Namba 1 Hap—Mekim Ol Baibel Stadi i Save Helpim Ol Man
Baibel Stadi Em i Wanem Samting?
1 Long olgeta hap bilong graun, ol lain bilong God i mekim klostu 6 milion Baibel stadi long olgeta mun. Long rot bilong skulim gut ol man, yumi inap long helpim ol dispela Baibel sumatin long kamap strong na bihain dediket na kisim baptais, na ol inap “skulim ol arapela man tu.” (2 Ti. 2:2) Yu laik helpim sumatin bilong yu long mekim olsem? Kirap long dispela Wok Kingdom na i go, bai i gat sampela tok long ol Wok Kingdom i kamap bihain long olsem wanem yumi inap helpim ol Baibel stadi long kamap strong.
2 Wanem Taim Yu Ken Putim Ripot Bilong Baibel Stadi: Sapos oltaim yu save toktok wantaim wanpela man o meri long tok bilong Baibel, maski yu mekim inap sotpela taim tasol na yu mekim wok long Baibel na wanpela buk samting, orait yu mas save olsem yu mekim wanpela Baibel stadi. Maski yu toktok wantaim man long dua bilong haus o long telefon, yu mekim Baibel stadi. Taim yu mekim stadi tupela taim pinis na sapos yu save olsem yu bai stadi yet wantaim em orait yu ken putim long ripot.
3 Buklet Yumi Mas Mekim Wanem? na buk Save ol i bilong mekim Baibel stadi long en. Taim sumatin i stadi pinis long buklet Yumi Mas Mekim Wanem? na buk Save, na sapos yu luksave olsem sumatin i wok long kamap strong long samting bilong spirit, maski em i mekim isi isi, na em i pilim samting em i lainim, orait stadi wantaim em long buk Lotuim God. Yu ken yusim buklet Yu Inap i Stap Pren Bilong God! bilong stadi wantaim ol man i no bin skul gut na ol man i no save rit gut.
4 Wok bilong stadi wantaim ol man long Baibel i bin helpim planti milion long kamap disaipel tru bilong Jisas Krais. (Mt. 28:19, 20) Taim yu bihainim ol tok bai kamap long ol stori i kamap bihain, yu inap long helpim Baibel stadi long kamap strong.