokaut olsem i stret Kingdom bilong God tasol i bosim graun. Yumi no pret long autim tok, long wanem, yumi olsem maus bilong King bilong heven na graun, em Jehova, na dispela tok yumi autim i no tok bilong yumi, em i tok bilong God. Na pasin bilong yumi long laikim tru Jehova i mas kirapim yumi tru long litimapim nem bilong em.—Filipai 1:27, 28; 1 Tesalonaika 2:13.
Stori Gen Long Ol Dispela Tok
• Bilong wanem em i bikpela samting long yumi mas autim tok bilong Kingdom long olgeta man? Tasol yumi mas save sampela man bai mekim wanem?
• Yumi ken mekim wanem bilong kamapim klia olsem yumi no mekim wok bilong Jehova long strong bilong yumi yet?
• Stori bilong Buk Aposel i lainim yumi long wanem ol bikpela samting?
[Ol Piksa long pes 173]
Olsem long bipo, ol wokman bilong Jehova long nau ol i autim tok bilong God na ol i no pret