Stadi 9

Ol Wokman Bilong God i Mas i Stap Klin

Bilong wanem yumi mas i stap klin long olgeta samting? (1)

Yumi mas mekim wanem bilong i stap klin long ol samting bilong lotu (2) long ol samting bilong marit? (3) long tingting? (4) long skin? (5)

Yumi mas sakim wanem kain tok nogut? (6)

1. God Jehova em i klin na holi. Em i laik ol man i lotu long em ol i mas i stap klin​—⁠long ol samting bilong lotu, long ol samting bilong marit, long tingting, na long skin. (1 Pita 1:16) Yumi mas taitim bun tru bilong i stap klin long ai bilong God. Long olgeta hap ol man i bihainim pasin doti. Na yumi hatwok tu, long wanem, skin bilong yumi yet i laik pulim yumi long mekim pasin i no stret. Tasol yumi no ken givap.

2. Stap Klin Long Ol Samting Bilong Lotu: Sapos yumi laik mekim wok bilong Jehova yumi no ken holimpas ol bilip na pasin bilong lotu giaman. Yumi mas lusim ol lotu giaman na yumi no ken helpim wok bilong ol liklik. (2 Korin 6:​14-18; KTH 18:⁠4) Taim yumi lain pinis long tok tru bilong God yumi mas was gut, nogut ol man bilong giaman i paulim yumi.​—⁠2 Jon 10, 11.

3. Stap Klin Long Ol Samting Bilong Marit: Jehova i laik ol man i lotuim em i mas bihainim pasin bilong Kristen tru long olgeta taim. (1 Pita 2:12) Em i lukim olgeta samting yumi mekim, maski yumi hait na mekim. (Hibru 4:13) Yumi mas abrusim olkain pasin pamuk na ol narapela pasin doti bilong dispela graun.​—⁠1 Korin 6:​9-11.

4. Stap Klin Long Tingting: Sapos yumi putim ol klinpela samting long tingting, bai yumi bihainim klinpela pasin tu. (Filipai 4:⁠8) Tasol sapos yumi wok long tingim ol samting i no klin, bai yumi mekim pasin nogut. (Matyu 15:​18-20) Yumi mas abrusim ol amamas em inap bagarapim tingting bilong yumi. Bilong putim ol klinpela tok long tingting bilong yumi, yumi mas stadi long Baibel.

5. Stap Klin Long Skin: Ol Kristen i olsem mausman bilong God, olsem na skin na klos bilong ol i mas i stap klin. Taim yumi go long toilet pinis yumi mas wasim han, na taim yumi laik kaikai o redim kaikai yumi mas wasim han. Sapos yu no gat toilet, orait yu mas wokim hul na karamapim pekpek. (Lo 23:​12, 13) Sapos skin bilong yumi i stap klin, bai yumi no sik planti. Haus bilong Kristen i mas i stap klin long insait na long ausait, na ol samting i mas stap stret. Haus i mas i stap olsem gutpela piksa long ai bilong ol man.

6. Klinpela Tok: Ol man i mekim wok bilong God, oltaim ol i mas tok tru. Ol man bilong mekim tok giaman i no inap i go insait long Kingdom Bilong God. (Efesus 4:25; KTH 21:⁠8) Ol Kristen i no save mekim ol tok nogut. Ol i no putim yau o kamapim ol tok pilai nogut o ol stori nogut. Ol i mekim klinpela tok tasol, olsem na ol i stap narapela kain long ples wok, long skul, na long hap ol i sindaun long en.​—⁠Efesus 4:​29, 31; 5:⁠3.

[Ol Piksa long pes 18, 19]

Ol man i mekim wok bilong God ol i mas i stap klin long olgeta samting