Rot Bilong Yusim Buk “Pasin Laikim Bilong God” Long Mekim Baibel Stadi
1. Wanem wok bilong buk “Pasin Laikim Bilong God”?
1 Yumi bin kisim gutpela helpim tru long buk “Stap Insait Yet Long Pasin Laikim Bilong God” em yumi bin skelim long Baibel Stadi Bilong Kongrigesen. Dispela buk i bilong helpim yumi long kisim save long ol lo bilong Jehova na laikim ol dispela lo, na i no bilong skulim yumi long ol bikpela tok bilong Baibel. Dispela buk i no bilong tilim long ol man taim yumi autim tok.
2. Wanem taim i stret long yusim buk “Pasin Laikim Bilong God”? Na bai yumi stadi wantaim husat long en?
2 Dispela buk em i namba 2 buk bilong stadi wantaim ol Baibel sumatin taim yumi stadi pinis wantaim ol long buk Baibel i Tok. Yumi mas tingim olsem olgeta wan wan Baibel sumatin i no wankain, sampela i save kliagut hariap long ol samting ol i lainim na sampela nogat. Olsem na mekim stadi long pasin i stret long skel bilong wan wan sumatin. Helpim ol gut na bai ol i kliagut long samting ol i lainim. No ken yusim dispela buk long kirapim stadi wantaim ol man em ol i bin stadi pinis long ol narapela buk tasol ol i no save kam long ol miting na ol i no redi long bihainim ol tok i tru bilong Baibel em ol i bin lainim.
3. Yumi mas mekim wanem sapos long nau yumi wok long stadi wantaim sumatin long buk Lotuim God?
3 Sapos long nau yu wok long stadi wantaim Baibel sumatin long buk “Lotuim God” na klostu yupela i laik pinisim dispela buk, orait yupela i ken mekim olsem na yu ken tokim sumatin long em yet i ken ritim buk “Pasin Laikim Bilong God.” Sapos nogat, orait i gutpela long kirap stadi long buk “Pasin Laikim Bilong God” na kirap long sapta 1 na i go. Sapos yupela i laik, yupela i ken skelim ol tok i stap long hap bilong apendiks.
4. Yumi mas mekim wanem sapos sumatin i baptais paslain long em i pinisim buk Baibel i Tok na buk “Pasin Laikim Bilong God”?
4 Sapos sumatin i baptais paslain long em i pinisim buk Baibel i Tok na buk “Pasin Laikim Bilong God,” orait yupela i mas stadi yet i go inap long em i pinisim dispela tupela buk. Maski sumatin i baptais pinis, yu ken putim ripot yet long hamas aua, gobek na stadi yu mekim wantaim em. Pablisa i wok wantaim yu long mekim dispela stadi, em tu i mas kaunim aua.
5. Olsem wanem yu ken yusim buk “Pasin Laikim Bilong God” bilong helpim pablisa i bin lusim wok autim tok?
5 Sapos wanpela insait long Kongrigesen Sevis Komiti i makim yu long stadi wantaim wanpela pablisa husat i bin lusim wok autim tok, ating ol yet bai makim wanem sapta stret long buk “Pasin Laikim Bilong God” em yu ken stadi wantaim dispela pablisa long en. Taim yu mekim kain stadi olsem wantaim wanpela, yu mas mekim olsem insait long sampela mun samting. Yumi amamas tru long dispela nupela buk em wok bilong en i bilong helpim yumi long stap “insait yet long pasin laikim bilong God.”—Jut 21.