‘Lusim Pret na Autim Tok Bilong God’
1 Olsem wanem? Sampela taim yu surik long tokim ol narapela long bilip bilong yu taim rot i op long mekim olsem long skul o long ples wok? Yu save hatwok long autim tok long ol wanblut na neiba o long ol man yu no save long ol? Wanem samting inap helpim yumi olgeta long ‘lusim pret na autim tok bilong God’ taim rot i op?—Fl. 1:14.
2 No Ken Surik: Olsem wanem? Bai yu surik long mekim sampela tok bilong helpim gutpela pren o wanblut em ol narapela i sutim tok giaman long em? Inap planti tausen yia, ol man i bin sutim tok giaman long nambawan gutpela Pren bilong yumi, Jehova. Yumi gat gutpela wok tru long autim tok bilong bikpela God bilong yumi! (Ais. 43:10-12) Pasin bilong laikim tru Jehova inap helpim yumi long daunim pasin bilong sem o pret na em inap kirapim yumi long toktok, na yumi no surik long autim strong tok i tru.—Ap. 4:26, 29, 31.
3 Tingim, tok yumi autim em i gutpela tok. Ol man i harim dispela tok, em bai helpim ol inap oltaim oltaim. Taim yumi tingting long olsem wanem wok autim tok inap helpim ol man na yumi no tingting long yumi yet o long ol man i birua long yumi, dispela i helpim yumi long strong long autim tok.
4 Pasin Bilong Ol Narapela: Yumi inap kisim strong long pasin bilong ol narapela long stap gut long God em ol i bin lusim pret na autim tok bilong God. Olsem: Enok i no pret long autim tok long kot bilong Jehova bai painim ol manmeri nogut i givim baksait long God. (Ju. 14, 15) Noa i stap gut long wok bilong autim tok long ol manmeri i les long harim tok. (Mt. 24:37-39) Ol Kristen long taim bilong ol aposel i no bin go long bikpela skul na ol i man nating tasol, tasol ol i no lusim wok bilong autim tok maski ol man i birua tru long ol. (Ap. 4:13, 18-20) Planti Wastaua na Kirap! i gat laip stori bilong ol man husat i bilip long Jehova, na long dispela rot ol i daunim pasin bilong pret long man na ol i kamap man bilong givim bel long wok autim tok.
5 Taim yumi tingim wokabaut bilong ol bilipman bilong bipo husat i bin karim ol bikpela hevi, dispela inap strongim yumi. (1 Kin. 19:2, 3; Mk. 14:66-71) ‘God i strongim bel bilong ol’ na ol i lusim pret na autim tok. Yumi tu inap mekim olsem!—1 Te. 2:2.