Askim

◼ Yu ting i stret sista i karamapim het taim wanpela brata i sanap wantaim em long dua bilong haus na sista i mekim Baibel stadi?

Taim wanpela sista i mekim Baibel stadi na wanpela brata i go wantaim em, orait sista i mas karamapim het long laplap. (1 Kor. 11:3-10) Wastaua bilong Julai 15, 2002, pes 27 i tok: ‘Dispela Baibel-stadi i olsem wanpela liklik miting bilong skulim narapela, na husat i mekim dispela stadi i save lukautim dispela miting. Long kain taim olsem, stadi i kamap olsem wanpela liklik miting kongrigesen i putim. Sapos wanpela sista i baptais pinis em i lukautim dispela stadi na wanpela baptais brata i stap, i stret sista i mas karamapim het.’ Em i ken mekim olsem taim em i mekim Baibel stadi long haus, kirapim stadi long dua bilong haus, o long ol narapela hap.

Tasol sapos sista i no makim yet dispela gobek em i mekim long dua bilong haus olsem wanpela Baibel stadi, orait em i no gat wok long karamapim het taim brata i stap. Na tu, sista i no gat wok long karamapim het sapos em i go bilong soim pasin bilong kirapim Baibel stadi, o skelim wantaim em ol tok i stap long wanpela bilong ol buk yumi save mekim Baibel stadi long en. Long ol gobek yumi save mekim long ol dua bilong haus, yumi save go lukim ol planti taim liklik na bihain isi isi yumi kirapim Baibel stadi wantaim ol, olsem na pablisa i mas skelim gut ol dispela samting na tingim wanem taim i stret long em i mas karamapim het taim wanpela brata i go wantaim em.