Helpim Ol Man “Bel Bilong Ol i Gutpela Tru”
1 Olgeta man wan wan i gat wanpela pasin i pas strong long bel bilong ol. (Mt. 12:35) Baibel i toktok long man em “long bel em i save stap birua.” (Sng. 55:21) Na sampela ol i “man bilong belhat kwik.” (Snd. 29:22) Tasol i gat sampela em “bel bilong ol i gutpela tru.” (Ap. 13:48) Nau long taim bilong yumi, Jehova i wok long bungim ol kain man olsem em bel bilong ol i gutpela. (Hag. 2:7) Olsem wanem yumi inap helpim ol long kamap lain bilong lotuim Jehova?
2 Mekim Gut Ol Gobek: Em i bikpela samting long yumi mas i gat stretpela tingting long mekim ol gobek na bai yumi ken inapim wok bilong yumi long kamapim ol disaipel. (Mt. 28:19, 20) Olsem wanem? Yumi save go bek kwik na lukim ol man i gat laik long harim tok? Yumi save go bek na lukim ol man i bin kisim ol buk na nius o ol man i amamas long harim gutnius? Yumi save wok strong long helpim ol long kamap strong long ol samting bilong spirit? Laip bilong ol man inap lus, olsem na yumi mas painim ol rot bilong kirapim laik bilong olgeta man i gat laik long harim tok.
3 Taim yu tingim yet toktok yu bin mekim wantaim man i laik harim tok, raitim nem na atres bilong em, samting yupela i bin toktok long en, ol skripsa yu bin ritim, na wanem buk na nius yu bin tilim. Yu mas wok strong long i go bek hariap na lukim em.
4 Pasin Bilong Mekim Gobek: Taim yu mekim gobek, i gutpela long mekim pasin pren na soim olsem yu tingim tru man bilong haus. Stori i mas sotpela, na kamapim ol tok bilong Baibel tasol. Redim wanpela tok bilong Baibel em man bilong haus bai amamas long harim, na taim yu laik lusim man, kamapim wanpela askim em yu inap bekim taim yu go bek lukim em. I gutpela yu abrusim pasin bilong tok pait nating wantaim man bilong haus long ol bilip em i kamapim na Baibel i no as bilong en. Wok strong long toktok long ol samting em yutupela i wanbel long en.—Kl. 4:6.
5 Bilong mekim ol gobek, yumi mas wok strong, tasol yumi bai amamas long ol gutpela samting yumi kisim. Wanpela painia long Japan i putim mak long mekim planti gobek long olgeta mun. Em i kirap raitim nem bilong olgeta man em i bungim taim em i autim tok long ol haus, na insait long 7-pela de em i go bek lukim ol. Em i redim gut ol tok em bai mekim na em i bilip tru long tok em i autim. Long wanpela gobek em i mekim, em i kirapim stadi wantaim wanpela man husat i bin tok: “Olgeta taim mi save sakim yupela. Nau em i namba wan taim mi putim yau.” Pasin bilong dispela painia long wok strong long mekim ol gobek i kamapim ol gutpela samting. Long pinis bilong namba wan mun em i mekim dispela wok, em i mekim tenpela Baibel-stadi.
6 Ol samting long sindaun bilong ol man i save senis senis. (1 Ko. 7:31) Yumi mas mekim gobek inap planti taim liklik na bai yumi inap painim man long haus. Taim yumi givim bel long mekim ol gobek, yumi inap helpim ol man bel bilong ol i gutpela long bihainim rot i go long laip oltaim.—Mt. 7:13, 14.
[Askim Bilong Stadi]
1. Long taim bilong yumi, Jehova i wok long bungim wanem lain?
2. Yumi mas mekim wanem bilong inapim wok bilong yumi long kamapim ol disaipel?
3. Yumi mas mekim wanem taim yumi toktok pinis wantaim wanpela man long wok autim tok?
4. Olsem wanem yumi inap mekim gut ol gobek?
5. Wanpela painia i bin wok strong long mekim wanem? Wanem ol gutpela samting i bin kamap?
6. Bilong wanem yumi mas wok strong long mekim ol gobek?