Spesel De Bilong Tokim Ol Man Olsem Yu Laik Stadi Wantaim Ol Long Baibel
1 Kirap long Janueri, olgeta kongrigesen bai makim wanpela wiken long olgeta wan wan mun—ating namba wan wik bilong mun—long tokim ol man long taim ol i autim tok olsem ol i laik stadi wantaim ol long Baibel. Kongrigesen i ken skelim na makim wanpela de olsem Sarere o Sande bilong mekim olsem. Long dispela de sapos man bilong haus i no gat laik long stadi long Baibel, orait pablisa i ken tilim buk Baibel i Tok o ol nupela nius long em. Olgeta elda na ol kongrigesen sevan i mas stretim rot bilong ol i ken insait tru long dispela wok na helpim ol pablisa long kirapim ol Baibel stadi.
2 Kongrigesen Sevis Komiti bai skelim na makim wanpela de long wanpela wiken bilong yumi ken tokim ol man olsem yumi stadi wantaim ol long Baibel. Ol i mas mekim toksave na bai ol pablisa i ken redi gut na wok strong moa bilong mekim ol Baibel stadi taim ol i autim tok long ol haus na long taim ol i go bek lukim ol man i gat laik long harim tok.
3 Pasin Bilong Redim Tok: Yumi ken lukim ol tok i stap long namel pepa bilong Wok Kingdom bilong Februeri 2006, na long buk Toktok Gut long pes 10, bilong helpim yumi long kirapim ol Baibel stadi. Ating sampela bai i laik yusim liklik nius olsem, Yu Laik Save Long Tok i Tru? bilong kirapim stadi. Na tu, long Wok Kingdom bilong Ogas 2007, pes 3, em i stori long pasin bilong kirapim Baibel stadi taim yumi go bek lukim man i bin kisim ol nius. Ol bai makim ol elda na ol kongrigesen sevan long lukautim bung bilong wok autim tok inap 10 i go 15 minit, na long dispela bung ol i ken stori long wanpela o tupela rot bilong kirapim ol Baibel stadi o ol i ken mekim soim long en.
4 Tru, i no olgeta bai i gat laik long stadi o stadi inap longpela taim. Tasol dispela i no ken stopim yumi long askim ol man long stadi wantaim ol, long wanem, Jehova yet i save kirapim ol man i gat gutpela bel long i kam long em. (Jo. 6:44) Wok bilong yumi em long planim pikinini kaikai bilong tok i tru, tasol moa yet, yumi mas lukautim gut na givim wara long en na bai tok i tru i ken i go daun long bel bilong man, na wok bilong stadi long Baibel wantaim ol man i gat gutpela bel i insait long en. Taim yumi mekim olsem, yumi mekim tru dispela gutpela wok olsem ol wanwok bilong God.—1 Ko. 3:9.