Askim

◼ Bai yumi stadi wantaim Baibel sumatin husat i wok long kamap strong inap long wanem mak?

Gutpela yumi mekim stadi yet wantaim Baibel sumatin husat i wok long kamap strong, inap long em i pinisim tupela buk​—⁠Tru Tru Baibel i Tok Wanem? na “Stap Insait Yet Long Pasin Laikim Bilong God.” Sapos sumatin i kisim baptais paslain long em i pinisim dispela tupela buk, yumi gat wok yet long stadi wantaim em. Maski sumatin i baptais pinis, yumi ken putim yet ripot long hamas aua, gobek na stadi yumi mekim wantaim em. Na sapos wanpela pablisa i wok wantaim yumi long mekim dispela stadi, em tu i ken kaunim aua.​—⁠Lukim Wok Kingdom bilong Epril 2011, pes 2.

Paslain long yumi pinisim stadi wantaim ol nupela man, em i bikpela samting long bilip bilong ol long tok i tru i mas i gat gutpela as bilong en. Ol i mas “holimpas” Krais na “sanap strong long bilip” bambai ol inap winim ol traim bai painim ol. (Kol. 2:​6, 7; 2 Tim. 3:12; 1 Pita 5:​8, 9) Na tu, bilong ol i ken skulim gut ol narapela, ol i mas i gat “stretpela save long tok i tru.” (1 Tim. 2:⁠4) Long rot bilong pinisim dispela tupela buk wantaim ol sumatin bilong yumi, yumi helpim ol long sanap strong long ‘rot i go long laip.’​—⁠Mat. 7:⁠14.

Paslain long ol elda i orait long Baibel sumatin i kisim baptais, ol i mas skelim gut olsem em i kliagut long ol bikpela tok bilong Baibel na pasin bilong em i stret wantaim ol tok bilong en o nogat. Na ol i mas skelim gut moa sumatin husat i no pinisim yet nambawan buk bilong stadi. Sapos sumatin i no redi long kisim baptais, ol elda i mas stretim rot na bai em inap kisim helpim bilong inapim ol mak bilong kisim baptais long bihain.​—⁠Lukim buk Oganaisesen Bilong Mekim Laik Bilong Jehova, pes 217-218.

[Rait long pes 3]

Em i bikpela samting long bilip bilong ol nupela man long tok i tru i mas i gat gutpela as bilong en