Kirapim Ol Baibel Stadi Long Dua Bilong Haus na Long Telefon
1 Long nau ol manmeri i bisi. Tasol planti i gat laik long kisim save long ol samting bilong spirit. Yumi ken mekim wanem bilong helpim ol long inapim dispela laik? (Mt. 5:3) Planti pablisa inap stadi long Baibel wantaim ol man long dua bilong haus o long rot bilong telefon. Yu ting yu inap mekim kain wok olsem na long dispela rot yu ken mekim bikpela wok moa bilong autim tok?
2 Bilong kirapim ol Baibel stadi, yumi mas redi long soim long ol man pasin bilong stadi long Baibel taim rot i op. Olsem wanem na long wanem hap yumi ken mekim olsem?
3 Long Dua Bilong Haus: Taim yu bungim wanpela man i amamas long toktok long Baibel, opim buklet long paragraf yu bin redim pastaim, kain olsem namba wan paragraf long stadi namba 1 long buklet Yumi Mas Mekim Wanem?, na kirap mekim stadi. Ritim paragraf, skelim askim, na stori long wanpela o tupela skripsa ol i no raitim tok bilong en. Planti taim yu inap mekim olsem insait long 5-pela i go inap 10-pela minit taim yu sanap long dua bilong haus. Sapos man i amamas long toktok, makim taim bilong skelim wanpela o tupela paragraf long narapela taim.—Sampela tok moa long pasin bilong tokaut stret long man olsem yumi laik stadi wantaim em i stap long Wok Kingdom Bilong Yumi bilong Janueri 2002, pes 8.
4 Yu ken bihainim wankain pasin bilong kirapim ol Baibel stadi taim yu mekim ol gobek. Olsem: Yu inap soim buklet Yumi Mas Mekim Wanem? na stori long nem bilong God, skelim stadi namba 2, paragraf 1-2. Long narapela taim, yu inap stori long ol tok Baibel i mekim long ol pasin bilong Jehova, na skelim paragraf 3-4. Na long narapela taim bihain long dispela, yu ken skelim paragraf 5-6 na piksa i stap long pes 5 bilong kamapim klia olsem wanem pasin bilong stadi long Baibel i helpim yumi long save long Jehova. Yu ken mekim olgeta dispela samting taim yu sanap long dua bilong haus.
5 Long Rot Bilong Telefon: Ating sampela man i amamas moa long stadi long Baibel long rot bilong telefon. Tingim dispela ekspiriens: Wanpela sista i bin autim tok long ol haus na em i bungim wanpela yangpela mama i bisi tru long mekim wok mani. Taim sista i no inap painim dispela meri long haus, sista i ringim em. Dispela yangpela mama i tok em i no gat taim bilong toktok long Baibel. Sista i tok: “Insait long 10 o 15 minit yu inap lainim sampela nupela samting, maski em long rot bilong telefon.” Meri i tok: “Sapos em long rot bilong telefon, orait yumi ken mekim!” Bihain liklik, sista i stadi wantaim em long rot bilong telefon.
6 Yu ting sampela yu save go lukim ol i amamas long stadi long rot bilong telefon? Yu inap bihainim pasin dispela sista i bin mekim, o yu inap tok: “Sapos yu laik, yumi inap toktok long Baibel long rot bilong telefon. Yu ting dispela i gutpela moa long yu?” Taim yumi senisim pasin bilong yumi long stadi long Baibel na bai em i stret long ol man yumi laik stadi wantaim ol, orait yumi inap helpim ol long “save gut long God.”—Snd. 2:5; 1 Ko. 9:23.
[Askim Bilong Stadi]
1, 2. Yumi ken mekim wanem bilong stadi long Baibel wantaim ol man i bisi?
3. Bilong wanem i gutpela long soim pasin bilong stadi long Baibel long namba wan taim yu bungim man? Olsem wanem yu ken mekim dispela?
4. Olsem wanem yumi ken kirapim Baibel stadi long dua bilong haus taim yumi mekim ol gobek?
5, 6. (a) Bilong wanem sampela man i amamas moa long stadi long Baibel long rot bilong telefon? (b) Yumi ken tok wanem bilong kirapim man long stadi long rot bilong telefon?