Tingim Ol Bikpela Samting Pastaim
1 Wanem sampela bikpela samting bilong helpim yumi long i stap strong long ol samting bilong spirit? Pasin bilong mekim stadi bilong yumi yet, go long ol miting, beten oltaim, ol gutpela poroman, na wok autim tok, ol dispela samting i insait long en, a? Yumi no inap stap strong long ol samting bilong spirit sapos yumi no putim ol bikpela samting i stap namba wan long wokabaut bilong yumi.
2 Tasol yumi olgeta i gat pait wantaim ol laik nogut bilong skin olsem na yumi gat wok long stretim tingting bilong yumi. (Ga 5:17) Yumi no ken ting olsem taim yumi mekim ol samting bilong inapim laik bilong yumi yet, dispela bai helpim yumi moa. (Jer 17:9) Olsem na bilong was gut long bel bilong yumi bambai em i no ken paulim yumi, em bikpela samting long yumi mas skelim yumi yet long olgeta taim.—Snd 4:23; 2 Ko 13:5.
3 Skelim Bel Bilong Yu Yet: Bilong skelim bel bilong yu, yu ken askim yu yet olsem: Olsem wanem? Mi gat strongpela laik long kaunim Baibel? (1 Pi 2:2) Mi pilim tru olsem em i bikpela samting long mi mas i go long olgeta miting bilong kongrigesen? (Hi 10:24, 25) Mi save beten long olgeta taim? (Ro 12:12) Mi wok long painim ol poroman i save tingim ol samting bilong spirit? (Ro 1:11, 12) Mi pilim olsem mi mas autim gutnius? (1 Ko 9:16) Sapos yu tok yes long ol dispela askim, dispela i makim olsem yu gat laik long putim ol bikpela samting i stap namba wan.
4 Skelim Ol Samting Yu Mekim Long Olgeta Wan Wan De: Bihain long yu skelim pinis bel bilong yu, yu mas makim gut taim long mekim ol samting i bikpela samting. Olsem: Yu mas makim taim bilong kaunim Baibel na olgeta wan wan Wastaua na Kirap! long olgeta taim, na tu long redim ol miting. Makim tu taim bilong mekim famili-stadi na long famili i ken beten wantaim. Sampela i mas skelim hamas taim ol i laik lusim bilong lukluk long televisen o pilai long kompyuta samting. Tingting strong long go long olgeta miting bilong kongrigesen, na taim yu makim taim bilong yu long mekim ol samting, putim ol miting i stap namba wan. Stretim ol samting na bai famili olgeta i ken insait long wok autim tok long olgeta wan wan wik.
5 Tru tumas, taim yumi tingim pastaim ol bikpela samting long i stap bilong yumi, dispela bai mekim yumi i stap amamas.