Holim

Mekim Ol Baibel Stadi i Save Helpim Ol Man

Dispela namel pepa i bungim olgeta bikpela tok long ol stori i bin kamap long pasin bilong “Mekim Ol Baibel Stadi i Save Helpim Ol Man” long Wok Kingdom. Yumi olgeta i mas lukautim gut dispela pepa na lukluk long en taim yumi mekim ol Baibel stadi. Na tu, ol brata i ken kamapim sampela tok bilong en long ol bung bilong autim tok, na ol wasman autim tok i ken mekim wok long en long taim ol i raun lukim ol buk stadi grup.

Namba 1 Hap: Baibel Stadi Em i Wanem Samting?

Sapos oltaim yu save toktok wantaim wanpela man o meri long tok bilong Baibel, maski yu mekim inap sotpela taim tasol, olsem 15 minit samting, na yu mekim wok long Baibel na wanpela buk samting, orait yu mekim wanpela Baibel stadi. Bihain long yu mekim stadi tripela taim pinis na sapos yu save olsem yu bai stadi yet wantaim em, orait yu ken putim long ripot.​—⁠km 7/04 p. 1.

Ol Buk Samting Bilong Stadi

◼ God i Laik Yumi Mas Mekim Wanem?

◼ Save i Bringim Man Long Laip Oltaim

◼ Lotuim Dispela Wanpela God Tru

◼ Yu ken mekim wok long buklet Yu Inap i Stap Pren Bilong God! bilong stadi wantaim ol man i no save gut long rit o ol i bin skul liklik tasol.

Namba 2 Hap: Redi Long Mekim Stadi

Yumi mas kamapim gut ol tok long pasin em sumatin inap pilim tru long bel. Dispela i makim olsem yu mas tingim sumatin taim yu redim stadi.​—⁠km 8/04 p. 1.

Pasin Bilong Redim

◼ Skelim het tok bilong sapta, ol liklik het tok, na ol piksa samting.

◼ Painim ol bekim bilong ol askim, na makim ol bikpela tok tasol.

◼ Makim wanem ol skripsa em ol i no kamapim tok bilong ol long paragraf em yu bai ritim long taim bilong stadi. Gutpela yu ken raitim sampela tok bilong skripsa long arere bilong paragraf.

◼ Mekim sotpela riviu long pinis bilong stadi.

Redim Stadi i Helpim Sumatin

◼ Beten long Jehova long sumatin na ol samting bilong helpim em.

◼ Traim long tingim wanem ol tok em sumatin bai hatwok long kisim gut o bilip long en.

◼ Askim yu yet: Wanem samting em i mas kliagut long en o wanem ol senis em i mas mekim na bai em inap kamap strong long ol samting bilong spirit? Olsem wanem mi inap putim tok i go daun long bel bilong em?

◼ Sampela taim yu mas mekim tok piksa, kamapim klia wanpela tok, o kamapim sampela askim bilong helpim sumatin long kliagut long insait bilong wanpela tok o skripsa.

Namba 3 Hap: Mekim Gutpela Wok Long Baibel

As na yumi mekim ol Baibel stadi i olsem: Yumi laik helpim ol man long kliagut na bilip long ol tok bilong Baibel na bihainim long i stap bilong ol na bai ol i ken “kamap disaipel.” (Mt. 28:​19, 20; 1 Te. 2:13) Olsem na Baibel i mas i stap olsem bikpela samting long stadi.​—⁠km 11/04 p. 4.

Mekim Wok Long Baibel Long Skulim Ol

◼ Soim sumatin long olsem wanem em i ken painim ol skripsa insait long Baibel bilong em yet.

◼ Ritim na stori long ol skripsa i stori long as bilong ol bilip bilong yumi.

◼ Mekim wok long ol askim. I no gutpela long yu stori long ol skripsa bilong Baibel long sumatin, larim sumatin i kamapim insait bilong ol skripsa.

◼ No ken kamapim planti toktok. Na abrusim pasin bilong kamapim mining bilong olgeta wan wan hap bilong skripsa. Stori tasol long ol hap bilong skripsa i stret bilong kamapim klia tok bilong paragraf.

◼ Helpim sumatin long bihainim ol tok em i lainim. Helpim em long kisim save long olsem wanem ol tok bilong Baibel i stret long em.

Namba 4 Hap: Lainim Ol Sumatin Long Redim Stadi

Sumatin bai kamap strong kwiktaim sapos paslain long stadi em i ritim ol paragraf bilong stadi, makim ol bekim, na tingim olsem wanem em inap kamapim ol dispela tok long toktok bilong em yet. Olsem na taim yu kirapim pinis wanpela nupela stadi, redim ol paragraf wantaim em bilong soim em long pasin bilong redim stadi. Long planti sumatin, i gutpela long redim wanpela sapta olgeta wantaim ol.​—km 12/04 p. 1.

Makim Ol Bekim na Raitim Sampela Liklik Tok

◼ Stori long rot bilong painim ol tok i bekim stret ol askim bilong stadi.

◼ Soim sumatin buk bilong yu em yu bin makim tasol ol bikpela tok.

◼ Helpim em long kisim save olsem olgeta wan wan skripsa em buk i no kamapim ol tok bilong en ol i helpim wanpela tok bilong paragraf, na soim em long pasin bilong raitim sampela liklik tok long arere long pes bilong buk.

Skelim Ol Bikpela Tok na Riviu

◼ Tokim sumatin long skelim het tok bilong sapta na ol liklik het tok na ol piksa paslain long em i kirap redim stadi bilong em.

◼ Kirapim em long lusim liklik haptaim long mekim riviu long ol bikpela tok bilong stadi taim em i redim pinis stadi bilong em.

Namba 5 Hap: Skelim Hamas Paragraf Bilong Stadi

Hamas paragraf ol bai mekim insait long wanpela stadi i mas stret long sindaun na save bilong tisa na sumatin.​—⁠km 1/05 p. 7.

Helpim Ol Long Kisim Strongpela Bilip

◼ No ken hariap tasol long pinisim planti paragraf na nau sumatin i no kisim ol stretpela save long Tok Bilong God.

◼ Wok long helpim sumatin long kliagut na bilipim ol samting em i lainim long Baibel, maski yu mas lusim bikpela haptaim long mekim olsem.

◼ Stori gut long ol bikpela tok na ol skripsa i as bilong ol samting em i skul long en.

No Ken Stori Planti Long Ol Liklik Tok

◼ Sapos sumatin i laik stori planti long ol hevi bilong em, stretim rot bilong stori long ol dispela samting bihain long pinis bilong stadi.

◼ No ken stori planti long taim bilong stadi. Taim yu kamapim wanpela ekspiriens o sampela narapela tok bilong helpim sumatin, no ken pulim longpela stori tru na dispela i pasim sumatin long kisim stretpela save long ol tok bilong Baibel.

Namba 6 Hap: Taim Sumatin i Givim Askim

Taim yu kirapim pinis nupela stadi, no ken stori nabaut nabaut long ol narapela narapela tok bilong Baibel. Stori gut long wanpela tok na bihain stori long narapela. Dispela bai helpim sumatin long kisim stretpela save na long kamap strong long ol samting bilong spirit.​—km 2/05 p. 6.

Bihainim Gutpela Tingting

◼ Yu ken bekim ol askim em sumatin i kamapim long ol samting i insait long stadi.

◼ Sapos sampela askim sumatin i kamapim i no insait long samting bilong stadi, o yu mas mekim wok painimaut bilong kisim bekim bilong ol, orait i gutpela yu bekim ol askim bilong em long taim stadi i pinis o long narapela taim. I gutpela yu raitim ol askim sumatin i kamapim.

◼ Sapos sumatin i hatwok long kisim wanpela bilip, orait skelim ol narapela buk samting i stori gut long tok Baibel i mekim long dispela samting.

◼ Sapos sumatin i holim yet dispela bilip, orait no ken stori moa long en long dispela taim​—⁠larim i stap bilong narapela taim​—⁠na mekim stadi i go yet.

Mekim Pasin Daun

◼ Sapos yu no save long bekim bilong askim sumatin i kamapim, orait no ken kamapim tingting bilong yu yet.

◼ Wok long skulim em long olsem wanem em i ken yusim ol buk samting em oganaisesen i wokim bilong mekim wok painimaut.

Namba 7 Hap: Mekim Beten Long Taim Bilong Stadi

Bilong ol Baibel sumatin i ken kamap strong long ol samting bilong spirit, Jehova i mas blesim stadi. Olsem na i stret long kirapim na pinisim stadi long rot bilong beten.​—⁠km 3/05 p. 3.

Rot Bilong Kirap Beten Wantaim Sumatin

◼ Yumi ken kirap mekim beten long namba wan taim yumi stadi wantaim ol manmeri em ol i save tingim ol samting bilong lotu.

◼ Long sampela sumatin, yumi mas skelim wanem taim i stret long kirap mekim beten long stadi.

◼ Yu ken mekim wok long Song 24:​4, 5 na 1 Jon 5:14 long helpim sumatin long kliagut long as na yumi save mekim beten.

◼ Yu ken mekim wok long Jon 15:16 bilong stori long sumatin olsem yumi mas beten long Jehova long rot bilong Jisas.

Ol Samting Yu Ken Beten Long En

◼ I stret tru long givim biknem long Jehova em Man bilong skulim yumi.

◼ Yumi ken kamapim tu olsem yumi tingim sumatin.

◼ Yumi ken tok tenkyu long oganaisesen Jehova i yusim.

◼ Yumi ken beten long Jehova i ken blesim ol samting sumatin i mekim bilong bihainim ol tok em i lainim.

Namba 8 Hap: Stiaim Ol Sumatin i Kam Long Oganaisesen

Yumi stadi wantaim ol man bilong skulim ol long ol samting bilong bilip na tu long helpim ol long kam insait long kongrigesen Kristen. Lusim sampela minit long olgeta wik bilong stori long ol long oganaisesen bilong Jehova.​—⁠km 4/05 p. 8.

Ol Miting Bilong Kongrigesen

◼ Stori long wan wan bilong ol 5-pela miting i save kamap long olgeta wik. Kirap long namba wan taim yu mekim stadi wantaim ol Baibel sumatin, yu mas singautim ol i kam long miting.

◼ Tokim sumatin long ol gutpela tok yu bin harim long ol miting.

◼ Kirapim laik bilong sumatin long kam long Memorial, ol kibung, na taim wasman sekit i kam lukim kongrigesen.

◼ Mekim wok long ol piksa i stap insait long ol buk na nius bilong yumi bilong helpim ol long lukim long tingting wanem samting i save kamap long ol miting.

◼ Kirapim sumatin long ritim buklet Ol Witnes Bilong Jehova​—⁠Ol i Husat? Ol i Bilip Long Wanem Samting?

Mekim Wok Long Ol Vidio Long Skulim Man

◼ Jehovah’s Witnesses​—⁠The Organization Behind the Name

◼ Our Whole Association of Brothers

◼ United by Divine Teaching

◼ To the Ends of the Earth

Namba 9 Hap: Redim Ol Sumatin Long Autim Tok Long Kain Kain Taim na Ples

Taim ol Baibel sumatin i bilipim ol samting ol i lainim, dispela i kirapim ol long tokim ol narapela long ol dispela samting.​—⁠km 5/05 p. 1.

Kirapim Ol Long Autim Tok

◼ Olsem wanem? I gat ol pren na sampela long famili bilong em we em i ken singautim ol long insait long stadi taim yupela i stadi?

◼ Olsem wanem? Sampela ol wanwok, wanskul, o ol narapela i kamapim olsem ol i gat laik long harim tok?

Lainim Ol Long Tokim Ol Narapela Long Bilip Bilong Ol

◼ Long taim bilong stadi, yu ken askim sumatin: “Olsem wanem yu ken yusim Baibel long stori long dispela tok i tru long famili bilong yu?”

◼ Helpim sumatin long save olsem em i mas soim rispek na bihainim gutpela pasin taim em i tokim ol narapela long God na ol samting Em i tingting pinis long mekim.

◼ Ol Baibel sumatin i ken mekim wok long buklet Ol Witnes Bilong Jehova​—⁠Ol i Husat? Ol i Bilip Long Wanem Samting? bilong helpim ol pren na famili bilong ol long kliagut long ol bilip na ol wok bilong yumi em Baibel i as bilong en.

Namba 10 Hap: Skulim Ol Sumatin Long Autim Tok Long Ol Haus

Taim ol elda i ting wanpela Baibel sumatin i winim mak bilong kamap pablisa i no baptais, em inap kirap autim tok wantaim kongrigesen.​—⁠km 6/05 p. 1.

Redi Gut Wantaim

◼ Soim nupela pablisa long em i ken painim we ol tok em i ken mekim long autim tok.

◼ Helpim em long makim wanpela tok i no hatwok long em i mekim na i gutpela long teritori.

◼ Strongim em long yusim Baibel long taim em i autim tok.

◼ Yutupela i mas mekim traim long pasin bilong autim tok. Soim em long olsem wanem em i ken bekim ol tok em planti man i save kamapim long teritori.

Autim Tok Wantaim

◼ Larim em i lukim pasin bilong yu long mekim dispela tok yutupela i bin redim wantaim.

◼ Tingim pasin na save bilong sumatin. Sampela taim i gutpela long tokim sumatin long mekim sampela tok tasol.

◼ Helpim nupela pablisa long wokim sediul bilong autim tok oltaim.

Namba 11 Hap: Helpim Ol Sumatin Long Mekim Ol Gobek

Wok bilong redi long mekim gobek i mas kirap long namba wan taim yumi bungim man. Strongim sumatin long tingim tru ol man em i toktok wantaim ol. Lainim sumatin long kirapim ol man bilong haus long kamapim tingting bilong ol, long putim yau long tok ol i mekim, na long luksave long ol samting ol dispela man i wari long en.​—⁠km 7/05 p. 1.

Redi Long Go Bek

◼ Skelim gen ol tok i bin kamap long namba wan taim sumatin i bungim man, na helpim sumatin long makim wanpela tok em man bilong haus bai amamas long kisim save long en.

◼ Redim wanpela sotpela tok i kamapim wanpela skripsa na paragraf bilong wanpela buk samting.

◼ Redim wanpela askim sumatin i ken kamapim long pinis bilong tok.

Givim Bel Long Go Bek

◼ Strongim sumatin long i go bek hariap long lukim ol man i laik harim tok.

◼ Helpim sumatin long kliagut olsem em i bikpela samting long i go bek lukim ol man maski em i mas go bek planti taim bilong painim ol man bilong haus.

◼ Lainim sumatin long pasin bilong makim taim wantaim man bilong haus bilong go bek lukim em. Helpim sumatin long kliagut olsem em i bikpela samting long go bek olsem em i bin tok promis long man bilong haus.

Namba 12 Hap: Helpim Ol Sumatin Long Kirapim na Lukautim Ol Baibel Stadi

Em i bikpela samting long yu bihainim pasin bilong Jisas na stap olsem gutpela piksa long mekim wok autim tok. Taim sumatin bilong yu i lukim pasin bilong yu long autim tok, em bai kisim save olsem wok bilong mekim ol gobek em bilong kirapim ol Baibel stadi.​—⁠km 8/05 p. 1.

Kirapim Baibel Stadi

◼ Tokim sumatin i no gat wok long stori long olgeta samting bilong stadi.

◼ Planti taim i gutpela long soim pasin bilong stadi long rot bilong stadi long wanpela o tupela paragraf long wanpela buklet o buk.

◼ Lukim gen ol tok na mekim traim long wanpela pasin bilong kirapim Baibel stadi.​—⁠km 8/05 p. 6; km 1/02 p. 8.

Skulim Ol Sumatin Long Kamap Tisa

◼ Kirapim ol sumatin long insait long Skul Tiokratik Bilong Autim Tok.

◼ Singautim ol sumatin i kamap pablisa pinis long go wantaim yu long mekim ol narapela Baibel stadi na ol i ken mekim sampela tok.