“Yupela Mas i Stap Klin”!
“Yupela i mas lusim dispela hap, na i go i stap long narapela hap. Na yupela i no ken holim samting i doti. Klia long em, yupela ol man i karim samting bilong haus lotu bilong Jehova, yupela mas i stap klin.”—AISAIA 52:11, NW.
1, 2. (a) I gat wanem samting na yumi save planti manmeri ol i laik long i stap klin? (b) Bilong wanem yumi mas i stap klin long skin?
OL MAN bilong dispela graun i save tok, ‘Pasin bilong i stap klin em i olsem pasin bilong God.’ Na tru tumas, yumi save laikim pasin bilong i stap klin long skin, a? Olsem na long ol stua i gat planti kain kain sop samting, na ol man i save wasim laplap bilong ol na klinim haus samting bilong ol. Sapos yu go long wanpela haus kaikai na laplap long tebol i doti, na ol plet i doti, na man i laik givim kaikai long yu em i pasim klos i doti, ating bai yu no laik kisim kaikai, a? Tru tumas, yumi no save laikim samting i doti.
2 Yumi laikim samting i klinpela, long wanem em i luk nais. Tasol i no dispela samting tasol. Nogat. Yumi save ol samting i doti i save kamapim kain kain sik. Sampela dokta i tok, ol man bilong nau i save stap longtaim liklik, winim ol man bilong bipo, long wanem nau ol man i save long pasin bilong i stap klin. Na sampela man i gat bikpela save long olsem wanem ol diwai samting na ol animal i wok wantaim na narapela i helpim narapela long i stap laip, ol dispela man i tok pasin bilong tromoi pipia samting i laik bagarapim dispela graun, na ating liklik taim bai yumi no inap i stap laip moa long en.
Jehova Wantaim Lain Bilong Em i Holi na i Klin
3, 4. (a) God Jehova i ting olsem wanem long ol manmeri i no klin long spirit? (b) God Jehova em i holi, olsem na em i tok lain bilong em ol i mas i stap olsem wanem?
3 Planti manmeri i save tingim pasin bilong i stap klin long skin em i bikpela samting. Tasol pasin bilong i stap klin long spirit em i bikpela samting moa. Sapos yumi stap doti long spirit, God Jehova i no ken laikim yumi. Dispela samting i semim nem bilong em na i sakim ol stretpela lo bilong em. I olsem yumi no stap gut long Em. Sapos yumi bihainim tok i no stret o pasin i no stret, yumi no stap klin long spirit, na dispela samting i save brukim lain na bagarapim bilip, na i save paulim tingting bilong ol man na bringim ol i go bilong i dai. Olsem na Jehova i no laikim tru dispela pasin! Em tasol na em i givim strongpela tok long lain bilong em long bipo, em lain Isrel, na em i tok: “Mi stap holi. Olsem na yupela tu i mas i stap holi.” (Levitikas 11:44, 45, NW) Long dispela as tasol na God i tok lain bilong em long bipo ol i mas i stap Min long spirit. Tok God i givim long ol i stret long Ol Witnes Bilong Jehova long nau tu. Taim ol Isrel i laik lusim Babilon na go bek long Jerusalem, ol i karim ol samting bilong haus lotu bilong Jehova i go wantaim ol, na Jehova i tokim ol: “Yupela i mas lusim dispela hap, na i go i stap long narapela hap. Na yupela i no ken holim samting i doti. Klia long em, yupela ol man i karim samting bilong haus lotu bilong Jehova, yupela mas i stap klin.”—Aisaia 52:11, NW.
4 God Jehova i tok, yumi ol witnes bilong em yumi mas i stap klin, olsem holi na stret. Long wanem Jehova yet em i stap olsem, a? Planti taim Baibel i kolim Jehova, olsem “God Holi bilong … Isrel”! (Aisaia 12:6, NW; 29:19; 41:14; Jeremaia 51:5) Na Revelesen 4:8 i tok stret, olsem: “Bikpela, God I Gat Olgeta Strong, em i holi, em i holi, em i holi.”
5. (a) Olsem wanem long Krais Jisas, ol stretpela ensel, spirit bilong God, Tok bilong God, na pasin bilong i stap holi? (b) Olsem na God Jehova i putim wanem lo long ol wokboi bilong em hia long graun?
5 Pikinini bilong God, Krais Jisas, em i holi, em i “man bilong [God] stret.” (Jon 6:69) Na Baibel i kolim ol wokman bilong God long heven, olsem “ol ensel holi.” (Mak 8:38) Na strong bilong God bilong mekim wok, em spirit holi bilong em, a? Na Tok bilong God o Baibel, em i “Buk Holi.” (2 Timoti 3:15) Olsem na yumi Ol Witnes Bilong Jehova, yumi tu yumi mas i stap klin o holi, olsem 1 Pita 1:15, 16 i tok: “God i singautim yupela pinis, em i holi. Olsem na yupela tu i mas i stap holi long olgeta wokabaut bilong yupela. Baibel i tok olsem: ‘Mi stap holi. Olsem na yupela tu i mas i stap holi.’”
6. (a) Olsem wanem ol Kristen i kamap klin long pastaim? (b) Bilong wanem i bikpela samting lain bilong Jehova ol i mas i stap holi na klin?
6 Yumi tanim bel na yumi baut na bilip long blut bilong Krais Jisas, olsem na yumi kamap klin long ai bilong God. (1 Korin 6:11; Revelesen 7:14) Oltaim yumi mas wok long i stap klin bambai yumi ken i stap gutpela long ai bilong God. (Sam 15:1, 2) Na yumi mas i stap klin bambai yumi inap helpim olgeta man ol i laikim tumas tok i tru na stretpela pasin na ol i hevi long ol pasin nogut na pasin doti ol i lukim long graun. (Esikiel 9:4) Na yumi mas i stap holi na klin bambai yumi no pundaunim ol wanlotu bilong yumi. Pol i kirapim tingting bilong ol Kristen long Filipai, em i tok: “Oltaim mi save prea olsem: Sori bilong yupela em i mas mekim planti save na olgeta gutpela tingting i kamap bikpela moa yet long yupela, bai yupela i ken skelim gut olgeta pasin. Olsem na long De bilong Krais bai yupela i stap klin na stret.”—Filipai 1:9, 10; lukim tu Matyu 18:6.
Seten i Kalabusim Ol
7, 8. (a) Olsem wanem na yumi save, sampela wokboi bilong God ol i no bin i stap klin? (b) Olsem na yumi mas tingim gut wanem tok save?
7 Tasol sori tru, sampela brata bipo ol i bung wantaim yumi, ol i no i stap klin na holi. Olsem na kongrigesen Kristen i bin rausim ol. I gat as long Baibel na kongrigesen i mekim olsem. Na kongrigesen i givim strongpela tok na stretim sampela, em ol i no bihainim ol tok bilong Baibel em i bilong stiaim tingting bilong yumi. Sampela pikinini bilong ol elda o wokman bilong kongrigesen, ol i raus o kongrigesen i bin stretim ol.
8 Seten i kalabusim ol. Ol i laik karim samting bilong Jehova, tasol ol i no wok long i stap klin long spirit. Ol i sakim tok bilong Aisaia 52:11, olsem na ol i no inap abrusim strafe. (Lukim Jop 9:1-4.) Em bikpela samting yumi mas tingim gut toksave i stap long 1 Korin 10:12 i tok: “Olsem na man i tingim em yet i sanap strong, em i mas lukaut gut. Nogut em i pundaun”!
Bilong Wanem i Hatwok?
9. (a) I hatwok long i stap klin long spirit, long wanem i gat wanem tripela samting i olsem birua bilong yumi? (b) Olsem wanem Seten na ol spirit nogut inap pundaunim ol Kristen?
9 Bilong wanem i hatwok long i stap klin long spirit? Long wanem i gat tripela strongpela samting i birua long yumi, em Seten na ol spirit nogut, wantaim lain bilong em long graun, na ol laik nogut bilong skin bilong yumi yet. Orait, tingim Seten na ol spirit nogut, ol i spirit doti, a? Tru tumas! Baibel i kolim ol olsem “ol spirit nogut.”—Matyu 10:1.
10, 11. Olsem wanem long lain bilong Seten long graun na i hatwok long ol Kristen i stap klin na mekim wok bilong God?
10 Na tingim lain bilong Seten long graun, ol tu olsem wanpela birua bilong yumi. Olgeta lotu Seten i bin kamapim bilong bosim olgeta hap bilong graun, ol i no klin long spirit. Na Seten i stap het bilong ol narapela man bilong dispela graun tu. (1 Jon 5:19; Revelesen 16:13; 17:4; 18:2) Ol samting yumi mekim bilong lotu long God, sapos yumi laik bai God i amamas long dispela, orait, yumi mas “lukautim gut wokabaut bilong yumi, na pasin bilong dispela graun em i no ken mekim doti bel bilong yumi.”—Jems 1:27.
11 Planti samting yumi lukim long ol niuspepa, na ol nius, na long televisen o video, na long ol piksa wokabaut i no klin. Long nau planti piksa long televisen i kamapim ol pasin i no klin, na long olgeta taim dispela samting i wok long i go moa nogut. Bipo wan wan piksa wokabaut i kamapim pasin doti, tasol nau klostu olgeta piksa wokabaut i kamapim. Na ol nius i gat ol piksa doti bilong pasin i gat sem, dispela kain nius i kamap planti tru. Tru tumas, yumi stap long “las taim” na “planti hevi nogut tru i kamap.”—2 Timoti 3:1-5.
12. I gat wanem samting long skin bilong ol Kristen yet na i hatwok long ol i stap holi na klin?
12 Na narapela samting i save mekim na i hatwok long yumi stap klin, em olsem: Ol laik nogut bilong skin bilong yumi yet. (Jenesis 8:21; Rom 5:12) Olsem na yumi olgeta i gat pait, na yumi mas wok strong bambai yumi inap i stap klin na karim ol samting bilong Jehova. (Rom 7:13-25) Tasol wanem samting inap helpim yumi na bai yumi stap holi na klin?
No Laikim Tru Olgeta Pasin Nogut!
13. Wanem wanpela namba wan samting yumi mas mekim bambai yumi inap i stap klin?
13 Wanpela namba wan samting yumi mas mekim bambai yumi inap i stap klin na holi, em olsem: Yumi laikim tumas Jehova, olsem na yumi mas ‘no laikim tru pasin nogut.’ Yumi mas “givim baksait tru long pasin nogut.” (Sam 97:10; Rom 12:9) Maski skin i kirap long laikim samting nogut, tasol yumi mas sakim kwik dispela laik nogut bilong skin. Yumi mas no laik tru long ol pasin nogut na pilim olsem ol dispela pasin i samting nogut tru. Na oltaim yumi mas tingim ol samting nogut inap painim yumi sapos yumi no i stap klin. (Galesia 6:7, 8) Na yumi mas tingim tu ol samting nogut i save painim ol narapela man taim yumi mekim bikpela rong. Na yumi mas no laik tru long pasin nogut, nogut yumi semim nem bilong God bilong yumi, Jehova.
14. (a) Bilong mekim klinpela pasin yumi mas was gut long wanem samting? (b) Ol sista i gat wanem wok long dispela samting?
14 Bilong i stap klin yumi mas was gut long tingting bilong yumi. Sapos tingting bilong mekim pasin pamuk o narapela pasin olsem em i kamap long bel bilong yumi, kwiktaim yumi mas rausim. Man i no ken tok gris wantaim meri em i no marit long em, na ol meri tu i no ken mekim. Yumi mas bihainim tok bilong Pol long 1 Timoti 5:1, 2. Ol man Kristen i mas tingim ol lapun sista i olsem mama bilong ol, na ol yangpela sista i olsem susa bilong ol, na ol i mas mekim klinpela pasin tru. Na ol sista long kongrigesen tu i gat wok long dispela samting. Ol i mas “putim gutpela klos samting, inap tasol long ol. Ol i no ken hambak long bilasim gras na skin.” (1 Timoti 2:9, 10) Taim meri i lukim skin bilong em long glas, em inap save em i pasim gutpela klos i stret long meri Kristen o dispela klos i bilong pulim ai bilong ol man. Ol meri bilong dispela graun i save pasim klos bilong pulim ai bilong ol man na kirapim bel bilong ol, tasol ol meri Kristen i no ken mekim olsem.—Maika 6:8.
15. Yumi mas mekim wanem bambai yumi inap long i stap klin?
15 Yumi mas no laikim tru pasin nogut bambai yumi inap i stap klin na holi, tasol dispela samting tasol i no inap. Oltaim yumi mas wok long tingim ol samting bilong spirit. (Matyu 5:3) Yumi mas lainim tok bilong Jehova long olgeta taim! Em bikpela samting long yumi ol man i laikim tumas Jehova. (Sam 119:105-112) Yumi mas bihainim gutpela tok i stap long Filipai 4:8 na tingim ol samting i klinpela na i save strongim bilip bilong yumi. Gutpela sapos yumi wok long putim ol tok bilong sampela ves bilong Baibel i stap long tingting bilong yumi na ol tok bilong singsing bilong Kingdom. Na taim yumi malolo, o long nait, taim yumi no inap slip, ol dispela gutpela tok bai kamap long tingting bilong yumi.—Sam 63:6; 77:6.
16. Bung wantaim ol brata, olsem wanem dispela samting inap helpim yumi long i stap klin
16 Sapos yumi tingim gut ol samting bilong spirit, oltaim bai yumi go long ol miting bilong kongrigesen, bambai yumi inap kirapim ol narapela brata long mekim ol gutpela wok na mekim pasin sori. (Hibru 10:23-25) Sapos yumi poroman wantaim ol man nogut, dispela samting inap mekim yumi i kamap doti, na olsem tasol sapos yumi poroman wantaim ol gutpela man, dispela samting inap helpim yumi long i stap klin long spirit. Taim yumi malolo o yumi laik painim amamas, yumi mas was gut. Nogut yumi mekim wanpela samting na i olsem yumi poroman wantaim ol man nogut, na bai yumi no stap klin long spirit.—1 Korin 15:33.
17. Olsem wanem na beten inap helpim yumi long i stap klin?
17 Na wanpela bikpela samting bilong helpim yumi, em olsem: Beten. Baibel i tok, yumi mas “beten long olgeta taim,” na yumi mas “beten oltaim oltaim.” (Rom 12:12; 1 Tesalonaika 5:17) Nogut yumi no gat taim bilong beten. Oltaim yumi mas beten askim God long givim gutpela tingting long yumi, na strong, na spirit bilong em. Na sapos yumi mekim pasin i stret wantaim ol tok yumi mekim long beten, bai yumi kisim dispela “bel isi God i save givim yumi.” Dispela bel isi bai was gut long bel na long tingting bilong yumi, na dispela samting bai helpim yumi long i stap klin na holi.—Filipai 4:6, 7.
18. Sapos yumi wok strong long mekim wok bilong Jehova, olsem wanem dispela samting inap helpim yumi?
18 Sapos yumi wok strong long mekim wok bilong Jehova na autim tok bilong Kingdom, dispela samting tu inap helpim yumi long i stap klin na holi. Sampela i bin mekim pasin nogut ol i mekim taim ol i malolo o ol i go lip samting. Na samting King Devit i mekim inap lainim yumi! Long kirap bilong yia ol king i save go long pait, tasol Devit em i no i go. Em i stap long haus na malolo na wanem samting i kamap? Em i trabel wantaim Batsiba. (2 Samyuel 11:1-4) Olsem na olgeta taim yumi mas was gut bambai yumi inap i stap klin na karim ol samting bilong Jehova.
19. Olsem wanem na bosim skin em bikpela samting bambai yumi ken stap klin?
19 Na yumi mas bosim gut skin bambai God Jehova i ken larim yumi i karim yet ol samting bilong em. (Galesia 5:22, 23; 1 Korin 9:27) Yumi mas bosim gut tingting bilong yumi na was gut long bel bilong long yumi. Yumi mas sakim olgeta samting i laik traim yumi na yumi no ken tingting long ol samting i doti. Olsem Krais Jisas i tok piksa, sapos ai bilong yumi i laik mekim yumi i pundaun long sin, yumi mas olsem kamautim na tromoi i go, o sapos han o lek bilong yumi i laik mekim yumi pundaun long sin, yumi mas katim na rausim. (Mak 9:43-48) Pol i givim gutpela tok long yumi long dispela samting long Efesas 4:29-5:5.
20, 21. (a) Sapos yumi laikim tru God Jehova, dispela samting i gat wanem wok bilong helpim yumi long i stap klin? (b) Sapos yumi laikim tru ol brata na ol narapela man, olsem wanem dispela samting inap helpim yumi long i stap klin long spirit?
20 Na sapos yumi givim bel tru long Jehova, dispela samting bai helpim yumi yumi long stap klin Olsem wanem? Yumi laikim tumas Jehova Yumi pilim tru olgeta samting em i bin mekim helpim yumi? Yumi tingting strong long wokabaut wantaim em ol bilipman bilong bipo? (Jenesis 5:24; 6:9) Sapos olsem, orait bai yumi givim bel tru long God Jehova na bai yumi stap gut long Em, na dispela samting bai stap holi o klin. Tru tumas, sapos yumi givim bel olgeta na laip olgeta na tingting olgeta na strong olgeta long yumi long Jehova, bai yumi pret long mekim pasin em i no laikim. Olsem na yumi ol manmeri i laikim tumas Jehova, yumi no ken surik, na yumi no ken larim pasin bilong dispela graun o laik nogut bilong skin bilong yumi yet i mekim doti bel bilong yumi.—Mak 12:29, 30; Hibru 10:38, 39.
21 Wanpela samting em inap helpim tru yumi na bai yumi stap klin, em olsem: Yumi mas laikim tru ol brata. Sapos yumi tingim tru ol brata na yumi laik helpim ol long ol samting bilong spirit bai yumi was gut long ol samting yumi mekim. Nogut yumi mekim sampela tok doti, o yumi tok gris wantaim man o meri i no poroman bilong yumi o yumi mekim pasin doti, na bel bilong ol brata i gat tok long dispela na ol i pilim olsem ol tu i doti. Yu no ken lusim tingting long dispela samting, olsem: Man i givim bel bilong em long ol narapela man, em i “no save amamas long pasin i no stret.” (1 Korin 13:4, 6) Sapos yumi laikim tru God na ol narapela man, bai yumi no mekim dispela kain sin. Bai yumi bosim gut skin na “wokabaut stret.”—Hibru 12:13.
22, 23. Sapos yumi stap klin bai yumi kisim wanem ol gutpela pe?
22 Yumi ol manmeri i karim samting holi bilong Jehova, sapos yumi stap klin bai yumi kisim wanem gutpela pe? Bai bel bilong yumi ‘i stap klin.’ (1 Timoti 1:5) Na bai bel bilong yumi i stap isi. Sapos yumi stap klin long spirit, bai bel bilong yumi i stap isi; bel i no ken kotim yumi na bai yumi stap bel hevi na yumi no inap slip long nait na yumi pret, nogut ol man i save long pasin nogut yumi bin mekim. Tru tumas, sapos oltaim yumi stap klin, yumi no ken giaman na haitim sampela pasin yumi bin mekim. Dispela kain pasin i no ken kalabusim yumi; bai yumi stap fri. Em gutpela pe tru.
23 Sapos yumi stap klin, narapela gutpela pe yumi kisim em olsem: Yumi stap gut wantaim ol brata bilong yumi na famili bilong yumi na ol man bilong ausait. Yumi no mekim wanpela samting i pundaunim ol, olsem na bel bilong yumi i no gat tok. Na taim yumi stap klin, yumi inap givim bel bilong yumi long ol brata na dispela samting i helpim ol long kamap strong. (1 Korin 8:1) Na bai yumi kisim bikpela amamas bilong man i givim samting long narapela man.—Aposel 20:35.
24. I gat wanem nambawan bikpela samting na yumi ol manmeri bilong Jehova yumi laik i stap klin?
24 Na bikpela samting tru em olsem: Taim yumi stap klin yumi mekim bel bilong Papa bilong yumi i amamas, na em inap bekim tok long dispela man i sutim tok long em, em Seten. (Provep 27:11)) Olsem na yumi mas i stap klin bambai yumi litimapim nem bilong God, na strongim ol brata na famili bilong yumi, na bai yumi inap long kisim laip i stap oltaim!
Yu Inap Tingim?
□ Jehova i holi, olsem na em i laik bai lain bilong em i mas i stap olsem wanem?
□ Sampela wokman bilong Jehova i no bin i stap klin, na dispela i kamapim olsem em i bikpela samting long tingim gut wanem tok lukaut aposel Pol i bin mekim?
□ I gat wanem 3-pela samting i gat strong long pulim yumi na dispela i mekim na i hatwok long i stap klin long ai bilong God?
□ Bilong i stap klin, i gat wanem ol samting yumi mas mekim?
□ Olsem wanem pasin bilong wok strong long mekim wok bilong Jehova inap helpim yumi long i stap klin?
□ I gat wanem nambawan bikpela as na yumi mas i stap klin olsem ol manmeri bilong Jehova?