Pasin Bilong Mekim Gobek i Kamapim Ol Baibel-Stadi
1 Jisas i tokim ol disaipel bilong em long autim tok, na long “mekim olgeta lain manmeri i kamap disaipel . . . lainim ol.” (Mt. 28:19, 20) Man bilong autim tok em i save autim tok, tasol tisa i save mekim bikpela wok moa. Em i save skulim man, stori gut, na kamapim as bilong ol samting. Wanpela rot bilong yumi long skulim ol narapela em yumi mekim gobek long ol man i laik harim tok na putim mak long kirapim Baibel-stadi wantaim ol.
2 Yu mas mekim gobek long wanem ol lain? Mekim gobek long olgeta man i kisim ol nius o ol i laik harim gutnius, maski ol i kamapim olsem ol i gat liklik laik tasol long harim tok. Sapos yu autim tok long rot samting na yu bungim man i amamas long harim tok, traim long painimaut long wanem hap stret em i stap long en o kisim telefon namba yu ken ring long en, na bai yu inap strongim laik bilong em long harim tok. Tingting olsem yu bai kirapim Baibel-stadi. Wok yet long painim ol man em ol bai amamas long stadi long Baibel, na bai yu inap painim ol.—Mt. 10:11.
3 Tingim Gut Man: Pasin bilong redi long mekim gut gobek i mas kirap long namba wan taim yu bungim man. Ol man i mekim gut wok autim tok, ol i save tingim gut ol samting em man bilong haus i amamas long en, na ol i save toktok long dispela samting bilong ol i ken toktok moa wantaim man. Sampela ol i ting i gutpela long kamapim wanpela askim taim ol i laik lusim man na dispela bai kirapim laik bilong man long ol i go bek lukim em. Pasin bilong yumi long tingim gut ol man i mekim na yumi tingting yet long ol bihain long yumi lusim ol na i go, na dispela i save kirapim yumi long mekim kwik gobek. Sapos inap, traim long go bek lukim man taim laik bilong em long harim tok i strong yet—ating bihain long wanpela o tupela de samting.
4 Taim yu mekim gobek, kirapim tok long ol samting yu bin toktok wantaim em long pastaim, na skruim sampela tok moa antap long dispela. Putim mak olsem yu laik kamapim wanpela skripsa bilong strongim man long olgeta taim yu mekim gobek, na yu mas redi long putim yau. Save gut long man bilong haus. Bihain, taim yu wok long go bek lukim em, kamapim ol tok i tru bilong Baibel i stret long ol samting em i laik save long en.
5 Tingting Oltaim Long Kirapim Baibel-Stadi: Taim yu mekim ol gobek, tingting long kirapim Baibel-stadi. Yu inap mekim dispela olsem wanem? Tokim man olsem yu laik stori wantaim em long wanpela gutpela tok, na opim buk Save o buklet Yumi Mas Mekim Wanem? i go long wanpela paragraf em yu ting bai kirapim tingting bilong man. Ritim paragraf, skelim askim, na stori long wanpela o tupela skripsa i stap long paragraf. Yu inap mekim dispela insait long 5-pela o 10-pela minit taim yu sanap long dua bilong haus na toktok wantaim man. Bilong pinisim tok, kamapim narapela askim na pasim tok long stori long dispela samting taim yu go bek gen lukim man.
6 Taim yumi bungim ol man i gat laik long harim tok, yumi mas strongim dispela laik bilong ol, dispela i bikpela samting long wok autim tok bilong yumi. Olsem na makim taim long mekim ol gobek long olgeta wik. Taim yu mekim olsem, dispela bai mekim wok autim tok bilong yu i kamap gutpela moa na bai yu kisim bikpela amamas.
[Askim Bilong Stadi]
1. I gat wanem as na wok bilong mekim ol gobek em i bikpela samting tru?
2. Yumi mas mekim gobek long wanem ol lain?
3, 4. Yumi mas mekim wanem ol samting na bai yumi inap mekim gut ol gobek?
5. Yumi inap bihainim wanem pasin i no hatwok long mekim bilong kirapim Baibel-stadi?
6. Yumi ken mekim wanem bilong soim olsem yumi save pasin bilong mekim ol gobek em i bikpela samting?