Yu Save Putim Ripot Long Olgeta Mun?
1 Taim ol wasman sekit i raun bilong lukim ol kongrigesen, ol i kisim save olsem yumi gat samting olsem 3,500 pablisa long Papua Niugini. Tasol taim yu lukim ripot bilong olgeta wan wan mun long Wok Kingdom, yu bai luksave olsem long sampela mun namba bilong ol pablisa i save putim ripot i go antap na long sampela mun ripot i go daun, sampela taim namba i save go daun aninit tru long 3,000 pablisa. Dispela i kamapim long ples klia olsem i gat planti pablisa ol i no stretim rot bilong autim tok long olgeta mun, na sampela ol i no save putim ripot. Long rot bilong dispela tok, mipela i bilip olsem ol tok mipela i kamapim hia bai helpim ol brata sista long stretim dispela samting.
2 Amamas Tru Long Gutpela Wok Autim Tok: Yumi mas pilim tru long bel dispela gutpela wok yumi mekim bilong autim gutnius bilong Kingdom long ol narapela man. Dispela wok i save mekim Jehova i belgut na em i save helpim ol man i gat gutpela bel long kisim save long rot bilong laip. (Snd. 27:11; 1 Ti. 4:16) Taim yumi autim tok long olgeta taim yumi kisim sampela save moa long mekim dispela wok, na yumi kisim amamas na pilim olsem yumi mekim gutpela wok.
3 Putim Ripot Long Wok Yu Mekim: Sampela ol i autim tok, tasol ol i no save putim ripot long taim stret. Yumi no ken ting wok yumi mekim em i liklik samting na maski long putim ripot. (Skelim Mak 12:41-44.) Yumi mas putim ripot long wok yumi bin mekim! Sapos yu save bihainim wanpela pasin, olsem raitim long kalenda samting ol aua yu save lusim long mekim wok autim tok, dispela inap kirapim yu long putim ripot long taim stret long pinis bilong olgeta wan wan mun. Na tu, em i bikpela samting long olgeta kongrigesen na grup ol i mas salim ripot bilong mun paslain long de namba 7 bilong olgeta wan wan mun. Long rot bilong putim kwik ripot bilong yu long pinis bilong olgeta wan wan mun, yu ken helpim gut ol brata i save bungim ol ripot.
4 Givim Helpim: Ating kongrigesen i mas mekim sampela samting moa bilong helpim ol pablisa i no save autim tok long olgeta mun. Kuskus bilong kongrigesen na wasman bilong buk stadi ol inap stretim rot bambai sampela strongpela pablisa i ken helpim ol pablisa i no strong. Long sampela hap, ol wasman sekit tasol i stap bilong strongim ol brata. Sapos yu gat ol pikinini o Baibel sumatin ol i pablisa i no baptais yet, skulim ol long putim ripot bilong wok autim tok long olgeta mun.
5 Tingim stori i stap long Wastaua bilong Oktoba 1, 1997, nem bilong en, “Mi Amamas Tru Long Mekim Wok Bilong Jehova Inap Planti Yia.” Sista Ottilie Mydland bilong Nowe em i bin kamap pablisa i autim tok long olgeta mun paslain long em i kisim baptais long 1921. Inap 76 yia bihain, taim em i gat 99 krismas, em i tok: “Mi amamas mi inap mekim yet wok bilong autim tok long olgeta mun.” Em i wanpela gutpela tingting tru yumi olgeta wokboi bilong Jehova i ken bihainim!
This is a repeat of article in km 4/00 taken from km-E 4/00 “Are You a Regular Kingdom Proclaimer?”