Askim

◼ Yumi mas stadi long wanem tupela buk wantaim ol Baibel sumatin?

Buk Baibel i Tok i nambawan buk yumi yusim bilong kirapim na mekim ol Baibel stadi. I no gat rong long kirapim stadi long rot bilong narapela buk samting, olsem wanpela liklik nius, tasol gutpela sapos yupela i senisim stadi i go hariap long buk Baibel i Tok. Ol gutpela samting tru i bin kamap long rot bilong yusim buk Baibel i Tok bilong kirapim ol stadi.

Taim sumatin i stadi pinis long buk Baibel i Tok na em i wok long kamap strong, orait yupela i mas stadi long buk Lotuim God. (Kl. 2:⁠7) Pes 2 bilong dispela buk i stori long wok bilong en. Em i tok: “Baibel i kirapim ol man husat i laikim tru God long ‘save gut’ long ol tok i tru bilong em i ‘longpela moa, na i go antap tru, na i go daun moa.’ (Ef. 3:18) Bilong yu ken mekim olsem, mipela i bin redim dispela buk. Mipela i laik bai dispela buk i helpim yu long kamap strong long ol samting bilong spirit na helpim yu long wokabaut long liklik rot i go long laip long nupela taim God bai kamapim.”

Sapos sumatin i winim mak bilong kisim baptais paslain long em i pinisim namba tu buk, em i mas stadi yet i go inap long namba tu buk i pinis. Maski sumatin i baptais pinis, brata o sista i mekim stadi i ken putim long ripot taim em i lusim bilong mekim stadi, na kaunim em olsem gobek na wanpela stadi. Pablisa husat i go wantaim brata long stadi, em tu i ken kaunim hap taim em i lusim bilong stap long dispela stadi.