Helpim Ol Man i No Gat Planti Save
1 Long rot bilong wok autim tok, yumi save skulim ol narapela long ol samting God i laik ol i mas mekim. (Mt 28:19, 20) Winim 5 milion Witnes long olgeta hap ol i wok strong long mekim olsem. Yumi autim tok inap hamas aua, o yumi tilim hamas buk, o yumi kirapim hamas Baibel-stadi, dispela yet i no makim olsem wok yumi mekim bilong skulim ol man i kamap gutpela. Taim ol man i kisim save na bihainim ol samting ol i lain long en, dispela i makim olsem yumi inapim tru wok bilong yumi.
2 Bilong helpim ol narapela long ol samting bilong spirit yumi mas “givim tingting long man i no gat planti save.” (Sng 119:130) Sapos ol man i “harim na tingim gut” ol tok, dispela inap kirapim ol na ol inap pilim tru. (Mt 15:10) Wok bilong yumi i go bikpela na i kamap planti, na nau yumi kisim save olsem yumi mas skulim ol man long pasin na toktok i no hatwok long ol i ken kisim gut. Long dispela as, Sosaiti i wokim buklet God i Laik Yumi Mas Mekim Wanem? Buklet i olsem wanpela stadi kos i kamapim gut ol bikpela tok bilong Baibel. Ol stadi i sotpela, ol tok bilong en i no hatwok long kisim save long en, olsem na planti man i laikim dispela buklet.
3 Taim yumi tilim sabskripsen bilong Wastaua long mun Epril na Me, bai yumi tilim dispela buklet tu. Gutpela sapos yu makim Sarere bilong mekim wok magasin, na yu ken tilim sabskripsen na buklet taim yu autim tok long ol narapela de bilong wik. Tilim buklet long ol man i bin amamas long kisim ol buk samting long bipo, maski ol i kisim sabskripsen o nogat. Tingim, dispela buklet i gutpela bilong skulim ol pikinini, na ol man i no save gut long tok Pisin o tok Inglis, na ol man i no save gut long rit.
4 Mekim Ol Tok i No Gat Hatwok Long En: Taim yu laik tilim buklet Yumi Mas Mekim Wanem?, kamapim tok bilong pes 2 i tok olsem “ol i wokim dispela buk olsem wanpela Baibel-stadi kos.” Kamapim tok bilong paragraf 3 long pes 3 bilong kamapim i gat wanem as na man i mas stadi long Baibel. Bilong kirapim tingting bilong em, soim em ol het-tok bilong ol stadi i kamapim ol tok i tru bilong Baibel. Soim olsem wanem dispela buklet bai mekim man i amamas long kisim save, na tokim em yu bai amamas long helpim em.
5 Mekim Stadi i Strongim Man: Yumi no laik stadi tasol, nogat—yumi laik kamapim ol disaipel i givim bel long lotu i tru. Yumi inap pinisim dispela buklet insait long sampela wik, na nau yumi ken kirapim stadi long buk Save. (Lukim sta daunbilo long pes 31.) Kirap long namba wan stadi, helpim sumatin long kisim save long oganaisesen bilong Jehova. (Lukim buk Toktok Gut, p. 283-284.) Kamapim olsem wanem ol miting bilong kongrigesen i ken helpim em, na tokim em taim em i go long ol miting em bai save gut long olsem wanem em inap lotu tru long God.—Hi 10:24, 25.
6 Taim yumi givim bel tru long mekim dispela bikpela wok long Epril na Me, bai yumi kisim dispela amamas bilong helpim ol gutpela man long kisim “gutpela save” em inap bringim ol long laip.—Snd 4:5.