Kirapim Stadi Long Buklet Yumi Mas Mekim Wanem?
1 Ol ripot i kam long olgeta hap i kamapim long ples klia olsem buklet God i Laik Yumi Mas Mekim Wanem?, em i gutpela helpim bilong skulim ol man long tok i tru. Long olgeta wik ol i kirapim planti tausen Baibel-stadi long dispela buklet. Olsem wanem long yu? Yu bin kirapim na mekim wanpela Baibel-stadi long dispela buklet Yumi Mas Mekim Wanem?
2 Planti brata i no hatwok long tilim dispela buklet, tasol sampela i hatwok long tingim wanem tok ol bai mekim bilong kirapim stadi. Wanem sampela rot ol narapela i save bihainim na ol i gutpela rot bilong kirapim Baibel-stadi long buklet Yumi Mas Mekim Wanem? Ol dispela tok hia bai helpim yu.
3 Soim Em Long Pasin Bilong Mekim Baibel-Stadi: Taim yu go lukim man long namba wan taim o mekim gobek, yu no ken askim em tasol olsem yu laik stadi wantaim em, nogat, soim em long olsem wanem yumi save mekim Baibel-stadi. Dispela bai helpim ol man i save tingting planti long dispela tok “stadi.” Taim yumi lain pinis long rot bilong soim man olsem wanem yumi mekim stadi, bai yumi save, bihain long yumi mekim sotpela tok, yumi inap go stret insait long stadi.
4 Redi Gut, Em Bikpela Samting: Sapos yumi redi gut, yumi bai amamas long kirapim ol Baibel-stadi. Pasin bilong redi gut pastaim bai helpim yumi long daunim pasin bilong surik long insait long dispela wok bilong mekim Baibel-stadi. Taim yumi mekim traim inap sampela taim ol toktok yumi bai mekim, dispela bai helpim yumi long toktok gut na bihainim pasin bilong yumi yet long toktok, na long kamapim tok bilong yumi yet. Dispela i no helpim yumi tasol long i stap isi, nogat; em bai helpim man bilong haus tu long stap olsem.
5 Taim yu mekim traim long haus, i gutpela long yu skelim ol minit yu lusim long mekim olsem na bai yu inap tokim man bilong haus hamas minit bai yu pulim bilong soim em pasin bilong mekim stadi. Taim wanpela brata i tok gude na kolim nem bilong em, em i tok: “Mi kam lukim yu bilong soim yu wanpela kos bilong mipela long mekim Baibel-stadi i no gat pe. Em 5-pela minit tasol bilong soim yu. Olsem wanem? Yu gat 5-pela minit?” Stadi long Stadi 1 long buklet Yumi Mas Mekim Wanem?, yu inap mekim insait long 5-pela minit. Tru, yu inap kaunim sampela skripsa tasol insait long dispela liklik hap taim, tasol taim yu mekim pinis namba wan stadi insait long 5-pela minit, man bilong haus i kisim namba wan stadi bilong em. Orait toksave long em olsem taim yu kam bek long mekim Stadi 2, yu bai mekim insait long 15 minit tasol.
6 Ol toktok daunbilo i bin kamapim gutpela samting:
◼ “Mi laik soim yu wanpela kos bilong stadi long Baibel long rot bilong buklet God i Laik Yumi Mas Mekim Wanem? Dispela kos i no hatwok na yu inap mekim insait long sotpela taim tasol. Planti man i kisim save olsem taim ol i lusim 15 minit tasol long olgeta wan wan wik inap 16 wik long mekim dispela kos, ol i painim ol gutpela bekim long Baibel long ol dispela bikpela askim bilong Baibel.” Soim em liklik long ol het-tok bilong stadi long pes 2. Opim buklet long Stadi 1, na tok: “Sapos yu gat 5-pela minit mipela i laik soim yu long dispela stadi i wok olsem wanem. Het-tok bilong Stadi 1 em ‘Olsem Wanem Yu Inap Save Long Ol Samting God i Laik Yu Mas Mekim.’ ” Kaunim 3-pela askim na stori long ol namba i stap insait long mak olsem ( ). Kaunim paragraf 1, na soim man olsem wanem em i ken painim bekim. Askim em long kaunim paragraf 2. Nau yu ken tok: “Save yu kisim long paragraf bai helpim yu long bekim dispela askim olsem wanem? [Kaunim gen askim, na larim man i bekim.] Bai yu luksave olsem i gat ol skripsa i stap insait long wan wan paragraf. Ol dispela skripsa bai stiaim tingting bilong yu i go long Baibel bilong bekim ol dispela askim. Olsem: Yumi ken kaunim 2 Timoti 3:16, 17 na skelim—dispela skripsa bai helpim tok yu bin bekim long Man bilong kamapim ol tok bilong Baibel, o nogat.” Taim yupela i kaunim pinis paragraf 3, toktok long askim, na kaunim Jon 17:3 na helpim man bilong haus long save, em i bin kisim sampela save taim yupela i mekim Stadi 1. Nau yu ken opim buklet long Stadi 2 na kaunim laspela askim: “I gat wanem tupela rot bilong kisim save long God?” Na yu ken askim em: “Wanem de bai yu gat 15 minit bilong yumi ken mekim Stadi 2 na painim bekim bilong dispela askim?”
7 Em bikpela samting long mekim tok i no hatwok long em, na sapos i stret, mekim tok amamas long em long wanpela tok samting em i bin mekim. Taim yu stretim tok long go bek gen, yu no ken askim em sapos em i laik bai yu go bek, nogat; strongim em long mekim wankain pasin long narapela stadi. Tokim em olsem bai yu amamas long kam bek lukim em. Sampela pablisa i tok ol bai mekim wanpela stadi long telefon sapos man bilong haus i hatwok long makim wanpela taim. Na tu, yu ken tokim man long putim gut buklet long wanpela hap i no hatwok long kisim taim yu kam bek.
8 Tingting Strong: Bilong wok i ken kamap gutpela, yumi mas redi gut—em bikpela samting. Tasol yumi mas tingting strong long bihainim dispela pasin. Pasin bilong skulim man insait long sotpela taim em i hatwok, olsem na wok strong long mekim traim dispela pasin planti taim bambai yu ken save gut long pasin bilong soim man long mekim stadi. Traim long soim pasin bilong mekim stadi long olgeta man yu toktok wantaim ol long haus, long kain kain taim na ples, maket, stua, na taim yu autim tok long rot bilong telefon. Sapos yu hatwok long kirapim wanpela Baibel-stadi, yu no ken les kwik. Wok bilong yu long kirapim Baibel-stadi bai kamap gutpela sapos yu tingting strong long mekim na yu gat laik tru long kamapim tok i tru long ol narapela.—Ga 6:9.
9 Taim yu bihainim ol dispela tok hia, yu tu inap mekim gutpela wok long helpim ol man long wokabaut long rot bilong laip, taim yu kirapim na mekim Baibel-stadi long buklet Yumi Mas Mekim Wanem?—Mt 7:14.