Buk Baibel i Tok—Nambawan Buk Bilong Mekim Baibel Stadi
1 Yumi bin amamas tru long kisim buk Tru Tru Baibel i Tok Wanem? long “Bihainim Tok Bilong God” Kibung Distrik. Bai yumi mekim wanem long dispela nupela buk bilong skulim ol man? Dispela buk bai stap olsem nambawan buk bilong mekim Baibel stadi wantaim ol man. Yumi bai tilim dispela buk long ol mun i kam bihain, tasol ol pablisa i ken kirap nau long mekim wok long en bilong kirapim na mekim ol Baibel stadi.
2 Ol Baibel Stadi Nau Yu Mekim: Ol pablisa i stadi wantaim ol man long buk Save o buklet Yumi Mas Mekim Wanem? ol i ken skelim gut: ol bai mekim wok long dispela buk olsem wanem long stadi na wanem taim ol bai kirap yusim. Sapos nau tasol yu kirapim wanpela Baibel stadi, orait yu ken kirap stadi long dispela nupela buk. Sapos yupela stap namel long buk Save, orait painim wanpela sapta long buk Baibel i Tok i wankain na kirap stadi long en. Tasol sapos yupela i stap klostu long pinis bilong buk Save, orait yupela i ken pinisim stadi long buk Save.
3 Ating yumi olgeta i save long sampela manmeri em buk Baibel i Tok bai helpim ol sapos ol i stadi long en. Yu ken tokim ol olsem yu laik mekim Baibel stadi wantaim ol long dispela buk. Olsem: Ol lain i bin stadi long buklet Yumi Mas Mekim Wanem? o buk Save, tasol ol i no dediket na kisim baptais ating ol i gat laik long kirap stadi long dispela nupela buk. Ol papamama i ken mekim wok long dispela buk bilong helpim ol pikinini long kisim stretpela save long laik bilong God.—Kl. 1:9, 10.
4 Stadi Long Namba Tu Buk: Olsem wanem? I gat namba tu buk i stap em sumatin i ken stadi long en taim em i pinisim buk Tru Tru Baibel i Tok Wanem? Yes i gat. Sapos isi isi sumatin i wok long kamap strong na em i amamas long ol samting em i wok long lainim, yu ken stadi yet wantaim em long buk Lotuim Dispela Wanpela God Tru. Mipela i bilip tru olsem dispela buk Baibel i Tok bai i stap olsem wanpela gutpela tul bilong yusim taim yumi mekim wok bilong yumi long kamapim disaipel.—Mt. 28:19, 20.