Mekim Ol Gobek—Yumi Gat Wok Long Mekim
1 I gat sampela samting i mas kirapim yumi long mekim ol gobek. Olsem: Yumi laik mekim gut wok God i bin givim long yumi, olsem Pol i bin mekim. (Ap 20:21, 24) Sapos yumi go bek lukim olgeta man i harim tok, bai yumi mekim tru wok bilong autim tok na bai bel bilong yumi i no gat tok.—2 Ti 4:5.
2 Yumi Gat Save, Olsem na Yumi Gat Wok: Bagarap i laik painim ol man na dispela i mas kirapim yumi long wok strong long mekim ol gobek. (Jo 17:3) Yumi save pinis Jehova bai givim strafe long ol man nogut na yumi save Armagedon i kam klostu pinis, na dispela save i mas kirapim yumi long toksave long ol man nogut, na long helpim ol man “i bel nogut na i wari long olgeta dispela pasin nogut ol wantok i save mekim.” (Ese 9:4) Yumi mas helpim ol long kam insait long lain bilong Jehova.
3 I mas i gat man bilong helpim narapela bambai ol inap kisim stretpela save long tok i tru. (Ap 8:30, 31; 18:26) Dispela tu i mas kirapim yumi long mekim wok bilong yumi long go bek na putim “wara” long ol “pikinini kaikai,” olsem tok i tru, yumi bin planim long bel bilong ol man. Sapos i no gat man i bin kam bek lukim yumi planti taim na helpim yumi long kisim stretpela save long Jehova na long ol gutpela samting Em i laik mekim, yu ting yumi inap bilip na kamap strong long spirit? Nogat, a?—Mt 7:12.
4 Mekim Pasin Sori na Wok Strong: Pasin bilong mekim ol gobek i kamapim long ples klia olsem yumi sori long ol man. Wanpela brata i aipas em i mekim wok painia oltaim na em i tok: “Kirap long taim mi baptais pinis, mi gat bikpela laik long tokim ol narapela long ol tok bilong Baibel mi lainim pinis. Tru mi aipas, tasol mi amamas dispela i no bin pasim mi long mekim dispela wok. . . . Mi lain tu long tingim gut olgeta wan wan haus i stap we long rot na bai mi inap go bek lukim ol man i gat laik long stadi long Baibel.” Tru, dispela brata i aipas, tasol i olsem long bel em inap lukluk; em i sori long ol man, olsem na em i wok strong long go bek lukim ol man i laik harim tok.
5 Taim yumi mekim ol gobek, planti taim yumi inap mekim gutpela wok long Baibel na kamapim as bilong ol gutpela samting yumi wetim i stap. (1 Pi 3:15) Dispela i helpim man bilong haus na kirapim yumi yet long wok strong na pilim tru ol tok i tru. Taim yumi mekim ol gobek yumi kisim bikpela amamas yumi no inap kisim long narapela rot. Na sapos yumi wok strong long mekim ol gobek, orait oltaim dispela amamas bai kamap strong long bel bilong yumi.—Snd 10:22.
6 Yumi mas tingim gut wok bilong yumi long mekim ol gobek. Ol wok ol Witnes i mekim long yia bilong wok bilong 1991, i kamapim klia olsem lain bilong Jehova i wok strong long helpim ol man. (Snd 3:27) Ol i mekim 344,926,952 gobek na 3,947,261 Baibel-stadi. Inap 300,945 nupela disaipel ol i dediket long Jehova na kisim baptais. Yumi amamas long mekim wok bilong yumi long mekim ol gobek, na long dispela rot lain bilong Jehova i go bikpela olsem.—1 Te 2:8.
7 Wanem samting i helpim planti man long kam insait long lain bilong Jehova long yia bilong wok bilong 1991?
[Ol Askim]
1. Kolim tupela samting i kirapim yumi long mekim ol gobek.
2. (a) Kaunim Jon 17:3. Dispela tok i mas kirapim yumi long mekim wanem bilong helpim yumi yet na ol narapela man? (b) Yumi ken mekim wanem bilong helpim ol man em Esekiel 9:4 i stori long ol?
3. (a) Man bilong Itiopia i sot long wanem samting bilong helpim em? (b) Prisila tupela Akwila i mekim wanem gutpela pasin na yumi ken bihainim?
4. Dispela brata i aipas, tasol olsem wanem long bel i olsem em inap lukluk?
5. Wanem ol gutpela samting i save kamap taim yumi wok strong long mekim ol gobek?