Namba 12 Hap—Mekim Ol Baibel Stadi i Save Helpim Ol Man
Helpim Ol Sumatin Long Kirapim na Lukautim Ol Baibel Stadi
1 Taim ol Baibel sumatin bilong yumi i kirap autim tok, ating ol i pret liklik long kirapim na lukautim ol Baibel stadi bilong ol yet. Yumi ken mekim wanem bilong helpim ol long kisim stretpela tingting long dispela bikpela wok bilong yumi?—Mt. 24:14; 28:19, 20.
2 Taim wanpela Baibel sumatin i winim mak bilong kamap pablisa i no baptais, ating em i insait pinis long Skul Tiokratik Bilong Autim Tok. Skul em i kisim taim em i redim na mekim ol tok long Skul bai helpim em long kisim save long kamap gutpela wokman, olsem ‘wokman tru i autim stret tok tru bilong God, na i no gat sem long ai bilong en.’—2 Ti. 2:15.
3 Pasin Bilong Yu i Ken Skulim Ol: Jisas i skulim ol disaipel long rot bilong ol tok na gutpela pasin bilong em. Em i tok: ‘Taim sumatin i skul gut pinis, orait em bai i kamap wankain olsem tisa bilong en.’ (Lu. 6:40) Em i bikpela samting long yu bihainim pasin bilong Jisas na stap olsem gutpela piksa long mekim wok autim tok. Taim sumatin bilong yu i lukim pasin bilong yu long autim tok, em bai kisim save olsem wok bilong mekim ol gobek em bilong kirapim ol Baibel stadi.
4 Stori long sumatin olsem taim yumi tokim man bilong haus olsem yumi laik stadi wantaim em, i no gat wok long stori long olgeta samting bilong stadi. Planti taim i gutpela long soim pasin bilong stadi long rot bilong stadi long wanpela o tupela paragraf long wanpela buklet o buk. Ol tok bilong helpim yu long mekim olsem i stap long pes 6 bilong dispela Wok Kingdom na Wok Kingdom bilong Janueri 2002, pes 8.
5 Sapos i stret long mekim, singautim sumatin long go wantaim yu o narapela strongpela pablisa long mekim ol Baibel stadi. Ating em i ken stori long wanpela paragraf o wanpela skripsa. Olsem na long rot bilong lukluk na skelim, sumatin bai lainim planti samting long pasin bilong mekim ol Baibel stadi i save helpim man. (Snd. 27:17; 2 Ti. 2:2) Mekim gutpela tok amamas long em, na toktok wantaim em long olsem wanem em inap mekim gut wok bilong em.
6 Wok bilong skulim ol nupela pablisa long kamap tisa bilong Baibel bai helpim ol long mekim “gutpela wok” long kirapim na lukautim ol stadi bilong ol yet. (2 Ti. 3:17) Yumi amamas long wok wantaim ol long mekim dispela gutpela singaut: “Man i laik dring, em i mas kam na kisim wara bilong givim laip, em i olsem presen bilong God”!—KTH 22:17.