Mekim Ol Baibel Stadi Long Dua Bilong Haus na Long Telefon
1 Yumi save amamas tru taim yumi kirapim wanpela Baibel stadi, a? Tasol pasin bilong kirapim stadi em tasol i no inap, yumi mas mekim sampela samting moa. As na yumi stadi wantaim man em bilong helpim man long kamap wanpela disaipel tru bilong Krais. (Mt. 28:19, 20) Wanem samting inap helpim yumi long mekim olsem?
2 Ol Man i Gat Planti Wok: Long nau ol manmeri i bisi tru. Long sampela hap, ating pastaim sampela manmeri tasol bai amamas long stadi long Baibel inap wanpela aua. Bilong helpim ol dispela man, ol i bin strongim yumi long kirapim na mekim ol Baibel stadi long dua bilong haus o long telefon. Ating pastaim dispela kain stadi bai sotpela taim tasol na bai yu skelim tasol sampela skripsa bilong Baibel long rot bilong wanpela o tupela paragraf long wanpela buk, olsem buk Baibel i Tok. Yumi amamas tru olsem planti pablisa long nau ol i mekim ol Baibel stadi long dua bilong haus o long telefon!
3 Tasol olsem wanem? Yumi mas stadi long dua bilong haus tasol i go i go? Nogat. Tru, i no gutpela long toktok longpela taim long dua bilong haus taim yumi kirap stadi, tasol Wok Kingdom bilong Julai 1990, pes 8 i tok: “Taim yumi kirapim pinis stadi, na man bilong haus i amamas long yumi stadi wantaim em, ating nau yumi inap lusim bikpela haptaim liklik long mekim stadi.” Dispela em i bikpela samting. Olsem: Sapos yumi laik givim kaikai long wanpela pikinini i sot tru long kaikai, ating pastaim yumi bai givim em liklik kaikai i go inap em i kamap strong liklik. Tasol sapos yumi givim em liklik kaikai tasol inap planti mun, dispela i no inap mekim em i kamap strong. Olsem tasol, sumatin i mas stadi long Baibel inap longpela haptaim liklik na long olgeta taim na bai em i kamap wokman bilong God i bikpela pinis long ol samting bilong spirit.—Hi. 5:13, 14.
4 Mekim Stadi Long Haus: I gutpela long mekim stadi long wanpela hap we i no gat planti man—insait long haus o long sampela hap i gutpela. Dispela bai helpim sumatin na i no hatwok long em long lainim gut ol samting na kisimgut ol tok bilong Baibel. (Mt. 13:23) Na dispela bai opim rot long tisa i mekim stadi i stret bilong helpim sumatin. Na tu, sapos yumi lusim bikpela haptaim liklik long mekim stadi dispela bai opim rot long sumatin inap skelim gut Tok Bilong God na dispela bai strongim bilip bilong em.—Ro. 10:17.
5 Olsem wanem yu ken senisim stadi long dua bilong haus i go insait long haus? Taim yupela i mekim pinis sampela sotpela stadi, yu ken askim sumatin long stadi inap longpela taim liklik. O yu ken askim sumatin, “Olsem wanem? Long nau yu gat haptaim bilong yumi ken sindaun wantaim na stori long dispela samting?” o “Yu laik bai yumi lusim hamas minit long stadi long dispela samting?” Sapos sumatin i no inap stadi longpela taim liklik, orait yu ken mekim yet sotpela stadi long dua bilong haus. Bihain, long taim i stret long mekim, traim gen long senisim stadi i go insait long haus.
6 Taim yumi wok yet long painim ol man i gat gutpela bel, yumi no ken lusim tingting long as na yumi kirapim na mekim ol Baibel stadi. Yumi laik helpim ol man i gat gutpela bel long kamap wokman bilong Jehova i dediket na baptais pinis. Jehova bai blesim dispela gutpela wok yumi mekim.—2 Ti. 4:5.
[Askim Bilong Stadi]
1. Wanem as na yumi save mekim ol Baibel stadi?
2. Stadi long dua bilong haus na telefon em wanem samting? Bilong wanem pasin bilong mekim stadi olsem i gutpela?
3. Bilong wanem yumi mas wok strong long lusim sampela haptaim moa long mekim stadi long dua bilong haus?
4. Wanem ol gutpela samting inap kamap taim yumi mekim Baibel stadi insait long haus?
5. Olsem wanem yumi ken senisim ples bilong stadi long dua bilong haus na i go insait long haus?
6. Yumi mas i gat wanem tingting taim yumi mekim wok autim tok? Olsem wanem ol tok i stap long dispela stori bai helpim yumi long inapim wok bilong yumi?