Askim

Long wanem taim i stret wanpela meri Kristen i karamapim laplap samting long het na ol samting bilong lotu i as bilong en?

Aposel Pol i tok: “Sapos wanpela meri i no karamapim het bilong en na i mekim prea o i autim tok profet, em . . . i semim het bilong en.” Bilong wanem? Long wanem, wanpela stiatok bilong Baibel long wok bos i tok: “Het bilong meri em man bilong en.” Pasin bilong mekim beten na autim tok insait long kongrigesen Kristen em wok bilong ol man. Olsem na taim wanpela meri Kristen i lukautim wanpela wok bilong lotu, em wok tru bilong man bilong em o bilong wanpela man i baptais pinis, orait em i mas karamapim laplap samting long het bilong em.​​—⁠1 Korin 11:​3-10.

Taim wanpela meri Kristen i marit, sampela taim em i mas karamapim laplap samting long het bilong em. Olsem: Taim famili i bung wantaim bilong stadi long Baibel o bilong kaikai, man bilong em i save go pas long skulim famili na beten long God. Tasol sapos em i no bilip, ating meri bilong em i mas mekim dispela wok. Olsem na sapos wanpela sista Kristen i mekim beten bilong em yet na bilong ol narapela na em i kolim long maus o em i mekim Baibel-stadi wantaim ol pikinini bilong em na man bilong em i stap, long dispela taim em i mas karamapim laplap samting long het bilong em. Sapos man bilong em i no stap, meri i no gat wok long karamapim laplap samting long het bilong em, long wanem, God i givim wok long em long skulim ol pikinini.​​—⁠Sindaun 1:8; 6:​20.

Tasol olsem wanem sapos wanpela yangpela pikinini man long famili i dediket na baptais pinis olsem wokman bilong God Jehova? Em i insait pinis long kongrigesen Kristen, olsem na em wok bilong ol brata bilong kongrigesen long skulim em. (1 Timoti 2:​12) Sapos papa bilong em i bilip, papa i mas skulim dispela pikinini man. Tasol sapos papa i no stap, long dispela taim mama i mas karamapim laplap samting long het long taim em i mekim Baibel-stadi wantaim yangpela pikinini man i baptais pinis na ol narapela pikinini. Mama i ken askim dispela pikinini man i baptais pinis long mekim beten bilong stadi o long taim bilong kaikai, tasol em samting bilong mama yet long tingim. Nogut mama i ting olsem pikinini man i no inap yet long mekim, olsem na ating mama yet i laik beten. Sapos em i laik beten long kain taim olsem, em i mas karamapim laplap samting long het bilong em.

Ol meri Kristen i mas karamapim laplap samting long het taim ol i mekim sampela wok bilong kongrigesen. Olsem: Sapos namel long wik i gat bung bilong autim tok na i gat ol sista Kristen tasol i stap na i no gat ol man i baptais pinis, orait long dispela kain taim sista i mas karamapim het. Ating i gat sampela narapela taim tu na i no gat ol man i baptais pinis i stap long wanpela miting bilong kongrigesen. Sapos wanpela sista i mas mekim sampela wok em ol brata i save mekim long ol miting bilong kongrigesen o long bung bilong autim tok, sista i mas karamapim laplap samting long het bilong em.

Olsem wanem? Ol meri Kristen i mas karamapim laplap samting long het sapos ol i tanim tok bilong wanpela pablik-tok bilong Baibel long maus o long tok ples bilong ol yaupas o ol i ritim ol paragraf bilong wanpela buk bilong Baibel ol i mekim wok long en long miting bilong kongrigesen? Nogat. Ol sista i mekim dispela wok ol i no bosim stadi o mekim wok tisa. Na olsem tasol, ol sista i no ken karamapim het taim ol i insait long sampela soim, o kamapim sampela ekspiriens, o mekim wanpela tok long Skul Tiokratik Bilong Autim Tok.

Tru ol man i baptais pinis ol i mas skulim ol narapela insait long kongrigesen, tasol ol man na ol meri wantaim ol i kisim wok bilong autim tok na skulim ol man ausait long kongrigesen. (Matyu 24:14; 28:​19, 20) Olsem na taim wanpela meri Kristen i autim tok bilong Baibel long sampela man i no Witnes na wanpela brata i stap wantaim em, meri i no ken karamapim laplap samting long het bilong em.

Tasol sapos sista i mekim wanpela Baibel-stadi long wanpela haus na wanpela man i dediket na baptais pinis em i stap, sista i mas karamapim laplap samting long het. Dispela Baibel-stadi i olsem wanpela liklik miting bilong skulim narapela, na husat i mekim dispela stadi i save lukautim dispela miting. Long kain taim olsem, stadi i kamap olsem wanpela liklik miting kongrigesen i putim. Sapos wanpela meri Witnes i baptais pinis em i lukautim dispela stadi na wanpela man Witnes i baptais pinis em i stap, i stret meri i mas karamapim laplap samting long het bilong em. Tasol brata i dediket pinis i mas mekim beten. Wanpela sista i no ken beten taim wanpela brata i dediket pinis em i stap. Tasol sapos nek bilong brata i bagarap na em i no inap toktok, o kain samting olsem, orait sista i ken beten.

Sampela taim wanpela man em pablisa i no baptais yet em i go wantaim wanpela sista Kristen long wanpela Baibel-stadi. Sapos sista i laik, em i ken askim dispela pablisa long lukautim stadi. Tasol i no stret dispela pablisa i kisim ples bilong sista i baptais na beten long Jehova​—⁠sista yet i mas mekim beten long stadi. Sapos sista i lukautim stadi o mekim beten, em i mas karamapim laplap samting long het bilong em. Maski dispela pablisa i no baptais yet, ol ausaitman i ting em i insait long kongrigesen, long wanem, em i save autim tok.

Aposel Pol i tok: “Meri i mas karamapim het bilong en olsem mak bilong em i mekim wok bilong God, bai ol ensel i ken lukim.” Tru tumas, ol sista Kristen i gat gutpela wok bilong i stap olsem gutpela piksa long ol planti milion ensel em ol i save stap daun long Jehova. Olsem na i stret ol meri i daun long God ol i tingim tru pasin bilong karamapim laplap samting long het bilong ol sapos i stret long mekim olsem.

[Ol Piksa long pes 26]

Meri i karamapim laplap samting long het i soim olsem em bihainim lo bilong wok bos