Wok Long Kamap Strong Moa Long Ol Samting Bilong Spirit!

Olgeta taim yumi mas tingim de yumi kisim baptais. Long wanem, long dispela de yumi bin tokaut long ai bilong ol man olsem yumi dediket pinis long mekim wok bilong god.

PLANTI man i hatwok long inapim dispela mak bilong kisim baptais​—⁠ol i mas lusim ol pasin nogut em longtaim ol i bin bihainim, na lusim ol poroman nogut, na senisim sampela pasin na tingting ol i bin strong long bihainim.

Tru, baptais em wanpela bikpela samting i kamap long i stap bilong Kristen na em samting em i amamas long en, tasol baptais em i kirap tasol bilong ol samting em i mas mekim. Aposel Pol i tokim ol Kristen long Judia i baptais pinis: “Yumi no ken toktok tasol long ol skul yumi save kisim pastaim long tok bilong Krais. . . . Yumi mas kisim olkain skul bilong ol man i bikpela pinis.” (Hibru 6:​1, 2) Yes, olgeta Kristen i mas ‘go i go inap long ol i bilip tru na stap wanbel tru na save tru long Pikinini Bilong God. Olsem na Kristen laip bilong ol bai i kamap strong na ol bai kisim ol wankain gutpela pasin olsem Krais yet.’ (Efesus 4:​13) Yumi mas kamap olsem man i bikpela pinis​—⁠long dispela rot tasol bai yumi inap “bilip strong.”​—⁠Kolosi 2:7.

Inap sampela yia, planti handet tausen man i dediket nupela ol i bin kam insait long kongrigesen Kristen. Ating yu wanpela bilong ol. Wankain olsem ol wanlain brata i bin stap long taim bilong ol aposel, yu tu yu no laik stap olsem nupela pikinini long ol samting bilong spirit. Yu laik kamap olsem bikpela man, olsem kamap strong moa! Olsem wanem yu inap mekim olsem? Na wanem sampela samting yu ken kamap strong long en?

Kamap Strong Long Rot Bilong Stadi

Pol i tokim ol Kristen long Filipai: “Oltaim mi save beten olsem, pasin bilong laikim tru ol narapela na stretpela save na gutpela tingting em i ken pulap moa yet long yupela.” (Filipai 1:​9, NW) Bilong kamap strong moa long ol samting bilong spirit, yumi mas wok long kisim “stretpela save.” Taim yumi baptais pinis, yumi no ken lusim wok bilong kisim ‘save long God Jehova na Krais Jisas’​—⁠yumi mas mekim i go yet.​—Jon 17:3.

Wanpela sista Kristen, em yumi ken kolim Aleksandra, em i kisim save long dispela samting 10-pela yia bihain long taim em i kisim baptais​—⁠em i kisim baptais taim em i gat 16 krismas. Em i go bikpela insait long tok i tru na olgeta taim em i save go long ol miting Kristen na mekim wok autim tok. Em i tok: “Inap sampela mun i go pinis, mi save olsem samting i no stret liklik. Mi kirap na skelim mi yet, olsem mi gat wanem tingting long tok i tru, na i gat wanem as na mi stap yet insait long tok i tru.” Em i kisim save long wanem samting? Em i tok moa: ‘Mi tingim ol as na mi stap insait long tok i tru na mi tingting planti. Mi tingim taim mi wok long go bikpela, planti taim mi harim tok olsem pasin bilong go long ol miting na autim tok i bikpela samting. I olsem ol i bin ting, sapos yumi mekim olsem, orait bai yumi kisim pasin bilong stadi na beten. Tasol taim mi wok long skelim mi yet, mi kisim save olsem mi no bin strong long bihainim pasin bilong mekim stadi na beten.’

Aposel Pol i kirapim yumi olsem: “Gutpela pasin yumi kisim pinis, em yumi mas holimpas strong.” (Filipai 3:16) Yumi mas bihainim yet gutpela pasin bilong pasin yumi kisim pinis. Taim yu no baptais yet, yu bin stadi Baibel wantaim wanpela tisa i gat save long mekim dispela wok. Taim yu pilim moa yet ol tok yu lainim, yu kirap na redim gut stadi bilong yu long olgeta wik, na yu opim Baibel na lukim ol ves em buk i no kamapim tok bilong en, na yu mekim sampela samting moa. Nau yu baptais pinis, tasol olsem wanem? Yu save bihainim yet dispela ‘gutpela pasin yu kisim pinis’?

Sapos nogat, ating yu mas skelim gen ol samting yu putim i go pas, na “skelim gut wanem ol samting i bikpela samting tru.” (Filipai 1:​10, NW) I gat planti wok yumi mas mekim long olgeta de, olsem na yumi mas bosim gut skin na makim hap taim bilong kaunim Baibel na stadi long en. Tru, dispela i hatwok, tasol sapos yumi mekim olsem, em bai helpim gut yumi. Tingim gen stori bilong Aleksandra. Em i tok: ‘Inap 20 yia mi bin go long ol miting na autim tok, tasol i no olsem mi insait tru long tok i tru, nogat.’ Na em i tok moa: ‘Tru, pasin bilong go long ol miting na autim tok em bikpela samting, tasol dispela tupela samting tasol i no inap long strongim mi taim ol hevi i kamap. Mi no save stadi tumas, na wan wan taim tasol mi beten, na taim mi beten, mi save beten nating. Nau mi save pinis, mi mas stretim tingting bilong mi na stadi gut bambai mi inap save gut long Jehova na laikim em tru na pilim tru ol gutpela samting Pikinini bilong em i bin mekim bilong helpim yumi.’

Sapos yu mas i gat wanpela bilong helpim yu long makim taim bilong stadi gut, ol elda na sampela strongpela Kristen moa long kongrigesen ol bai amamas long helpim yu. Na tu, ol stori long Wastaua bilong Me 1, 1995; Ogas 15, 1993; na Wastaua (tok Inglis) bilong Me 15, 1986, i gat sampela gutpela tok bilong helpim yu.

Yumi Mas Go Klostu Long God

Narapela samting em yumi mas wok long kamap strong moa long en, em yumi mas kamap pren bilong God. Ating sampela i no pas gut liklik wantaim em. Tingim Anthony, em i kisim baptais taim em i yangpela yet. Em i tok: “Mi namba wan pikinini long famili bilong mi long kisim baptais. Taim mi baptais pinis, mama bilong mi i holimpas mi. Em i amamas tru. Planti ol i amamas, na mi pilim olsem mi stap strong.” Tasol i gat sampela samting i no gutpela tumas. Anthony i tok moa: “Inap longtaim liklik, i no gat wanpela yangpela long kongrigesen bilong mipela i kisim baptais. Olsem na mi amamas tru long mi yet. Mi hambak long bekim tok na mekim sampela tok long ol miting. Na mi amamas taim ol man i litimapim nem bilong mi na orait long mi, na dispela i bin kamap bikpela samting long mi, winim pasin bilong litimapim nem bilong Jehova. Mi no pas gut wantaim em olsem wanpela gutpela pren.”

Wankain olsem Anthony, ating sampela i bin dediket, long wanem, ol i laik amamasim ol narapela; ol i no tingting tumas long amamasim Jehova. Tasol maski ol i bin mekim olsem, God i laik bai ol i bihainim dispela promis ol i bin mekim long em. (Skelim wantaim Saveman 5:4.) Tasol sapos ol i no pas gut wantaim God, ating bai ol i hatwok long mekim olsem. Anthony i tingting bek na em i tok: “Dispela bikpela amamas mi bin kisim taim mi baptais, i bilong sotpela taim tasol. Wanpela yia i no pinis yet na mi mekim bikpela rong na ol elda bilong kongrigesen i mas stretim mi. Bihain mi mekim planti rong, na dispela i mekim na ol i rausim mi long kongrigesen. Mi dediket 6-pela yia pinis, na ol polis i holim mi na putim mi long kalabus, long wanem, mi kilim man i dai.”

Kamap Pren Tru Bilong Jehova

Maski yu strong long ol samting bilong spirit, o yu no strong tumas, olgeta Kristen inap bihainim dispela singaut bilong Baibel: “Yupela i mas i go klostu tru long God, na em bai i kam klostu tru long yupela.” (Jems 4:8) Namba wan taim yu kirap na stadi long Baibel, ating yu go klostu liklik long God. Yu kisim save olsem God i no wanpela god nating em ol misin i save lotuim, nogat; em i wanpela man i stap tru na em i gat wanpela nem, Jehova. Na yu kisim save tu olsem em i gat ol gutpela pasin​—⁠em i God bilong “marimari na sori. Na [em i] no save belhat kwik. [Em i] save laikim tru olgeta manmeri.”​—⁠Kisim Bek 34:​6.

Tasol bilong truim dediket bilong yu long mekim wok bilong God, yu mas go klostu moa long em! Olsem wanem yu inap mekim? Man bilong raitim Song i beten olsem: “God, yu mas skulim mi long gutpela pasin bilong yu, na soim mi long rot bilong yu.” (Song 25:4) Pasin bilong stadi long Baibel na long ol buk bilong Sosaiti bai helpim yu long kisim sampela save moa long Jehova. Pasin bilong beten strong oltaim long Jehova, em tu i bikpela samting. Man bilong raitim Song i tok: “Yupela i mas autim olgeta hevi na olgeta tingting bilong yupela long em.” (Song 62:8) Taim yu lukim olsem God i harim ol beten bilong yu, bai yu pilim olsem God i tingim tru yu. Dispela bai helpim yu long pilim olsem yu stap klostu long em.

Ol hevi i save kamap, dispela tu em inap helpim yu long go klostu long God. Ating sampela hevi na sampela samting bilong traim bilip bilong yu bai kamap, olsem sik, ol hevi i kamap long ples wok o skul, o ol hevi bilong yu long mani samting. O ating pasin bilong autim tok, o go long ol miting, o stadi wantaim ol pikinini bilong yu long Baibel em i hatwok long yu. Sapos olsem, yu wanpela i no ken karim ol dispela hevi! Beten strong long God i ken helpim yu, na askim em long stiaim tingting bilong yu na soim rot long yu. (Sindaun 3:​5, 6) Krai long em long givim spirit holi long yu! (Luk 11:13) Taim yu lukim olsem God i mekim gut long yu na helpim yu, bai yu go klostu moa long em. Olsem Devit, man bilong raitim Song, i tok: “Traim na lukim na bai yupela i save olsem Bikpela i gutpela tru. Man i save bilip tru long Bikpela, em i ken i stap belgut tru.”​—⁠Song 34:8.

Olsem wanem long Anthony? Em i tok: ‘Mi tingim bek dispela taim mi bin putim planti samting olsem mak mi laik winim long bihainim laik bilong Jehova. Taim mi tingim bek ol dispela samting, bel bilong mi i bagarap stret. Tasol maski mi bel hevi na tingting planti, mi tingim gutpela pasin sori bilong Jehova. Bihain liklik mi kirap gen long beten, na mi kamapim olgeta tingting i stap long bel bilong mi, na mi askim em long lusim ol rong mi bin mekim. Mi kirap tu long kaunim Baibel, na mi kirap nogut taim mi kisim save olsem i gat planti samting mi bin lusim tingting long en na mi bin save liklik tasol long Jehova.’ Anthony i no pinisim yet taim bilong em long kalabus long dispela rong em i bin mekim, tasol ol Witnes i save helpim em na em i wok long kamap orait gen long ol samting bilong spirit. Anthony i pilim tru dispela samting, na em i tok: “Mi tenkyu long Jehova na long oganaisesen bilong em ol i bin helpim mi long rausim olgeta pasin bilong olpela bel, na long olgeta de mi wok strong long kisim ol nupela pasin. Mi laik stap gut wantaim Jehova​—⁠dispela em i namba wan bikpela samting nau long mi.”

Kamap Strong Long Wok Autim Tok

Krais Jisas i tokim lain bilong em olsem ol i mas autim “gutnius bilong kingdom.” (Matyu 24:14) Sapos yu nupela pablisa bilong autim gutnius, ating yu no save tumas long mekim wok autim tok. Orait wanem samting bai helpim yu long kamap strong na bai yu inap “mekim tru dispela wok”?​—2 Timoti 4:5.

Wanpela samting, em yu mas wok long kisim stretpela tingting long dispela wok. Yu mas lain long tingim wok autim tok olsem wanpela “gutpela samting tru,” olsem wanpela gutpela wok yu inap mekim. (2 Korin 4:7) Long rot bilong wok autim tok yumi inap kamapim klia olsem yumi laikim tru Jehova na yumi laik stap gut long em. Em i givim rot tu long yumi long kamapim klia olsem yumi tingim ol narapela man. Sapos yumi no tingim yumi yet tasol na yumi wok long helpim ol narapela, orait dispela inap mekim na yumi kisim amamas tru.​—Aposel 20:35.

Jisas yet i gat stretpela tingting long wok bilong autim tok. Wok bilong helpim ol narapela long kisim save long ol tok i tru bilong Baibel i olsem “kaikai” bilong em. (Jon 4:​34) Samting i kirapim em long helpim ol narapela, em i kamap ples klia long dispela tok em i mekim: “Mi laik.” (Matyu 8:3) Jisas i sori tru long ol man, na em i sori moa yet long ol man em ol lain bilong Satan i bin mekim na “tingting bilong ol i paul nabaut, na ol i stap nogut tru.” (Matyu 9:​35, 36) Olsem wanem? Yu tu yu gat “laik” long helpim ol man i stap tudak long ol samting bilong spirit na helpim ol long kisim save bilong Tok Bilong God? Sapos olsem, orait bai yu pilim olsem yu mas bihainim dispela tok bilong Jisas: “Yupela i mas i go mekim olgeta lain manmeri i kamap disaipel bilong mi.” (Matyu 28:19) Tru tumas, bel bilong yu bai kirapim yu long insait tru long dispela wok inap long skel bilong yu.

Narapela samting bilong helpim yu long kamap strong, em oltaim yu mas autim tok​—⁠long olgeta wik sapos yu inap. Sapos yu mekim olsem, dispela inap daunim pasin bilong pret long autim tok em samting i save painim man i autim tok long wan wan taim tasol. Na pasin bilong autim tok long olgeta taim bai helpim yu long sampela samting moa. Em bai helpim yu long pilim moa yet tok i tru, na bai yu laikim moa yet Jehova na ol man na em bai helpim yu long putim tingting bilong yu i go long ol gutpela samting bilong Kingdom.

Tasol olsem wanem sapos i stap bilong yu long nau i mekim na yu no inap insait tumas long wok bilong autim tok? Sapos yu no inap senisim sampela samting long i stap bilong yu, orait yu ken save, sapos yu givim bel olgeta long mekim wok bilong God, orait God bai amamas long wanem wanem samting yu inap mekim. (Matyu 13:23) I gat sampela samting moa ating yu ken kamap strong long en, olsem mekim gut wok bilong autim tok. Insait long kongrigesen, Skul Bilong Wok Autim Tok na Miting Bilong Wok Autim Tok inap skulim yu gut long dispela samting. Sapos yumi mekim gut wok autim tok, bai yumi amamas moa long mekim dispela wok na lukim gutpela kaikai i kamap long en.

Olsem na taim yumi kisim baptais, yumi no ken lusim wok bilong kamap strong moa long ol samting bilong spirit. Aposel Pol i kamapim tingting bilong em long go long heven na kisim laip i no save dai, olsem: “Ol brata, mi no ting mi kisim yet dispela pasin. Tasol mi gat wanpela tingting tasol, em long mi mas lusim tingting long olgeta samting bilong bipo, na mi mas wok strong long kisim dispela samting bai i kamap bihain. Mi save ran strong bilong kamap long mak na kisim prais. Dispela prais em i olsem. Long wok bilong Krais Jisas, God i singautim mi bilong i go antap na i stap gut tru wantaim em. Sapos tingting bilong yumi i kamap olsem tingting bilong ol man i gat gutpela save, orait yumi olgeta i mas bihainim dispela wankain tingting olsem nau mi autim. Na sapos yupela i gat narapela tingting, orait God bai i stretim dispela tingting bilong yupela.”​—⁠Filipai ​3:​13-​15.

Tru tumas, olgeta Kristen, maski ol i bilong go long heven na kisim laip i no save dai o ol i gat tingting long kisim laip oltaim long Paradais long graun, ol i mas “wok strong”​—⁠olsem taitim bun tru​—⁠na bai ol inap kisim dispela laip! Baptais bilong yu em i kirap tasol bilong ol samting yu mas mekim. Wok yet long kamap strong moa long ol samting bilong spirit. Long rot bilong ol miting na stadi, “tingting bilong [yu] i mas i stap olsem tingting bilong ol bikpela man.” (1 Korin 14:20) Yu mas save gut long tok i tru, “em i bikpela tru, na i go longpela moa, na i go antap tru, na i go daun moa.” (Efesus 3:​18) Sapos yu wok long kamap strong moa, dispela bai helpim yu long stap amamas long nau, na tu, dispela bai helpim yu long go insait long nupela taim God bai kamapim, na bai yu inap wok long kamap strong moa yet i go inap long olgeta taim bihain, aninit long wok bos bilong Kingdom bilong em long heven!

[Piksa long pes 29]

Bilong makim hap taim bilong mekim stadi, yu mas bosim gut skin

[Piksa long pes 31]

Sapos yu gat stretpela tingting long wok bilong autim tok, dispela bai helpim yu long kisim amamas long dispela wok