Olsem Wanem Long Pasin Bilong Yu Long Mekim Wok?
Kirap bilong nupela yia bilong wok em gutpela taim bilong tingim pasin bilong yumi long mekim ol wok. Olsem wanem long wok bilong yumi long yia i go pinis? Wok bilong yumi i stap olsem tasol o wok i bin kamap gutpela moa? Ating yumi yet i bin stadi gut moa, o pasin bilong yumi long go long ol miting i bin kamap gutpela moa, o yumi mekim bikpela wok moa long autim tok na mekim wok painia haptaim. Ating yumi bin mekim sampela gutpela pasin Kristen na helpim sampela long kongrigesen o famili. Sapos olsem, yumi ken amamas yumi bin wokabaut long pasin God i laikim, na i gat gutpela as na yumi mas “mekim ol dispela pasin moa moa yet.”—1 Te 4:1.
Tasol olsem wanem sapos yumi bin mekim ol wok long wan wan taim tasol o sampela taim yumi bin wok strong na sampela taim nogat? Dispela i bin mekim wanem long yumi long ol samting bilong spirit? I gat sampela samting i bin pasim yumi long kamap strong moa? Sapos yumi laik bai wok bilong yumi i kamap gutpela moa, yumi mas beten askim Jehova long helpim yumi. (Fl 4:6, 13) Toktok wantaim ol narapela long famili bilong yu na askim ol long helpim yu long stretim ol samting na bai yu inap mekim gut wok bilong yu. Sapos yu gat hevi, askim ol elda o wasman sekit long helpim yu. Sapos yumi wok strong na bihainim rot Jehova i soim long yumi, yumi ken bilip olsem, yumi “bai i no inap i stap nating. Nogat. [Bai yumi] karim planti kaikai.”—2 Pi 1:5-8.
Sapos yu stretim gut ol wok na wokabaut long dispela pasin, bai yu kisim planti blesing na hatwok bilong yu bai i no inap lus nating. Taim yu tingting strong long stretim gut ol wok na wokabaut yet long dispela pasin, yu “mas wok strong oltaim na larim Holi Spirit i kirapim [yu] long mekim wok bilong Bikpela.” (Ro 12:11)—Sapos yu laik kisim sampela save moa long ol dispela tok, lukim Wastaua (tok Inglis), Me 1, 1985, p. 13-17.
This is a partial repeat of article in km 9/94 “Stretim Gut Ol Wok na Wokabaut Yet Long Dispela Pasin,” par. 9-11, which was taken partly from km-E 8/94 “Keep Walking Progressively in an Orderly Routine,” par. 11-21.