Stap Strong Long Ol Samting Bilong Spirit
Namba 1 Hap
1 Ripot bilong wok bilong ol Witnes Bilong Jehova long 1991 i makim olsem 10,650,158 i bin kam long bung bilong Memorial long 1991, na dispela i winim yia i go pinis inap 7 pesen. Ol brata i bin mekim planti Baibel-stadi moa, winim yia i go pinis inap 8.9 pesen. Planti bilong ol dispela nupela man i save kam long ol miting na kibung bilong yumi. Tasol i mas i gat man bilong helpim ol wan wan bambai ol inap kamap strong long ol samting bilong spirit, na sanap strong long ol hevi na traim i painim ol man nau long las taim. Ol Kristen i dediket pinis i mas i stap strong long ol samting bilong spirit bambai ol inap helpim ol dispela nupela man na ol man i kamap pablisa pinis, tasol ol i no strong yet. (Ro 15:1, 2) Bilong lukautim gut ol dispela lain, Jehova i save lainim yumi na givim skul long yumi.—1 Pi 5:8-11.
2 Long ol mun i laik kamap nau, Sosaiti bai kamapim planti tok bilong helpim yumi long save, i bikpela samting long yumi yet yumi mas stadi, na famili olgeta i mas stadi wantaim. Long olgeta wik i gat 5-pela miting bilong kongrigesen na long dispela rot Sosaiti i helpim yumi yet long stadi—yumi ken redim ol tok bilong ol dispela miting. Gutpela sapos yumi olgeta i kaunim na tingim teks bilong de, na kaunim hap bilong Baibel em sedyul bilong Skul i makim bilong kaunim long olgeta wik, na redim ol tok bilong Buk-Stadi na Stadi Wastaua. Tasol i no dispela tasol.
3 Sosaiti i bin kirapim olgeta wan wan famili Kristen long mekim famili-stadi long olgeta wik, na mekim wok long ol buk em Sosaiti i bin wokim. Tingim wanem ol tok long wanpela buk inap helpim gut famili, na stadi long dispela long famili-stadi. Dispela bai helpim famili long bilip olsem Jehova bai strongim ol long mekim wok autim tok na bai ol i stap amamas, maski kain kain traim i painim ol.—Je 1:2, 3; 1 Pi 4:11.
Wok Strong Long Stap Klin na Bai Ol Man i No Ken Lukim Sampela Rong Long Yumi
Namba 2 Hap
1 Longtaim pinis yumi bin i stap long taim bilong las de! Satan i save em i gat sotpela taim tasol. Olsem na em i wok strong long pulim olgeta manmeri na bai ol i givim baksait long Jehova na Kingdom bilong em. Long yia bilong wok bilong 1991, ol kongrigesen i bin rausim planti manmeri, long wanem, ol i bin mekim pasin i no stret. Man i mekim rong, maski em bikpela o liklik rong, dispela i pasim wok bilong autim tok bilong Kingdom.
2 Sampela ol i no laik stadi na go long ol miting—ol i les long mekim. Yu ting ol inap stap strong na wok strong moa long autim tok na sakim ol traim i laik pulim ol long mekim pasin nogut? (Lu 13:24; Ef 6:13) Planti tausen manmeri i bin givim baksait long ol samting Jehova i save givim long yumi bilong helpim yumi long i stap strong long spirit, na ol i lusim lain bilong Jehova o givim baksait long tok i tru na ol i kirap bihainim pasin nogut bilong dispela graun.—Hi 2:1; 2 Pi 2:20-22.
3 Pasin bilong dispela graun i wok long go nogut moa yet, na lain bilong Jehova i mas was gut bambai pasin bilong graun i no ken mekim ol i kamap doti—ol i mas i stap klin long skin, na long tingting, na long ol samting bilong spirit, na long pasin bilong ol, na long olgeta narapela samting. (2 Ko 7:1) Olsem na ol man i go pas long autim tok ol i mas tingting gut long bihainim gutpela pasin ol narapela i ken lukim na bihainim.—1 Ti 4:12; 1 Pi 5:2, 3.
4 Sampela taim ating ol wasman i lukim sampela brata sista long kongrigesen i bikhet liklik o ol i laik mekim pasin i no stret, o ol i insait long wanpela pasin bilong graun. Sapos olsem, orait kwiktaim ol wasman i mas givim sampela gutpela tok na tingting long ol, na ol i mas stretim ol man i save les nabaut, nogut ol dispela brata sista i mekim rong. (Snd 19:20; 1 Te 5:14) Tasol sapos sampela i mekim rong pinis, orait ol wasman i mas bihainim tok bilong Galesia 6:1. Ol i mas beten askim God long helpim ol long ol hevi samting i kamap insait long kongrigesen, na ol i no ken surik long givim gutpela tok long pasin isi long ol brata bilong helpim ol long abrusim rong.—Ais 32:2.
[Questions for Part 1]
1. (a) Wanem samting i makim olsem, long olgeta hap i gat planti nupela man i kam long ol miting bilong yumi? (b) Bilong wanem i bikpela samting long yumi mas helpim ol dispela nupela man wan wan? (c) Kaunim Rom 15:1, 2. Ol Kristen i dediket pinis i gat wanem wok? (d) Kaunim 1 Pita 5:8-11. Yumi ken wetim Jehova i mekim wanem, olsem em i promis pinis?
2, 3. (a) Long rot bilong Sosaiti, Jehova i bin kamapim wanem ol samting bilong helpim yumi yet long stadi? (b) Bilong wanem i gutpela sapos olgeta wan wan famili Kristen i mekim famili-stadi? (c) Sampela taim ating i hatwok liklik long bihainim olgeta dispela gutpela tok, tasol Jems 1:2, 3 i strongim yumi olsem wanem?
[Questions for Part 2]
1. Satan i bin wok long mekim wanem bilong pasim wok bilong autim tok bilong Kingdom?
2. Wanem samting i mekim na planti ol i lusim lain bilong Jehova o givim baksait long tok i tru?
3. (a) Wanem gutpela tok i stap long 2 Korin 7:1? (b) Ol man i go pas long autim tok, ol i mas tingting gut long mekim wanem?
4. Long wanem kain taim i gutpela long ol wasman i givim gutpela tok o tingting long brata o sista bilong stretim pasin bilong em?