Ol Yangpela—Wok Yet Long Kamap Strongpela Kristen Bihain Long Yu Baptais

1. Planti yangpela i bin mekim wanem ol gutpela samting?

LONG olgeta yia, planti tausen yangpela Kristen i save kisim baptais. Yu bin mekim olsem? Sapos olsem, orait ol bratasista bilong yu long kongrigesen i amamas tru long yu, na Jehova tu i amamas long yu! (Prov. 27:11) Tingim olgeta gutpela samting yu bin mekim. Yu bin givim bel tru long stadi long Baibel, na ating yu mekim olsem insait long sampela yia. Yu bin stadi na dispela i helpim yu long bilip tru olsem Baibel em i Tok Bilong God. Bikpela samting moa em olsem, yu kisim save long Man Bilong Kamapim ol tok bilong Baibel na yu laikim em tru. Pasin laikim bilong yu long Jehova i kamap strong moa na dispela i kirapim yu long dediketim laip bilong yu na kisim baptais olsem wanpela wokman bilong Em. Yu bin mekim nambawan disisen tru!

2. Yumi bai stori long wanem samting long dispela atikol?

² Ating planti samting i bin kamap bilong traim bilip bilong yu taim yu wok long winim ol mak bilong kisim baptais. Tasol taim yu kamap bikpela, yu bai bungim ol nupela traim. Satan bai traim long daunim pasin bilong yu long laikim Jehova na em bai traim long pulim yu long lusim wok bilong Em. (Efe. 4:14) Yu no ken tru larim dispela samting i kamap. Wanem samting i ken helpim yu long stap gut yet long Jehova na inapim tok promis yu mekim taim yu dediket long Em? Yu mas wok yet long kamap strong long bilip—yu mas “taitim bun” na kamap wanpela strongpela Kristen. (Hib. 6:1) Tasol hau yu inap mekim olsem?

YU KEN MEKIM WANEM BILONG KAMAP STRONGPELA KRISTEN?

3. Olgeta Kristen i mas mekim wanem bihain long ol i kisim baptais?

³ Bihain long yumi kisim baptais, yumi olgeta i mas bihainim edvais em aposel Pol i givim long ol wanbilip long Efesus. Em i strongim ol long kamap olsem “man i bikpela pinis” long sait bilong bilip. (Efe. 4:13) I olsem em i tokim ol, ‘Wok yet long kamap strong long bilip.’ Pol i tok taim yumi kamap strong long bilip, dispela i wankain long taim wanpela liklik pikinini i kamap bikpela. Ol papamama i save amamas tru long nupela bebi bilong ol na ol i laikim em tru. Tasol dispela bebi bai i no inap stap pikinini inap oltaim, nogat. Bihain em bai lusim “ol pasin bilong pikinini.” (1 Kor. 13:11) Dispela i wankain tu long ol Kristen. Bihain long yumi kisim baptais, yumi mas wok yet long kamap strongpela Kristen. Yumi ken skelim sampela samting yumi ken mekim bilong helpim yumi long kamap strong long bilip.

4. Wanem pasin inap helpim yu long kamap strongpela Kristen? Stori long dispela. (Filipai 1:9)

⁴ Mekim pasin laikim bilong yu long Jehova i kamap bikpela moa. Yu laikim tru Jehova. Tasol yu ken strongim dispela pasin bilong yu long laikim em. Hau yu inap mekim olsem? Aposel Pol i stori long wanpela rot bilong mekim olsem, na tok bilong em i stap long Filipai 1:9. (Ritim.) Pol i beten olsem pasin laikim bilong ol Kristen long Filipai “i ken kamap bikpela moa.” So yumi ken mekim pasin laikim bilong yumi i kamap bikpela moa. Yumi ken mekim olsem long rot bilong kisim “stretpela save na pasin bilong kliagut tru long ol samting.” Taim yumi wok long kisim sampela save moa long Jehova, pasin bilong yumi long laikim em na pilim tru ol gutpela pasin bilong em na wei bilong em long mekim ol samting bai kamap strong moa. Yumi bai gat bikpela laik tru long amamasim em, na yumi bai no laik tru long mekim wanpela samting we inap mekim em i bel hevi. Yumi wok hat long save gut long laik bilong em na hau yumi ken mekim laik bilong em.

5-6. Hau yumi ken strongim pasin bilong yumi long laikim Jehova? Stori long dispela.

⁵ Yumi ken strongim pasin bilong yumi long laikim Jehova taim yumi save gut moa long Pikinini bilong em, em man i bihainim gut stret ol pasin bilong Papa bilong em. (Hib. 1:3) Gutpela rot bilong save long Jisas em long stadi long ol tok bilong fopela Gutnius. Sapos yu no kisim yet pasin bilong ritim Baibel long olgeta de, orait yu ting yu inap kirap mekim olsem nau? Taim yu ritim ol stori bilong Jisas, tingim gut ol pasin bilong em. Em isi long ol man i toktok wantaim em; em i amamas long ol pikinini na em i kisim ol na holim ol. (Mak 10:13-16) Ol disaipel bilong em i no pret long em; ol i save tokim em long tingting bilong ol. (Mat. 16:22) Tru tumas, Jisas i bihainim pasin bilong Papa bilong em long heven. Yumi no save pret long toktok wantaim Jehova. Yumi ken toktok wantaim em long rot bilong beten. Taim yumi beten, yumi ken autim olgeta tingting na filings bilong yumi long em. Yumi save olsem em i no inap skelim yumi. Em i laikim yumi na em i save wari long yumi.​—1 Pita 5:7.

⁶ Jisas i sori tru long ol manmeri. Aposel Matyu i tok: “Taim em i lukim bikpela lain manmeri, em i sori tru long ol, long wanem, ol man i bin mekim nogut long ol na ol i stap nogut tru olsem ol sipsip i no gat wasman.” (Mat. 9:36) Na Jehova i pilim olsem wanem? Jisas i tok: “Papa bilong mi long heven i no laik bai wanpela bilong ol dispela man i no gat nem i lus.” (Mat. 18:14) Dispela tok i mekim gut bel bilong yumi! Taim yumi wok long save gut moa long Jisas, pasin bilong yumi long laikim Jehova bai kamap bikpela moa.

7. Taim yu bung wantaim ol bratasista em ol i strongpela Kristen, hau bai dispela i helpim yu?

⁷ Yu ken lain long laikim tru ol narapela na kamap strongpela Kristen taim yu bung wantaim ol bratasista long kongrigesen em ol i strongpela Kristen. Lukim pasin bilong ol long stap amamas. Ol i no rigret long disisen bilong ol long mekim wok bilong Jehova. Askim ol long stori long yu long sampela ekspiriens bilong ol taim ol i mekim wok bilong Jehova. Taim yu gat wanpela bikpela disisen long mekim, askim ol long edvais. Tingim dispela, “long rot bilong planti edvaisa, ol samting i save kamap gutpela.”​—Prov. 11:14.

8. Yu ken mekim wanem sapos yu holim tupela tingting long ol tok Baibel i mekim?

⁸ Daunim pasin bilong holim tupela tingting. Olsem yumi bin stori pinis long paragraf 2, Satan bai traim long pasim yu long kamap strong long bilip. Wanpela rot em inap mekim olsem em long kirapim yu long kisim tupela tingting long sampela bikpela tok bilong Baibel. Olsem, sampela inap mekim ol tok bilong mekim yu ting olsem God i no wokim yumi na yumi kamap long rot bilong evolusen. Ating yu no tingim tumas dispela samting taim yu liklik pikinini, tasol nau yu bikpela na yu stap long skul, olsem na yu bai harim ol tisa i stori long dispela topik. Bai i luk olsem ol tok ol i mekim bilong sapotim evolusen em i tru na i gat evidens i pruvim dispela. Tasol ating ol yet i no lusim sampela haptaim long skelim gut ol evidens i soim olsem i gat Krieta i stap. Tingim stiatok long Provep 18:17, em i tok: “Fes man long kamapim keis bilong em long kot, i luk olsem keis bilong em i stret, inap long narapela man i kam na kwestenim em long kliaim dispela keis.” Yu no ken bilipim nating ol tok em tisa i skulim yu long en, skelim gut ol tok i tru i stap long Tok Bilong God, em Baibel. Mekim wok painimaut long ol pablikesen bilong yumi. Toktok wantaim ol bratasista em pastaim ol i bilip long evolusen. Askim ol long risen na ol i bilip tru olsem i gat Krieta i stap husat i laikim yumi tru. Taim yu stori gut wantaim ol bratasista long ol dispela samting, dispela bai helpim yu long kisim save long ol evidens i soim olsem i gat Krieta i stap.

9. Yu kisim wanem skul long ekspiriens bilong Melissa?

⁹ Wanpela sista, em nem bilong em Melissa, i bin kisim bikpela helpim tru taim em i mekim wok painimaut long topik bilong kriesen.b Em i tok: “Long skul, ol tisa i stori long evolusen long pasin we i kirapim ol sumatin long bilipim ol tok ol i mekim. Pastaim mi pret long skelim ol tingting mi gat. Mi ting nogut mi mekim ol wok painimaut na dispela i pruvim olsem evolusen em i tru. Tasol mi luksave olsem Jehova i laik bai yumi mas kliagut long ol evidens i sapotim ol bilip bilong yumi. So mi mekim wok painimaut. Mi ritim buk Is There a Creator Who Cares About You? na ol buklet Was Life Created? na The Origin of Life—Five Questions Worth Asking. Dispela i bin helpim mi tru. Mi ting i gutpela sapos mi bin mekim olsem long pastaim.”

10-11. Wanem samting i ken helpim yu long bihainim yet klinpela pasin? (1 Tesalonaika 4:3, 4)

¹⁰ Sakim ol pasin nogut. Taim yu tineja, laik bilong mekim maritpasin bai i strong tru, na ating ol narapela bai traim long pulim yu long mekim pasin pamuk. Satan i laik bai yu bihainim ol laik nogut bilong bodi. Wanem samting i ken helpim yu long bihainim yet klinpela pasin? (Ritim 1 Tesalonaika 4:3, 4.) Long ol beten bilong yu yet, tokim Jehova long yu pilim olsem wanem. Tokim em long samting yu pilim insait tru long bel, na askim em long strongim yu. (Mat. 6:13) Tingim olsem Jehova i laik helpim yu, na em i no laik panisim yu. (Sng. 103:13, 14) Na tu, yu ken kisim helpim long Tok Bilong God. Melissa em yumi bin stori pinis long em, em i save pilim hatwok long sakim ol tingting i doti. Em i tok: “Mi ritim Baibel long olgeta de na dispela i strongim mi long no ken givap. Baibel ritim i helpim mi long tingim olsem mi bilong Jehova na mi laik yusim laip bilong mi long mekim wok bilong em.”​—Sng. 119:9.

¹¹ No ken traim long stretim ol hevi long strong bilong yu yet, nogat. Toktok wantaim papamama bilong yu long ol samting yu pilim hatwok long en. Em i no isi long stori wantaim ol long ol tingting na laik bilong yu, tasol em i bikpela samting long yu mas mekim olsem. Melissa i tok: “Mi beten long mi ken strongim bel na bihain mi toktok wantaim papa long hevi bilong mi. Bihain long mi mekim olsem, mi kisim bikpela bel isi. Mi save olsem Jehova i amamas long mi.”

12. Olsem wanem yu inap mekim ol gutpela disisen?

¹² Larim ol stiatok bilong Baibel i stiaim yu. Taim yu wok long kamap bikpela, isi isi papamama bai larim yu mekim ol disisen bilong yu yet. Tasol i gat planti samting em yu no save yet long en. Hau yu inap abrusim pasin bilong mekim wanpela rong we inap bagarapim pasin pren bilong yu wantaim Jehova? (Prov. 22:3) Wanpela sista nem bilong em Kari, em i stori long samting i bin helpim em long mekim ol gutpela disisen. Em i luksave olsem i no gat wok long ol strongpela Kristen i mas putim ol liklik liklik lo bilong bosim olgeta samting ol i mekim long laip bilong ol. Em i tok: “Mi mas kliagut tu long ol stiatok bilong Baibel, na i no ol lo tasol.” Taim yu ritim Baibel, askim yu yet: ‘Dispela hap bilong Baibel i tokim mi long wanem samting long tingting bilong Jehova? Em i kamapim ol stiatok em mi ken yusim bilong stiaim pasin bilong mi? Sapos olsem, mi inap kisim wanem helpim taim mi bihainim ol dispela stiatok?’ (Sng. 19:7; Ais. 48:17, 18) Taim yu ritim Baibel na tingim tingim ol stiatok bilong en, em bai isi moa long yu mekim ol disisen i amamasim Jehova. Taim yu wok long kamap strongpela Kristen, yu bai luksave olsem yu no nidim ol lo bilong bosim olgeta liklik samting i kamap long laip bilong yu bikos yu kliagut long tingting bilong Jehova long ol samting.

13. Olsem wanem ol gutpela pren inap helpim yu? (Provep 13:20)

¹³ Kisim ol pren husat i laikim Jehova. Olsem yumi stori pinis long en, ol pren yu makim bai helpim yu long kamap strongpela Kristen. (Ritim Provep 13:20.) Wanpela sista, nem bilong em Sara, i pilim olsem em i no stap amamas moa. Tasol wanpela samting i kamap na dispela i helpim em long kisim bek amamas bilong em. Sara i tok: “Mi kisim ol gutpela pren long taim stret. Mi na wanpela yangpela sista i save bung long olgeta wik bilong stadi long Wastaua. Narapela pren i helpim mi long stat long bekim tok long ol miting. Ol pren bilong mi i helpim mi, na dispela i kirapim mi long tingim pesenel stadi na beten olsem bikpela samting tru. Mi stat long kisim pasin bilong pas gut moa wantaim Jehova, na mi kisim bek amamas bilong mi.”

14. Hau na John i bin kisim ol gutpela pren?

¹⁴ Olsem wanem yu inap kamap pren bilong ol lain em ol bai helpim yu? John em wanpela elda long nau, na em i tok: “Taim mi yangpela man, mi kisim ol gutpela pren taim mi autim tok wantaim ol. Ol i givim bel tru long autim tok, na ol i helpim mi long luksave olsem yumi inap kisim bikpela amamas long wok autim tok bilong yumi. Olsem na mi putim mak long insait long wok autim tok fultaim. Mi luksave tu olsem mi no gat planti gutpela pren bikos mi wok long painim ol pren namel long ol wankrismas bilong mi tasol. Bihain mi kisim tu ol gutpela pren long Betel. Eksampel bilong ol i helpim mi long mekim gutpela disisen long sait bilong makim ol amamas, na dispela i helpim mi long go klostu moa long Jehova.”

15. Pol i mekim wanem tok lukaut long Timoti long pasin bilong kisim ol pren? (2 Timoti 2:20-22)

¹⁵ Yu ken mekim wanem sapos yu luksave olsem wanpela insait long kongrigesen bai i no stap olsem gutpela pren? Pol i save olsem sampela Kristen long kongrigesen long taim bilong ol aposel i no stap gut long sait bilong bilip, so em i mekim tok lukaut long Timoti long stap longwe long ol. (Ritim 2 Timoti 2:20-22.) Pasin pren bilong yumi wantaim Jehova em samting i dia tumas. Yumi no ken larim wanpela i bagarapim pasin pren bilong yumi wantaim Papa bilong yumi long heven, em pasin pren yumi bin wok hat tru long kisim.​—Sng. 26:4.   

PUTIM OL MAK BILONG HELPIM YU LONG KAMAP STRONGPELA KRISTEN

16. Yu ken putim wanem ol mak?

¹⁶ Putim ol gutpela mak. Putim ol mak we bai strongim bilip bilong yu na helpim yu long kamap strongpela Kristen. (Efe. 3:16) Olsem, ating yu putim mak long mekim pesenel stadi na ritim Baibel long olgeta taim. (Sng. 1:2, 3) O ating yu putim mak long beten planti taim moa na long autim olgeta tingting i stap long bel bilong yu taim yu beten. O ating yu putim mak long wok strong long kisim pasin bilong bosim gut bel taim yu laik makim ol amamas o hau yu yusim taim bilong yu. (Efe. 5:15, 16) Taim Jehova i lukim olsem yu wok hat tru long mekim ol samting bilong kamap strongpela Kristen, em bai amamas tru.

17. Yu bai pilim olsem wanem taim yu helpim ol narapela?

¹⁷ Yu bai kamap strongpela Kristen taim yu helpim ol narapela. Jisas i tok: “Amamas bilong givim samting i winim amamas bilong kisim samting.” (Apo. 20:35) Yu bai amamas tru sapos yu yusim taim na strong bilong yu olsem wanpela yangpela long helpim ol narapela. Olsem, yu ken putim mak long helpim ol lapun na ol lain i gat sik em ol i stap long kongrigesen bilong yu. Ating yu ken go long stua na baim kaikai bilong ol o helpim ol long lain gut long yusim mobail fon na teblet samting. Sapos yu wanpela brata, orait yu ken putim mak long kamap wanpela kongrigesen sevan na bai yu inap helpim ol bratasista bilong yu. (Fili. 2:4) Na tu, yu soim pasin laikim long ol lain em ol i no wanbilip taim yu autim gutnius bilong Kingdom long ol. (Mat. 9:36, 37) Na sapos rot i op, putim mak long mekim wok bilong Jehova fultaim.

18. Taim yu mekim wok bilong Jehova fultaim, hau bai dispela i helpim yu long kamap strongpela Kristen?

¹⁸ Taim yu mekim wok bilong Jehova fultaim, bai i gat planti rot long yu inap kamap wanpela strongpela Kristen. Taim yu mekim wok painia, dispela inap opim rot long yu long go long Skul Bilong Ol Kingdom Evanselis. Ating yu ken wok long Betel o insait long ol konstraksen projek bilong sanapim ol Haus Kingdom samting. Kaitlyn em wanpela yangpela sista i mekim wok painia, em i tok: “Mi lusim bikpela haptaim long autim tok wantaim ol bratasista i gat ekspiriens, na dispela em samting i bin helpim mi tru long kamap strong long bilip bihain long mi baptais. Eksampel bilong ol i kirapim mi long stadi gut long Baibel na mekim wok tisa bilong mi i kamap gutpela moa.”

19. Yu bai kisim wanem ol blesing taim yu wok long kamap strongpela Kristen?

¹⁹ Taim yu wok long kamap wanpela strongpela Kristen, yu bai kisim planti blesing. Yu no inap yusim strong yu gat olsem wanpela yangpela long mekim ol samting i no gat as bilong en. (1 Jon 2:17) Yu bai abrusim bel hevi em yu bai pilim sapos yu bin mekim ol disisen nogut. Na olgeta samting yu mekim bai kamap gutpela na yu bai stap amamas tru. (Prov. 16:3) Gutpela eksampel bilong yu bai strongim ol wanbilip bilong yu, em ol yangpela na ol lapun tu. (1 Tim. 4:12) Na bikpela samting moa, yu bai stap bel isi na amamas tru bikos yu amamasim Jehova na yu pas gut tru wantaim em.​—Prov. 23:15, 16.