Ol Miting Bilong Wok Bilong Septemba
Wik i Kirap long Septemba 2
Singsing 115 (olpela 117)
(10 min) Ol toksave bilong kongrigesen.
(20 min) “Planim Pikinini Kaikai na Givim Wara long En—Em Rot Bilong Kamapim Ol Disaipel.” (Namba 1 Hap) Paslain long miting makim wanpela brata i save gut long kaunim tok na bai em i ken kaunim ol paragraf. Kaunim pinis paragraf, orait kamapim askim bilong en.
(15 min) Husat Inap Helpim Mi? Mi Lapun, Mi No Save Gut long Kaunim Buk, Tasol Mi Laik Save long God! Wanpela elda i ken lukautim dispela soim, na em i mas redim gut.
SOIM: Brata Tom i go bek lukim Alois, em i wanpela lapun i laik save moa long God.
Alois: Tom, mi laik toksave long yu. Taim mi manki mipela i no gat skul long ples bilong mipela. Mi stap long bus. Olsem na mi no save gut long kaunim buk, na ai bilong mi i nogut.
Tom: Sori tru Alois, tasol mi amamas olsem yu gat laik long kisim save moa long God na long tok bilong Baibel! Tasol i gat wanpela samting yu inap mekim!
Alois: Em wanem samting?
Tom: Yu ken lukim ol piksa na bai yu inap kisim save long God long dispela rot!
Alois: Tru ya! Mi save laik tru long lukim ol piksa!
Tom: Mi gat wanpela piksa hia mi laik bai yu lukim. (Tom i soim piksa long Alois, i stap long skin bilong buklet Stap Amamas. Tom i tokim Alois long lukim dispela piksa na em i givim sampela askim long Alois, olsem:) Yu lukim sampela man i kros? Yu lukim sampela man i sik? Yu lukim sampela man i lapun? (Alois i bekim.) Em i stret. Orait Alois, nau lukim gen dispela piksa na tokim mi, bilong wanem yu laikim? (Alois i lukim gut piksa na em i mekim liklik tok.)
Tom: Na i gat sampela hap tok i stap antap. Yumi traim long kaunim. (Tom i helpim Alois na Alois i kaunim gut.)
Tom: Orait Alois, yu lukim piksa pinis na yu bin kaunim gut ol dispela tok. Orait, nau yumi ken opim buklet long piksa namba 1. Lukim piksa na kaunim ol tok bilong en. (Tom i helpim Alois, na Alois i kaunim.)
Tom: Alois, yu save husat i wokim ol dispela samting yu lukim long piksa?
Alois: God Jehova.
Tom: Em i stret. Nau yumi ken lukim sampela tok long Baibel i stori long dispela samting. Yumi ken lukim Stat 1:1. (Tom i helpim Alois long kaunim skripsa.)
Tom: Alois, yu bin kaunim gut ol tok. Tasol ating em inap long nau.
Alois: Tenkyu tru long helpim mi. Mi laik bai yu kam bek gen long wik antap. Mi laik kisim sampela save moa long Jehova na Baibel.
Elda bilong lukautim soim: Long dispela soim yumi lukim Tom i mekim wok bilong ‘planim pikinini kaikai’ na wokim rot bilong i go bek lukim dispela man gen bilong givim ‘wara’ long em. Ol dispela samting em i mekim i makim olsem em i wanpela wanwok bilong Jehova i stap gut long em. I hatwok liklik long mekim Baibel-stadi wantaim kain man olsem. Tasol yumi ken save olsem, sapos Tom i wok yet long stadi Baibel wantaim Alois, Jehova bai mekim ‘kaikai i kamap’ na bihain ating Alois bai kamap wanpela strongpela witnes bilong Jehova.
Singsing 181 (olpela 37) na beten.
Wik i Kirap long Septemba 9
Singsing 86 (olpela 45)
(10 min) Ol toksave bilong kongrigesen.
(20 min) “Taim Yu Yangpela Yet Yu Mas Pilim Tru Gutpela Pasin Sori Jehova i Mekim long Yu.” Paslain long miting, makim sampela brata o sista ol i save kaunim gut tok na ol i ken redi long kaunim ol paragraf. Taim brata o sista i kaunim pinis paragraf, kamapim askim bilong en.
(15 min) “Mekim Gut long Ol Narapela Man na Singautim Ol i Kam long Haus Bilong Yu.” Wanpela brata i ken mekim dispela tok bilong strongim ol brata. Mekim sampela tok amamas long ol brata sista i save mekim gut long ol narapela man, na tokim kongrigesen long sampela samting moa ol i ken mekim bilong mekim gut long narapela man. Kamapim sampela ekspiriens bilong helpim ol brata sista long save long ol gutpela samting i kamap taim narapela i mekim gut long narapela, na olsem wanem dispela samting i helpim kongrigesen olgeta.
Singsing 35 (olpela 15) na beten.
Wik i Kirap long Septemba 16
Singsing 55 (olpela 18)
(10 min) Ol toksave bilong kongrigesen.
(20 min) “Planim Pikinini Kaikai na Givim Wara long En—Em Rot Bilong Kamapim Ol Disaipel.” (Namba 2 Hap) Paslain long miting makim sampela brata o sista i save gut long kaunim tok na bai ol i ken kaunim ol paragraf. Kaunim pinis paragraf, orait kamapim askim bilong en.
(15 min) No Ken Givim Rot long Satan Bilong ‘Tekewe Ol Gutpela Tok long Bel Bilong Ol Man.’ Dispela liklik soim i bilong helpim yumi olgeta long save olsem em i bikpela samting long yumi go bek lukim gen ol man yumi bin autim tok long ol long namba wan taim—yumi mas truim tok bilong yumi bilong go bek na givim ‘wara’ long ol.
Tupela pablisa, em Sista Bela na Sista Rut, i autim tok long ol haus. Ol i lukim Tok Bilong Dispela Mun na bai ol i ken redi gut long autim tok long man bilong haus.
Bela: Yes, nupela Tok Bilong Dispela Mun i makim Luk 21:10, 11 bilong mekim wok long en. Gutpela sapos yumi lukim. (Em i wok long painim na em i lukim wanpela pepa i stap insait long Baibel bilong em, em pepa bilong raitim nem na atres samting bilong ol man i bin harim tok.) Mi painim wanpela pepa ya! (Em i kaunim.) “Helen i laik save moa long ‘laspela taim.’ ”—Aiyo! Yumi bin tokim em bai yumi go bek lukim em long wik antap, tasol wanpela mun i lus pinis na yumi no i go!
Rut: Orait, yumi mas i go bek lukim em nau tasol! Haus bilong em i stap klostu. (Ol i wokabaut i go na paitim dua na Helen i opim dua.)
Bela: Moning tru Helen! Yu tingim mipela? Mi Bela na pren bilong mi ya em Rut. Mipela bin tok promis olsem bai mipela i kam bek lukim yu bilong bekim dispela askim bilong yu long ‘laspela taim.’
Helen: Em nau, mi tingim. Tasol long wik i go pinis, pris bilong mi i kam lukim mi na em i lukim dispela Wastaua mi bin kisim long yu, na em i kisim i go. Em i tokim mi, ol Witnes Bilong Jehova i profet giaman. Olsem na mi no laik toktok moa wantaim yupela. (Em i pasim dua strong.)
Bela: (Ol i lusim haus.) Rut, sapos yumi bin go bek long taim stret yumi bin makim, ating dispela samting i no inap kamap, a?
Rut: Tru ya! Tasol dispela i lainim mi olsem—kwiktaim yumi mas i go bek lukim ol man yumi bin autim tok long ol long namba wan taim na ol i gat laik long harim. Nogut yumi givim rot long Satan bilong tekewe ol gutpela tok long bel bilong ol!
Bela: Em i stret. Long wik i go pinis yumi bin tilim wanpela buklet long Janet—gutpela sapos nau yumi go bek lukim em, nogut Satan i mekim wok long wanpela wokboi bilong em na em i pasim tingting bilong Janet na bai em i no gat laik moa long harim tok i tru.
Brata bilong lukautim dispela soim i ken mekim liklik tok bilong kirapim ol brata sista long bihainim ol tok bilong dispela soim.
Singsing 34 (olpela 8) na beten.
Wik i Kirap long Septemba 23
Singsing 162 (olpela 89)
(10 min) Ol toksave bilong kongrigesen. Na mekim ol dispela toksave tu:
Dispela mun i laik pinis, olsem na gutpela sapos nau yu raitim ripot bilong yu bilong Septemba.
(18 min) “Planim Pikinini Kaikai na Givim Wara long En—Em Rot Bilong Kamapim Ol Disaipel.” (Namba 3 Hap) Paslain long miting makim sampela brata o sista i save gut long kaunim tok na bai ol i ken kaunim ol dispela paragraf. Kaunim pinis paragraf, orait kamapim askim bilong en.
(17 min) Olsem Wanem? Wanpela Liklik Nius Inap Helpim Mi long Kirapim Wanpela Baibel-Stadi? Wanpela elda i ken lukautim dispela soim.
Sampela pablisa ol i hatwok long kirapim wanpela Baibel-stadi. Na sampela i kirapim Baibel-stadi, tasol liklik taim na dispela Baibel-stadi i pinis. Orait, olsem wanem yumi ken mekim wok long wanpela liklik nius bilong kirapim Baibel-stadi? Sapos ol i mekim Baibel-stadi inap sampela wik tasol na bihain dispela stadi i pinis, ating em asua bilong husat—man bilong haus o dispela pablisa? Sampela taim ol nupela stadi ol i no stap long haus long taim yumi makim bilong stadi Baibel wantaim ol, olsem na wanpela wik i lus na ol i no stadi. Nogut yumi kisim tingting kranki olsem ol i no gat laik moa long stadi na yumi no go bek lukim ol gen.
Elda: Em nau, wanpela pablisa (brata o sista) i kam. Em i no gat Baibel-stadi. Nau yumi ken harim sampela tingting bilong em.
Pablisa: (Em i toktok long em yet.) Inap longtaim pinis mi bin i stap insait long tok i tru, tasol mi no gat Baibel-stadi. Long Matyu 28:19, 20 Jisas i tokim yumi long mekim wok bilong kamapim ol disaipel. Olsem wanem mi inap redim ol samting na bai mi inap kirapim wanpela Baibel-stadi?
Elda: Nau yumi ken lukim ol samting em i mekim na bai em i redi long mekim wok long liklik nius bilong kirapim Baibel-stadi.
Pablisa: (Em i toktok long em yet.) Long wik i go pinis, mi givim liklik nius Gutpela Sindaun long Nupela Taim long wanpela man. Mi pilim olsem em i gat bikpela laik long harim tok, tasol em i gat planti wok, olsem na em i no gat taim bilong harim tok. Mi tokim em bai mi kam bek. Ating em bai amamas long harim wanem tok? (Pablisa i lukim ol tok i stap insait long liklik nius.) Ating dispela tok hia long pes 3, paragraf 2 inap kirapim tingting bilong em, em i stori long bihain bai i no gat pait moa. Mi ken askim em olsem, em i ting bihain wanpela taim bai kamap na bai i no gat pait moa long graun? Liklik nius hia i kamapim tok bilong Buk Song 46:9. (Em i kaunim.) Ating em gutpela rot bilong mekim dispela gobek. Na tu, bai mi askim em long kisim Baibel bilong em na bai mitupela wantaim i ken kaunim dispela skripsa. Kaunim pinis, orait bai mi askim em olsem, sapos i no gat pait moa, bai yumi kisim wanem kain sindaun long dispela graun? Paragraf bihain long en long liklik nius hia i kamapim tok bilong Aisaia 35:1, 6, 7. (Em i kaunim.) Em i gutpela skripsa tu, na taim mi kamapim pinis dispela askim olsem sapos i no gat pait moa bai yumi kisim wanem kain sindaun, orait bai mipela i ken kaunim dispela skripsa tu wantaim.
Elda: Yu lukim pablisa hia i redim gut, a? Ol dispela tok em i redim pinis bilong toktok wantaim dispela man long en, em inap long skel bilong dispela man, long wanem em i namba wan taim pablisa i go bek lukim em. Orait, bai pablisa i mekim wanem bilong opim rot bilong i go bek lukim dispela man long namba 2 taim? Yumi harim sampela tingting moa bilong em.
Pablisa: (Em i toktok long em yet.) Mi ken askim em olsem, em i laik i stap long graun taim ol dispela gutpela samting i kamap? Na bihain mi ken tokim em, mi laik kam bek long wik antap bilong toktok gen wantaim em long sampela tok moa bilong Baibel i stori long dispela nupela taim.
Elda: Pablisa hia i gat bikpela laik long kisim wanpela Baibel-stadi, a? Ating em i bin beten askim God long helpim em long dispela samting. Na em i no beten tasol—em i mekim narapela samting tu—em i redim dispela gobek bilong wokim rot bilong kirapim wanpela Baibel-stadi. Long narapela soim bihain bai yumi lukim ol samting i kamap.
Singsing 156 (olpela 49) na beten.