Redi Oltaim Long Tokim Man Long Baibel Stadi
1. Bilong inapim wok Jisas i givim long yumi long Matyu 28:19, 20, yumi mas mekim wanem?
1 Jisas i givim wok long yumi long go ‘mekim olgeta lain manmeri i kamap disaipel na lainim ol.’ (Matyu 28:19, 20) Olsem na yumi laik redi oltaim long tokim man yumi laik stadi wantaim em long Baibel, na yumi no mekim tasol long wiken em kongrigesen i bin makim bilong dispela wok, nogat. Ol dispela tok hia inap helpim yumi.
2. Yumi ken tokim husat olsem yumi laik mekim Baibel stadi wantaim ol?
2 Toksave Long Baibel Stadi Kos: Sapos oltaim yumi tokim ol man long Baibel stadi kos, rot bai op long yumi inap kisim wanpela Baibel stadi. (Sav. 11:6) Olsem wanem? Yu bin tokaut stret long man olsem yu laik mekim Baibel stadi wantaim em? Wanpela kongrigesen long Amerika ol i bin taitim bun tru long mekim olsem inap wanpela mun olgeta. Na ol i bin kisim amamas tru, long wanem, ol i bin kirapim 42 nupela Baibel stadi! No ken ting olsem ol man i harim tok bilong yu ol i save pinis olsem yu save mekim Baibel stadi long man. Taim yu go bek, yu ting yu inap tokim em olsem yu laik mekim Baibel stadi wantaim em? Sapos em i no laikim Baibel stadi, no gat rong long dispela. Tasol wok yet long kirapim em long laikim tok bilong Baibel. Olsem wanem? Yu bin askim ol neiba, wanblut, wanwok, na wanskul sapos ol i laik yu ken mekim Baibel stadi wantaim ol? Yu ken askim tu ol Baibel sumatin bilong yu sapos i gat sampela pren na wanblut bilong ol em ol i laik stadi long Baibel.
3. Yumi gat wanem tul bilong helpim yumi long kirapim ol Baibel stadi? Ating yumi ken yusim long wanem ol taim?
3 Wanpela Gutpela Tul: Wanpela tul bilong kirapim Baibel stadi em nius Yu Laik Save Long Tok i Tru? Yu ken givim long ol man bilong haus maski ol i kisim buk samting o nogat. Ating yu ken mekim wok long en long ol bisnis teritori, long ol rot, taim yu raitim pas, na taim yu mekim ol gobek. Na tu, yupela i ken lusim long ol haus i no gat man. Kisim i go wantaim yu taim yu raun long PMV, go long ol stua, na taim yu go long wok. Long baksait long nius i gat sotpela stori long pasin bilong mekim Baibel stadi na i soim buk Baibel i Tok.
4. Olsem wanem yumi ken yusim nius Save Long Tok i Tru bilong kirapim stadi?
4 Taim yu givim pinis nius long man, yu ken soim em ol askim i stap long fran bilong nius na askim em, “Wanem askim yu gat laik tru long save long bekim bilong en?” Nau yutupela i ken skelim wantaim bekim long nius, na ritim o stori gen long hap long baksait we i stori long pasin bilong yumi long mekim Baibel stadi. Tokim em tu olsem sampela stori moa bilong dispela askim i stap long buk Baibel i Tok, tilim buk long em, na stretim rot long go bek na stori moa.
5. Bilong wanem yumi mas redi oltaim long tokim ol man yumi laik mekim Baibel stadi wantaim ol?
5 Long ol teritori bilong yumi, i gat sampela man i stap yet em ol i laik save long ol tok tru bilong Baibel. Taim yumi redi oltaim long tokim ol man long Baibel stadi, rot bai op long yumi kisim planti amamas moa long helpim ol man long wokabaut long rot bilong laip.—Mt. 7: 13, 14.