Mipela i Laikim Planti Moa Baibel-Stadi

¹ God Jehova i wok long blesim oganaisesen bilong em long graun na wok bilong en i go bikpela. Long sampela hap bilong graun, wok bilong Kingdom i kamap gutpela na i go bikpela. Yumi amamas tru long kaunim ol stori olsem wok bilong autim gutnius i go bikpela!

² Long Papua Niugini long yia bilong wok bilong 1997, wok bilong yumi tu i go bikpela, winim bilong 1996. Namba bilong ol painia haptaim i go antap, na namba bilong ol buklet na magasin yumi bin tilim i go antap. Namba bilong ol manmeri i kam long Memorial i go antap, winim bilong yia i go pinis, na i gutpela tru i gat 230 i bin kisim baptais. Inap tenpela yia nau, winim 200 nupela i bin kisim baptais long olgeta wan wan yia! Olsem wanem long wok bilong mekim ol gobek na Baibel-stadi? Maski namba bilong pablisa olgeta i stap wankain tasol, namba bilong ol gobek i bin go daun na namba bilong ol Baibel-stadi i bin go daun inap 22 pesen. Tasol dispela tupela hap wok bilong wok autim tok ol i bikpela hap wok bilong kamapim ol disaipel. Yumi olgeta wan wan i ken mekim wanem bilong helpim wok bilong mekim ol gobek na Baibel-stadi i kamap gutpela?

³ Laik Tru Long Mekim Wanpela Baibel-Stadi: Yumi yet i mas tingting long i stap strong long ol samting bilong spirit na wok autim tok. Ol disaipel tru bilong Krais, ol i “wok strong long mekim olgeta kain gutpela pasin.” (Ta 2:14) Taim yumi skelim gen wok autim tok bilong yumi, inap yumi tok olsem yumi gat bikpela laik tru long i go bek lukim ol man i bin kisim ol buk na nius samting taim yumi autim tok? Olsem wanem? Yumi gat laik long askim ol man i bin amamas long harim tok long stadi long Baibel? (Ro 12:11) O yumi mas wok long kisim bikpela laik long mekim ol gobek na kirapim ol Baibel-stadi?

⁴ Pasin bilong kaunim Baibel, go oltaim long ol miting, na stadi long ol buk na nius samting, ol dispela samting bai helpim yumi long stap strong long ol samting bilong spirit na spirit bilong God bai strongim yumi. (Ef 3:​16-​19) Dispela bai strongim bilip bilong yumi long Jehova na pasin bilong yumi long laikim ol narapela. Dispela bai kirapim yumi long skulim narapela long tok i tru, na long dispela rot wok autim tok bilong yumi bai kamap gutpela, na yumi bai amamas. Tru tumas, yumi mas i gat laik long mekim planti moa Baibel-stadi!

⁵ Stadi Wantaim Famili Pastaim: Ol papamama Kristen i gat ol pikinini i stap wantaim ol, ol i mas tingting long mekim famili-stadi long olgeta taim. (Lo 31:12; Sng 148:​12, 13; Snd 22:⁠6) I gutpela sapos ol papamama i stadi wantaim ol pikinini long buklet Yumi Mas Mekim Wanem? na bihain long buk Save bilong redim ol long winim ol mak bilong kamap pablisa i no baptais na long dediket na baptais. Yupela i ken stadi tu long ol narapela buk samting i stret long save na krismas bilong pikinini. Sapos papa o mama i stadi wantaim wanpela pikinini i no baptais yet, em i ken makim long ripot olsem wanpela stadi, na aua, na gobek, olsem “Askim” long Wok Kingdom bilong Septemba 1988 i kamapim.

⁶ Stretim Gut Wok Bilong Yu: Taim yumi skelim hamas magasin, buklet, na buk yumi tilim, yumi save olsem yumi bin tromoi planti pikinini kaikai long olgeta hap. Ol dispela kaikai bilong tok i tru i gat bikpela strong bilong kamapim ol nupela disaipel. Tasol olsem wanem? Sapos man bilong wokim gaden em i planim tasol ol kaikai na bihain em i no gat taim bilong kamautim kaikai, em bai amamas long wok bilong em? Nogat tru. Olsem tasol, wok bilong mekim ol gobek na kirapim ol Baibel-stadi em i bikpela samting.

⁷ Olsem wanem? Yu save mekim ol gobek long olgeta taim? Go bek hariap na lukim ol man i bin amamas long harim tok. Yumi mas i gat bikpela tingting long kirapim wanpela Baibel-stadi taim yumi mekim ol gobek. Olsem wanem? Long olgeta taim yu painim wanpela nupela gobek, yu save raitim gut nem bilong em? Taim yu raitim nem na atres bilong man bilong haus, no ken lusim tingting long raitim det yu autim tok long em, samting yu tilim long em, na raitim liklik tok long ol samting yupela i bin stori long en, na samting yu ken stori long en taim yu go bek. Larim liklik spes long notbuk bilong yu bambai yu ken raitim sampela tok moa bihain long olgeta wan wan taim yu mekim gobek.

⁸ Skelim Rot Bilong Mekim Wanpela Gobek: Wanem sampela samting yumi ken tingim taim yumi mekim gobek long wanpela man i laik harim tok? (1) Mekim gutpela pasin pren, givim bel, na toktok gut long em. (2) Stori long ol samting man i amamas long en. (3) Stori i mas sotpela, na kamapim ol tok bilong Baibel tasol. (4) Long olgeta taim yu go lukim man, lainim em long wanpela tok i gutpela bilong helpim man yet. (5) Mekim wanpela askim samting bambai em i ken wet long kisim bekim bilong en taim yu go bek. (6) No ken stap longpela taim. (7) No ken kamapim ol askim em inap semim man o em i hatwok long bekim. (8) Bihainim savepasin bambai yu no daunim ol tingting kranki o pasin kranki bilong man taim em i no pilim yet ol samting bilong spirit.​—⁠Bilong kisim sampela save moa long pasin bilong mekim gut ol gobek na kirapim Baibel-stadi, lukim pepa yumi kisim wantaim Wok Kingdom bilong Mas, 1997.

⁹ Traim Olgeta Rot: Long wanpela kongrigesen long wanpela kantri, ol brata i kisim nem bilong ol man na namba bilong flet ol i slip long en long wanpela lain haus i gat strongpela sekyuriti long en. Ol i raitim pas i go long olgeta wan wan man i slip long en, na ol i putim tupela liklik nius insait long pas. Long pinis bilong pas, ol i askim man long stadi long Baibel na ol i raitim telefon namba bilong Haus Kingdom bambai em i ken ring i kam. Insait long sampela de tasol, wanpela yangpela man i ring i kam bilong askim ol brata long stadi wantaim em. Long de bihain ol brata i mekim gobek, na ol i kirapim stadi long buk Save. Long dispela nait yet, em i kam long Buk-Stadi Bilong Kongrigesen, na em i wok yet long i kam long ol miting. Kwiktaim em i kirap long kaunim Baibel long olgeta de na wok strong i go bilong kisim baptais. Olsem wanem? Inap yumi wok wantaim long autim tok long ol man i stap long ol haus i gat strongpela sekyuriti, o long hap bilong ol ami o polis?

¹⁰ Long wanpela kantri, taim wanpela sista i go bilong lukim wanpela gobek bilong em, dispela gobek i no stap long haus, tasol narapela meri i opim dua, na i tok: “Mi bin wetim yu.” Dispela meri i bin kisim buk Save long wanpela pren bilong em. Inap long taim sista i kam long haus, meri i bin kaunim buk olgeta inap tupela taim pinis na em i laikim tru ol tok bilong en. Meri ya i tok, em i no kirap nogut long lukim ol Witnes i kam long haus bilong em long dispela de, long wanem, em i wok long beten long ol i ken kam na stadi wantaim em long Baibel. Ol i kirapim stadi, na em i kirap long kam long ol miting bilong kongrigesen, na em i kamap strong hariap. Olsem wanem? Yumi save autim tok long ol narapela wanblut o wantok i stap wantaim man yumi go bilong lukim?

¹¹ Long narapela ekspiriens i kam long wanpela kantri, wanpela sista i baptais inap 25 yia, em i givim wanpela buk Save long mama bilong em. Mama i bilong narapela lotu, em i kirap long kaunim dispela buk. Bihain long em i kaunim pinis tupela sapta, em i singautim pikinini bilong em i kam na i tok: “Mi laik kamap wanpela Witnes Bilong Jehova!” Pikinini i kirap nogut long dispela. Mama i kirap long stadi na nau em i baptais pinis. Olsem wanem? Yumi bin tingting long givim wanpela buk Save o buklet Yumi Mas Mekim Wanem? long ol wanblut tru bilong yumi olsem wanpela presen?

¹² Traim Bihainim Ol Dispela Tok: Olsem wanem? Yu bin traim pasin bilong tokim stret man olsem yu laik stadi wantaim em? Yu ken tok olsem: “Sapos yu laik stadi long Baibel, i no gat pe, insait long sampela minit tasol mi ken soim long yu pasin bilong mekim olsem.” Planti man bai orait long dispela na ol i larim yumi i soim ol long pasin bilong mekim stadi.

¹³ Kirap long namba wan taim bilong stadi, soim sumatin long pasin bilong redi paslain na kaunim ol skripsa i stap long ol paragraf na makim ol bikpela tok bilong bekim ol askim i stap daunbilo. Stori long ol bikpela tok tasol. Taim yumi kirapim stadi nupela, ating yumi mas redi long senisim sampela samting bilong helpim sumatin. Tingim wanpela gutpela rot bilong mekim beten i kamap wanpela bikpela samting insait long stadi, na olsem wanem yu ken helpim sumatin long sampela tok bilong Baibel bambai em i ken redi long sanap strong taim ol narapela i birua long em. Mekim stadi i kamap gutpela bambai sumatin i ken amamas long en.

¹⁴ Tru, i no olgeta Baibel-stadi bai kamap strong hariap. Sampela i no gat bikpela laik tumas long ol samting bilong spirit olsem ol narapela o ol i no kisim kwik ol samting ol i lainim. Sampela i gat planti wok na ol i no gat taim bilong pinisim wanpela sapta olgeta long wan wan wik. Olsem na long sampela man, ating i gutpela long stadi tupela o tripela taim samting bilong pinisim wanpela sapta na sampela mun moa bilong pinisim buk. Ating long sampela man yumi ken stadi pastaim long buklet Yumi Mas Mekim Wanem? na bihain stadi long buk Save. Taim ol i mekim olsem, na tu, taim ol i kam long ol miting bilong kongrigesen, dispela bai helpim olgeta wan wan sumatin long strongim bilip bilong ol long tok i tru.

¹⁵ Tasol bikpela samting em yumi mas beten bambai yumi ken kisim wanpela Baibel-stadi! (1 Jo 3:​22) Wanpela bikpela blesing tru wanpela Kristen inap kisim em olsem: Jehova i mekim wok long em bilong helpim wanpela man long kamap wanpela disaipel bilong Krais Jisas. (Ap 20:35; 1 Ko 3:​6-9; 1 Te 2:⁠8) Nau em taim bilong givim bel long mekim wok Baibel-stadi, na bilip strong olsem Jehova bai blesim wok bilong yumi long kirapim planti Baibel-stadi moa!

[Rait long pes 3]

Yu beten bilong kirapim wanpela nupela Baibel-stadi?