Wetim Jehova Long Mekim Ol Samting i Go Bikpela
1 “Long namba wan taim mi pilim tru dispela narapela kain amamas bilong helpim ol brata long kirapim wanpela nupela kongrigesen. Winim tupela yia, mipela i bin hatwok, na beten oltaim na wetim Jehova em Man bilong ‘mekim ol samting i go bikpela.’ ” Em tok bilong wanpela strongpela painia em i kisim save olsem yumi gat wok long bilip na wetim Jehova i mekim ol samting i go bikpela. (1 Ko 3:5-9) Taim yumi wok long painim ol man i laikim ol samting bilong spirit, yumi tu i mas kisim helpim long God sapos yumi laik bai wok bilong yumi i karim gutpela kaikai.—Snd 3:5, 6.
2 Bilong Kaikai i Ken Kamap, Yumi Mas Lukautim: Bilong pikinini kaikai bilong tok i tru i ken kamap, yumi mas lukautim. Planti taim ol gutpela samting i kamap taim yumi go bek lukim man wanpela o tupela de bihain long yumi autim tok long em long namba wan taim. Pes i mas lait na yumi mas mekim gutpela pasin pren. Mekim ol samting bambai narapela man i ken amamas long toktok wantaim yu. Yu no ken mekim olgeta tok. Mekim ol samting bambai em i ken save long yu, na kamapim klia olsem yu tingim em tru.
3 Long mun Julai na Ogas bai yumi tilim ol buklet long ol man yumi bungim. Tasol yumi gat wok tu long go bek lukim ol man i bin amamas long harim tok na long ol man i bin kisim buklet. Yumi ken mekim gobek long ol na tokim ol yumi laik mekim Baibel-stadi wantaim ol. (Mt 28:19, 20) Bilong mekim olsem, yumi ken mekim wok long buklet Yumi Mas Mekim Wanem? bilong kirapim ol stadi. Ating dispela fopela pasin bilong toktok wantaim ol man inap helpim yu.
4 Sapos yu bin toktok wantaim wanpela man i bin tingting planti, long wanem, ol samting long graun i wok long i go nogut, orait bilong toktok gen wantaim em yu ken tok olsem:
◼ “Mi bilip olsem yu tu i tingting planti long ol manmeri i no bihainim moa ol stretpela pasin. Yumi save harim ol stori bilong ol pait insait long famili, na dispela i mekim nogut long ol pikinini, na ol papamama, na ol poroman marit. Na planti man i mekim tok giaman o ol i stil bilong kisim ol samting bilong inapim laik bilong ol yet. Olsem wanem? Yu ting God i save tingim pasin ol man i mas bihainim long i stap bilong ol? [Larim man i bekim tok.] God i bin kamapim sampela lo ol man i mas bihainim, na ol dispela lo i no save givim hevi long yumi.” Kaunim 1 Jon 5:3. Soim em buklet Yumi Mas Mekim Wanem?, na opim long Stadi 10. Kaunim namba wan paragraf. Kolim ol tok long rait italik long kirap bilong paragraf 2-6, na askim man em i ting wanem pasin i nogutim tru ol manmeri long nau. Kaunim ol tok bilong paragraf em i makim, na sapos i gat taim, kaunim wanpela o tupela skripsa. Bilong pinisim tok, kaunim paragraf 7 na stretim rot bilong i go lukim em bilong yutupela i ken stori moa.
5 Sapos yu bin bungim ol man i save tingting planti long famili bilong ol, yu ken mekim kain tok olsem:
◼ “Olsem wanem? Yu ting i stret yumi ken ting olsem Man bilong wokim yumi em i givim ol samting long yumi bilong strongim famili bilong yumi?” Larim man i bekim tok. Soim em buklet Yumi Mas Mekim Wanem?, opim long Stadi 8, na tokim em olsem dispela stadi i kamapim ol tok bilong Baibel bilong helpim olgeta long famili. Tokim em yu laik soim em long pasin bilong stadi long buklet wantaim Baibel bambai dispela buklet inap helpim gut em. Bihainim ol tok i stap long pes 2 bilong buklet. Stretim rot bilong i go bek na stadi moa long dispela Stadi, o sapos yupela i bin pinisim, yu ken go bek bilong stadi long narapela Stadi bilong buklet em man bilong haus i makim.
6 Em hia wanpela tok yumi ken mekim bilong tok stret long man olsem yumi laik stadi wantaim em long Baibel. Soim em buklet “Yumi Mas Mekim Wanem?,” na yu ken tok:
◼ “Ol tok bilong dispela buklet i olsem stadi kos i kamapim gut ol bikpela tok bilong Baibel. Long olgeta wan wan pes, yu inap painim bekim bilong ol askim em planti manmeri i no bin save long bekim bilong ol inap planti handet yia. Kain askim olsem: Wanem laik bilong God long dispela graun?” Opim buklet long Stadi 5, na kaunim ol askim i stap long kirap bilong Stadi. Askim man, em i laik save long bekim bilong wanem askim, na nau kaunim ol paragraf na skripsa i stret long en. Tokim em, bai i no hatwok tu long painim ol gutpela bekim bilong ol narapela askim. Tokim em olsem yu laik kam bek na stori long narapela askim na bekim bilong en.
7 O ating yu laik traim long mekim dispela sotpela tok bilong kirapim Baibel-stadi, olsem:
◼ “Yu save olsem insait long sampela minit tasol yu inap kisim save long bekim bilong wanpela bikpela askim long Baibel? Kain olsem, . . .” Nau kamapim wanpela askim i stap long kirap bilong wanpela Stadi long buklet, wanpela askim yu ting bai kirapim tingting bilong dispela man. Bilong kisim sampela tingting long sampela askim yu inap mekim wok long en, lukim paragraf 15 na 16 long pepa yumi kisim wantaim Wok Kingdom bilong Mas, 1997, nem bilong en: “Strongim Bel Long Mekim Ol Gobek.”
8 Taim yumi amamas na mekim ol gobek na ol Baibel-stadi, yumi kamap “wanwok” bilong God. (1 Ko 3:9) Sapos yumi wok strong long helpim ol man i bin amamas long harim tok na yumi bilip na wetim Jehova i mekim ol samting i go bikpela, yumi inap kisim dispela amamas tru em ol narapela wok i no inap kamapim.