Redi Gut—Rot Bilong Mekim Gut Ol Gobek
1 Jisas i redim gut ol disaipel bilong em long mekim gut wok bilong autim “gutnius bilong kingdom bilong God.” (Mt. 4:23; 9:35) Jisas i skulim ol taim ol i autim tok long Palestain tasol. Tasol paslain long Jisas i go antap long heven, em i tokim ol disaipel olsem wok Kristen bilong autim tok bai go bikpela na bai ol i ken mekim ‘olgeta lain manmeri i kamap disaipel.’—Mt. 28:19, 20.
2 Bilong mekim dispela wok, ol i go bek lukim ol man i laik harim gutnius bilong Kingdom Bilong God na skulim ol long bihainim olgeta tok bilong Krais. Bilong mekim ol kain gutpela gobek olsem, yumi mas redi gut.
3 Redi Gut Pastaim: Sampela pablisa i traim long kamapim wanpela askim long namba wan taim ol i toktok wantaim man na i laik lusim em, na ol i promis long kam bek na bekim dispela askim. Ol i luksave olsem taim ol i go bek na kamapim ol tok bilong buk Baibel i Tok, dispela i helpim ol long kirapim Baibel stadi hariap.
4 Yumi gat wanpela Wastaua na Kirap! tasol bilong tilim long olgeta mun, tasol dispela i no makim olsem yumi mas wet i go inap long taim yumi kisim ol nupela nius bilong yumi ken go bek lukim man. Yumi inap kirapim laik bilong man long kisim sampela save moa na toktok wantaim em long wanpela stori i stap long nius em i kisim pinis.
5 Tingim Ol Tok Yu Laik Mekim: Paslain long yu go bek lukim man, lusim sampela minit bilong lukim notbuk bilong yu na tingim ol tok yu laik mekim. Olsem, yu ken toktok long wanpela samting i stap long nius yu bin tilim pinis long man. O tilim sampela nius moa i stori long samting yupela i bin toktok long en long pastaim. Sapos yu bin kamapim wanpela askim, gutpela sapos nau yu bekim dispela askim. Taim yu kamapim wanpela skripsa bilong strongim poin yupela i toktok long en, traim long ritim stret long Baibel dispela skripsa.
6 Mak Yumi Laik Winim: Mak yumi laik winim em yumi laik kirapim wanpela Baibel stadi. Wanpela brata i askim wanpela gobek sapos em i laik stadi long Baibel, tasol dispela man i tok nogat. Brata i kam bek wantaim ol nupela nius na i tok, “Tude mipela i raun long dispela hap na wok long bekim wanpela askim bilong Baibel ol man i gat.” Taim man i kamapim tingting bilong em, brata i ritim skripsa na wanpela paragraf i stret long samting ol i toktok long en long wanpela buk bilong mekim Baibel stadi long en. Dispela i kirapim man long stadi long Baibel.
7 Sapos yumi lusim hap taim bilong redi gut bilong mekim ol gobek, dispela bai kamapim gutpela samting. Amamas bilong yumi bai go bikpela, na ating yumi ken helpim wanpela man em ‘bel bilong em i gutpela’ long wokabaut long rot i go long laip.—Ap. 13:48.
[Askim Bilong Stadi]
1. Wok Kristen bilong autim tok ol i mekim long bipo i go bikpela olsem wanem?
2. Bilong bihainim tok bilong Jisas long ‘mekim ol manmeri i kamap disaipel,’ yumi mas mekim wanem?
3. Long namba wan taim yu bungim man, olsem wanem yu ken opim rot bilong mekim gobek?
4. Bilong wanem yumi no ken wet i go inap long taim yumi kisim ol nupela nius bilong mekim gobek?
5. Wanem gutpela samting bai kamap sapos yu tingim tok yu laik mekim?
6. Wanem mak yumi laik winim taim yumi mekim ol gobek?
7. Olsem wanem pasin bilong redi gut i bin helpim yu long kirapim wanpela Baibel stadi?