Nupela Tul Bilong Helpim Ol Man Long Lain Long Ol Samting God i Laik Yumi Mas Mekim
“EM i tok klia, na i no hatwok long kisim save long tok bilong en, na gutpela tok bilong en bai kamapim planti gutpela samting. Ol i kamapim ol tok long gutpela rot na em i isi long kisim, na dispela bai kirapim ol man i gat laik long kisim save long tok olsem, ‘Tru tumas, God i stap namel long yupela.’ ” (1 Korin 14:25) Wanpela Witnes Bilong Jehova bilong Tailan i bin tok olsem taim em i stori long nupela buklet God i Laik Yumi Mas Mekim Wanem? Sosaiti Was Taua i bin kamapim dispela buklet long “Ol Man Bilong Autim Tok Long Bel Isi God i Givim” Kibung Distrik long 1996-1997.
Ol i wokim dispela buklet i gat 32 pes i gat kala kala olsem wanpela Baibel-stadi kos. Em i kamapim ol bikpela tok bilong Baibel. Tok bilong en i sot na i no hatwok long save long en, na em i kamapim klia ol samting God i laik yumi mas mekim. Man i kaunim em i no hatwok long save long insait bilong ol tok bilong en. Olsem wanem yu ken wokim Baibel-stadi long dispela nupela buklet?
Mekim wok long ol askim. Long kirap bilong olgeta wan wan stadi i gat ol askim. Bihain long olgeta askim i gat namba i makim ol paragraf i bekim dispela askim. Yu ken mekim wok long ol dispela askim long kirap bilong stadi na bilong kolim gen ol tok long pinis bilong stadi bilong skulim gut ol man. Olsem: Long kirap bilong stadi yu ken kamapim ol dispela askim long sumatin na bai em i ken kamapim tingting bilong em. Sapos em i bekim kranki sampela askim, maski long stretim—kirap na mekim stadi. Long pinis bilong stadi, yu ken kamapim gen ol askim na nau yu ken save, sumatin inap bekim stret olsem Baibel i makim, o nogat.
Lukim ol skripsa. Long olgeta stadi i gat ol sotpela tok i kamapim ol tok i tru bilong Baibel na ol skripsa bilong strongim dispela tok. Planti taim buklet i raitim skripsa, tasol ol i no raitim tok bilong en, olsem na em i bikpela samting long kirapim sumatin long lukim ol skripsa long Baibel bilong em yet. Em i mas kaunim na tingim long bel ol tok bilong God bambai em i ken bihainim dispela tok.—Josua 1:8.
Stori long ol piksa. Buklet i gat planti poto na piksa—winim 50. Ol i wokim bambai ol man i ken amamas long lukim, na tu, bilong helpim yumi long skulim ol man. Olsem: Lukim tupela laspela stadi (wan wan stadi i stap long wanpela wanpela pes, tasol taim yu opim buklet yu inap lukim tupela stadi wantaim), nem bilong ol “Helpim Ol Narapela Long Bihainim Laik Bilong God” na “Pasim Tok Long Bel Long Mekim Laik Bilong God.” Ol piksa i stap long dispela tupela pes i makim wanpela man i wok long kamap strong long ol samting bilong spirit; em i autim tok long stua, na long ol haus, na em i dediket, na bihain em i kisim baptais. Taim yu stori wantaim sumatin long ol dispela piksa yu helpim em long save long ol samting em i mas mekim bilong mekim wok bilong God.
Olsem wanem sapos wanpela man i no save gut long rit o em i no inap long rit? Long sampela tok ples Sosaiti i putim tok bilong dispela nupela buklet long kaset. Kaset hia i kamapim ol tok bilong buklet na bilong planti skripsa i stap long en. Ol i wokim olsem: Ol i kaunim namba wan askim, na bihain ol i kaunim paragraf i bekim dispela askim, na sampela skripsa bilong paragraf. Nau ol i kaunim narapela askim, na paragraf na skripsa i bekim dispela askim, na ol i mekim olsem i go i go. Sumatin i ken harim kaset taim em i redim stadi bilong em. Na tu, ol inap mekim wok long kaset long taim bilong stadi.
Ol man i bin stap long kibung i gat laik tru long mekim wok long nupela buklet long taim ol i autim tok. Olsem: Sampela de bihain long ol i kisim dispela buklet, tupela painia (em ol man i autim tok long olgeta de) long Amerika ol i tilim buklet long tupela yangpela marit ol i save go lukim ol. Taim tupela i lukim lista bilong ol het-tok, stadi i gat nem “Ol Pasin God i Nolaik Tru Long En” em i pulim ai bilong ol. Yangpela meri i tok: “Ol i bin skulim mi olsem God i no ken sakim wanpela man—em i save sori tasol. Em namba wan hap mi mas kaunim.” Taim tupela painia i go bek long narapela wik, yangpela meri i tok: “Mi bin kaunim dispela nupela buklet. Em hatwok tru long mekim olgeta samting yumi mas mekim. Jehova i no amamas long mipela, long wanem, mipela i no marit tru. Tasol mipela pasim tok pinis long samting mipela laik mekim. Mipela stretim rot pinis bilong marit long Fraide antap.” Ol i holim tupela painia na tok: “Mipela i tok sori long yupela, long wanem, mipela i no bin stadi gut, tasol nau wanpela bikpela hevi bilong mipela i pinis.”
Yes, mekim wok long nupela buklet God i Laik Yumi Mas Mekim Wanem? Em wanpela gutpela tul bilong helpim ol man long lain long ol samting God i laik yumi mas mekim.
[Ol Piksa long pes 17]
Olsem wanem bai yu mekim wok long nupela buklet?