Yu Save Yusim Buklet Yumi Mas Mekim Wanem? Bilong Kirapim Ol Baibel-Stadi?
1 Sapos oltaim yu save toktok wantaim wanpela man o meri long ol tok bilong Baibel, maski yu mekim inap sotpela taim tasol, na yupela i skelim sampela paragraf bilong wanpela buk samting, orait yu save olsem yu wok long mekim wanpela Baibel-stadi? Yes, yu mekim Baibel-stadi, maski yu toktok wantaim man long dua bilong haus o long telefon. I gutpela sapos yu wok strong long mun Me na Jun bilong kirapim Baibel-stadi long rot bilong buklet Yumi Mas Mekim Wanem?
2 Redi Gut Bilong Wok i Ken Kamap Gutpela: Taim yu tilim buklet Yumi Mas Mekim Wanem?, yu mas tingim gut ol samting yu laik toktok long en. Sapos yu mekim gobek, tingim gut ol tok yu bin mekim long man taim yu bin bungim em long namba wan taim. Askim yu yet: ‘Mi ken yusim wanem ol paragraf bilong buklet em ol i stret long ol tok mipela bin mekim, na dispela inap opim rot bilong kirapim Baibel-stadi?’ Sapos yu autim tok long ol haus, tingim wanem ol tok bai kirapim tingting bilong wanpela yangpela, lapun, wanpela man, o meri. Skelim ol het-tok bilong ol stadi long buklet, na makim wanpela stadi i kirapim laik bilong man long harim tok. Taim yu makim pinis ol tok yu laik kamapim, mekim traim long en inap planti taim liklik. Dispela em i wanpela rot bilong mekim wok bilong yu i kamap gutpela.
3 Pepa yumi bin kisim wantaim Wok Kingdom bilong Janueri 2002 i kamapim 8-pela “Ol Tok Yu Ken Mekim Bilong Tilim Buklet Yumi Mas Mekim Wanem?” Blok “Tokaut Stret” i soim olsem wanem yumi inap yusim dispela buklet bilong kirapim ol Baibel-stadi. Bilong bihainim namba wan tok bilong en yu ken tok olsem:
◼ “Yu save olsem insait long sampela minit tasol yu inap kisim save long bekim bilong wanpela bikpela askim bilong Baibel? Olsem: Bilong wanem i gat planti lotu i tok ol i Kristen? Sampela taim yu bin tingting long dispela askim?” Taim man i bekim tok pinis, opim buklet i go long stadi 13 na stori long paragraf 1 na 2. Sapos i gat taim, ritim wanpela o tupela skripsa na stori long en. Bihain yu ken ritim laspela askim long antap bilong pes na tok: “Ol narapela hap bilong dispela stadi i kamapim 5-pela mak bilong helpim yu long luksave long lotu i tru. Mi bai amamas long kam bek na stori wantaim yu long ol dispela samting.”
4 Wok Strong: Long olgeta taim rot i op, soim man long pasin bilong mekim Baibel-stadi long buklet Yumi Mas Mekim Wanem? Askim Jehova long blesim wok bilong yu. (Mt. 21:22) Taim yu wok strong long mekim ol wok bilong yu, yu inap kisim amamas man i save kisim taim em i helpim wanpela long bilip long gutnius!