Planti Manmeri i Wok Long Kam Insait
1 Long 1996, 220 nupela disaipel i bin kisim baptais long Papua Niugini. Insait long fopela yia i go pinis, winim 1,000 manmeri i bin kisim baptais. Tru tumas, long teritori bilong yumi, ‘tok bilong God i go nabaut long olgeta hap, na planti manmeri moa i bin kamap disaipel.’—Ap 6:7.
2 Ol dispela nupela brata sista ol i no gat planti save long bihainim sampela pasin Kristen, olsem na ol strongpela brata sista i mas helpim na skulim ol. (Ro 15:1) Namel long ol Kristen bilong pastaim, sampela ol i no bin wok long kamap strong, maski ol i bin baptais inap sampela yia. (Hi 5:12; 6:1) Long dispela as, taim Pol i raitim pas long ol Hibru, em i kamapim klia sampela samting ol Kristen i mas mekim bilong kamap strong long ol samting bilong spirit. Wanem ol dispela samting? Na olsem wanem yumi ken helpim ol narapela?
3 Kisim Ol Gutpela Pasin Bilong Stadi: Stret wantaim tok Pol i mekim, bilong kamap gutpela sumatin yumi mas wokim tingting taim yumi wok long kisim ol save, lukim gen ol tok, na mekim wok long ol “strongpela kaikai” oganaisesen bilong Jehova i save givim long yumi. (Hi 5:13, 14; lukim Wastaua, Ogas 15, 1993, p. 12-17.) Taim yu toktok wantaim ol nupela brata sista long ol samting bilong spirit, na stori wantaim ol long ol gutpela tok i tru em yu kisim save long en long rot bilong stadi bilong yu yet, yu inap kirapim ol long kisim ol gutpela pasin bilong stadi. Ating wan wan taim yu ken singautim wanpela nupela pablisa long insait long stadi bilong yu yet o bilong famili.
4 Oltaim Go Long Ol Miting: Sapos yu stap olsem gutpela piksa na mekim ol tok bilong strongim ol, dispela bai helpim ol nupela long kongrigesen long ol i no ken kisim narapela pasin Pol i bin kolim, em pasin bilong lusim ol miting Kristen. (Hi 10:24, 25) Helpim ol long save tru olsem ol miting em bilong lukautim ol long ol samting bilong spirit. Mekim ol samting na bai ol i amamas long i stap insait long lain bilong yumi i stap olsem brata brata.
5 Bilip na Beten Long Jehova: Bilong winim ol hevi bilong skin na ol popaia bilong yumi yet, yumi mas beten long Jehova na kamapim ol tingting i stap long bel bilong yumi. Olsem Pol i tok, ol nupela i mas save olsem, taim ol i askim Jehova long helpim ol, ol i no ken kisim tupela tingting. (Hi 4:15, 16; 10:22) Taim yu stori long ol samting i bin painim yu yet taim yu bin beten, dispela bai strongim ol nupela long save olsem, Jehova i save harim beten bilong ol man i givim bel long mekim.
6 Makim Taim Bilong Autim Tok: Pol i tok tu olsem, taim yumi ‘givim biknem long God, na dispela pasin i stap olsem ofa,’ dispela bai strongim yumi long ol samting bilong spirit. (Hi 13:15) Yu inap singautim wanpela nupela disaipel long autim tok wantaim yu long taim yu save autim tok long olgeta wik? Ating yutupela i ken redim tok yupela bai mekim o stori long narapela rot bilong autim tok em nupela pablisa i no bin traim yet.
7 Yumi amamas tru long lukim planti nupela i kam insait. Taim yumi givim yumi yet long skulim na strongim ol nupela long kongrigesen, dispela bai helpim ol long kisim strongpela bilip na em inap helpim ol long kisim laip.—Hi 3:12, 13; 10:39.