Olgeta i Ken Insait Long Wok Bilong Kamapim Ol Nupela Disaipel
1 Nupela disaipel i no kamap long rot bilong hatwok bilong wanpela man. Jehova inap yusim olgeta “wanwok” bilong em bilong helpim ol Baibel sumatin long kamap strong. (1 Ko. 3:6-9) Yumi olgeta wan wan i helpim ol nupela long rot bilong ol bekim bilong yumi long ol miting Kristen na long pasin bilong yumi, em dispela samting i kamapim klia tru olsem spirit bilong God i save stiaim laip bilong yumi. (Jo. 13:35; Ga. 5:22, 23; Ef. 4:22, 23) Yumi inap mekim wanem samting moa bilong helpim ol nupela?
2 Kongrigesen Olgeta: Yumi olgeta i ken kamapim pasin bilong tingim ol man i save kam long ol miting long rot bilong go pas long sekanim ol na toktok wantaim ol paslain na bihain long miting. Wanpela man i tingim bek namba wan taim em i kam long miting, na em i tok: “Insait long wanpela de tasol mi bungim planti man em mi no save long ol na ol i gat pasin laikim tru, mi no bin bungim planti kain man olsem insait long lotu mi bin kamap bikpela long en. Em i klia tru olsem mi painim pinis tok i tru.” Em i kisim baptais 7-pela mun bihain long em i kam long namba wan miting.
3 Mekim gutpela tok amamas long Baibel sumatin taim em i wok long kamap strong. Olsem wanem? Em i wok long karim hevi long pasin bilong ol man i birua long em? Em i save kam oltaim long ol miting? Em i bin strongim bel na bekim tok long miting? Em i insait long Skul Tiokratik Bilong Autim Tok o kirap autim tok wantaim kongrigesen? Tok amamas long em long ol mak em i winim pinis. Dispela bai strongim bel bilong em na givim nupela strong long em.—Snd. 25:11.
4 Man i Lukautim Stadi: Sampela pablisa i bin helpim ol Baibel sumatin bilong ol long kisim save long ol bratasista bilong kongrigesen taim ol i askim ol narapela pablisa long kam wantaim ol long stadi. Singautim sumatin hariap long kam long ol miting bilong kongrigesen. Taim em i kirap long kam long ol miting, kisim em i go bungim ol narapela. Olsem wanem? Em i hatwok long lusim wanpela pasin nogut, olsem pasin bilong smok? Sampela long famili i no laik em i stadi? Em inap kisim helpim taim em i toktok wantaim pablisa husat i bin karim na winim wankain hevi.—1 Pi. 5:9.
5 Ol nupela i mas kisim helpim long kongrigesen na bai ol i ken kamap strong. Olgeta i ken helpim ol long kamap strong long rot bilong tingim tru ol.