Yusim Buklet Gutpela Nius Long Skulim Man
1. Olsem wanem yumi inap yusim buklet Gutpela Nius?
1 Long Wok Kingdom bilong Julai, yumi bin stori olsem nambawan gutpela tul bilong yusim long skulim man em buklet, Gutpela Nius i Kam Long God! Dispela buklet i kamapim planti skripsa, tasol ol i no raitim tok bilong ol dispela skripsa. Long dispela rot, man inap ritim stret tok i stap long Baibel. Ol i wokim planti nius bilong yumi long pasin we man yet inap kisim skul long en, tasol dispela buklet i narapela kain. Wanpela i mas i stap olsem tisa na skulim narapela. Olsem na taim yumi tilim dispela buklet, yumi mas soim man long pasin bilong mekim stadi. Dispela bai kirapim laik bilong em long kisim save long gutpela nius i kam long Baibel.—Mat. 13:44.
2. Olsem wanem yumi inap yusim buklet Gutpela Nius long namba 1 taim yumi bungim man?
2 Bungim Man Long Namba 1 Taim: Ating yu ken tok: “Mi kam bikos ol man i tingting planti long ol samting bai kamap long dispela graun long bihain. Yu ting ol pasin nogut bilong graun bai pinis? [Larim man i bekim tok.] Baibel i gat ol gutpela nius we inap helpim yumi long bilip na wetim gutpela samting bai kamap. Em hia sampela askim we bekim bilong ol i stap long Baibel.” Givim buklet long man na tokim em long makim wanpela askim long baksait bilong buklet. Yusim fes paragraf bilong lesen em man i makim na soim em long pasin bilong stadi. Narapela rot em olsem: Yu yet i ken makim wanpela lesen na givim askim we inap stiaim tingting bilong man i go long dispela lesen. Yu ken soim em long olsem wanem dispela buklet inap helpim em long kisim ol bekim i kam long Baibel. Sapos jw.org/tpi i gat wanpela vidio i stret wantaim dispela lesen, orait sampela pablisa i save pilaim tu dispela vidio.
3. Stori long olsem wanem yu inap yusim buklet Gutpela Nius long mekim Baibel stadi.
3 Pasin Bilong Mekim Baibel Stadi: (1) Ritim askim i gat namba long en na i stap long strongpela rait, na helpim man long putim tingting i go long bikpela poin bilong stadi. (2) Ritim paragraf i stap aninit long dispela askim. (3) Ritim ol skripsa em ol i slipim rait bilong ol, na dispela bai helpim man long luksave long olsem wanem ol skripsa i bekim askim bilong dispela paragraf. (4) Sapos i gat narapela paragraf i stap aninit long wankain askim, orait mekim wankain samting olsem poin 2 na poin 3 i kamapim. Sapos wanpela vidio i stret wantaim dispela askim na yu no pilaim yet dispela vidio long man bilong haus, orait yu ken pilaim vidio long em. (5) Bihain, askim man long kamapim bekim bilong em bambai yu ken painimaut sapos em i kisim stretpela save, o nogat.
4. Olsem wanem yumi inap mekim gutpela wok long dispela buklet?
4 Save gut long ol samting i stap long dispela buklet. Yusim dispela buklet taim rot i op. Taim yu redi long i go lukim sumatin, tingim gutpela rot bilong toktok gut wantaim em na yusim gut ol skripsa i stap long lesen. (Snd. 15:28; Apo. 17:2, 3) Taim yu save gut long yusim dispela buklet, ating em bai kamap feiveret tul bilong yu long yusim bilong skulim ol narapela long tok i tru!