Redi Gut Long Skulim Man
1. Taim yumi mekim Baibel stadi, bilong wanem yumi mas tingting strong long helpim sumatin long kisim pasin bilong laikim tok i tru bilong Baibel?
1 Taim yumi mekim Baibel stadi, yumi mas redi gut bambai yumi inap kirapim sumatin long mekim wok bilong Jehova. Wok bilong yumi inap kamapim gutpela samting sapos yumi helpim sumatin long kisim pasin bilong laikim tok i tru bilong Baibel. Dispela pasin bai i kirapim sumatin. (Lo 6:5; Snd. 4:23; 1 Ko. 9:26) Orait, yumi ken mekim dispela samting olsem wanem?
2. Olsem wanem beten bai helpim yumi taim yumi redim stadi bilong sumatin?
2 Beten na Redim Gut Stadi: Jehova tasol i save mekim tok i tru i kamap strong long bel bilong ol sumatin, olsem na taim yumi laik redim stadi bilong sumatin yumi mas beten long God i ken helpim em na yumi mas kolim stret ol samting em sumatin i gat wok yet long mekim. (1 Ko. 3:6; Jem. 1:5) Kain beten olsem bai helpim yumi long skelim gut ol samting yumi inap mekim bilong putim stretpela “save” long laik bilong Jehova i go daun long bel bilong sumatin.—Kl. 1:9, 10.
3. Olsem wanem yumi ken tingim sumatin taim yumi redim stadi?
3 Tingim Sumatin: Jisas i save olsem bilong mekim gut wok tisa, yumi mas tingim gut ol sumatin. Inap tupela taim, ol man i bin givim dispela wankain askim long Jisas. “Bai mi mekim wanem na mi kisim laip bilong i stap gut oltaim oltaim?” Long dispela tupela taim, em i kamapim narapela narapela tok bilong bekim dispela askim. (Lu. 10:25-28; 18:18-20) Yumi mas tingim sumatin taim yumi redim stadi. Bai yumi ritim wanem ol skripsa wantaim em? Bai yumi stadi long hamas paragraf? Yu ting sumatin bai hatwok long kisimgut wanem ol bikpela tok bilong stadi? Sapos yumi inap tingim sampela kain askim em sumatin bai kamapim, dispela bai helpim yumi long redi gut long bekim.
4. Wanem ol samting i insait long pasin bilong redi gut?
4 Skelim Ol Tok Yupela Bai Stadi Long En: Ating inap planti taim pinis yumi bin stadi long dispela samting, tasol long sumatin, dispela em namba wan taim bilong em long stadi long en. Olsem na sapos yumi laik putim tok i go daun long bel bilong em, orait em i bikpela samting long yumi redim gut stadi. Dispela i makim olsem yumi mas mekim ol samting em yumi tokim sumatin long mekim. Tingim sumatin taim yu skelim ol tok na ol skripsa em yupela bai stadi long en, na makim ol bikpela poin.—Ro. 2:21, 22.
5. Olsem wanem yumi ken bihainim pasin bilong Jehova?
5 Jehova i gat bikpela laik long olgeta wan wan Baibel sumatin i mas kamap strong. (2 Pi. 3:9) Taim yumi makim hap taim bilong redi long mekim ol Baibel stadi, yumi kamapim olsem yumi tu i gat dispela wankain laik.