Askim

Yu ting i stret ol sista i karamapim het long laplap taim ol i tanim tok bilong Baibel i go long tok ples Sain bilong ol yaupas long ol miting Kristen, ol kibung sekit, na ol kibung distrik?

Meri Kristen i mas karamapim het taim em i mekim wok em man bilong em i mas mekim o wanpela brata long kongrigesen i mas mekim. Dispela pasin em i stret wantaim stiatok aposel Pol i bin mekim olsem, “sapos wanpela meri i no karamapim het bilong en na i mekim prea o i autim tok profet, em . . . i semim het bilong en,” long wanem, “het bilong meri em man.” (1 Ko. 11:​3-10) Taim wanpela sista i karamapim het long laplap i stret long kain taim olsem, dispela i makim olsem em i daun long lo God i putim insait long kongrigesen Kristen.​—1 Ti. 2:​11, 12.a

Orait, olsem wanem long taim wanpela brata i mekim tok bilong Baibel na sista i tanim tok i go long tok ples Sain? Sista i stap olsem namel meri tasol bilong tanim tok bilong brata i go long tok ples Sain. Yumi ken tok em yet i no skulim ol man, nogat, em i tanim tok bilong dispela brata i mekim tok. Tasol pasin bilong tanim tok i go long tok ples bilong ol yaupas em i narapela kain long pasin bilong tanim tok long wanpela tok ples i go long narapela tok ples. Long ol tok ples, ol man inap lukluk long man i mekim tok na long wankain taim ol i harim tok bilong man i tanim tok. Na tu, ol sista husat i tanim tok ol i no mekim olsem ol i mekim tok. Sampela taim, ating ol i sindaun na tanim tok, o sapos ol i sanap, ol i lukluk long man i mekim tok na ol i no lukluk long odiens. Olsem na ol sista i tanim tok i go long narapela tok ples, i no gat wok long ol i karamapim het bilong ol long laplap.

Na tu, long nau ol i yusim ol vidio samting taim ol i tanim tok i go long tok ples bilong ol yaupas, olsem na ol yaupas i lukim tasol piksa bilong man long vidio i tanim tok. Piksa bilong man i tanim tok long tok ples Sain bai kamap long vidio, tasol ol i no inap lukim brata i mekim tok. Olsem na i stret sista husat i tanim tok i go long tok ples Sain i mas tingim nambatu wok bilong em olsem meri bilong tanim tok na em i mas karamapim het long laplap.

Orait, olsem wanem dispela nupela senis bai i stiaim pasin bilong tanim tok long tok ples Sain bilong ol yaupas long miting bilong Skul Tiokratik Bilong Autim Tok, ol soim, na ol tok ol man i bekim long taim bilong Baibel Stadi Bilong Kongrigesen, Miting Bilong Wok Autim Tok na Stadi Wastaua? Olsem wanem? I stret sista husat i save tanim tok ples Sain long ol dispela miting i mas karamapim het bilong em? Em i klia olsem sampela taim i no gat wok long sista i karamapim het bilong em, long wanem, olgeta man long odiens bai save olsem sista i no lukautim miting. Olsem, long taim em i tanim tok bilong wanpela i bekim tok, o tanim tok bilong ol sista i mekim tok, o tanim tok long taim bilong ol soim, i no gat wok long sista i karamapim het. Tasol taim em i tanim tok bilong ol brata long ol dispela miting, o taim em i tanim tok bilong brata i lukautim Stadi Wastaua o Kongrigesen Baibel Stadi, o taim em i go pas long wokim sain bilong makim ol singsing, em i mas karamapim het bilong em. Long taim bilong miting, ating wanpela sista i mas tanim tok bilong ol brata, ol sista, ol pikinini, na ol elda. Olsem na i gutpela ol sista i karamapim het long taim bilong miting olgeta.

[Futnot]