Tingting Strong Long Kamapim Disaipel
1. Yumi mas mekim wanem bilong helpim ol manmeri long kisim laip?
1 Sevis ripot bilong 2014 i soim pasin bilong lain bilong God long givim bel tru na wok strong long autim gutnius bilong Kingdom. (Mat. 24:14) Long rot bilong wok autim tok long ol haus, wok bilong tilim ol liklik nius na invatesen pepa, na autim tok long ol pablik ples, yumi inap autim tok bilong Baibel long planti manmeri moa winim bipo. Tasol bilong helpim ol dispela man long kisim laip, yumi mas stadi wantaim ol long Baibel na helpim ol long kamap disaipel bilong Jisas.—1 Tim. 2:4.
2. Wanem ol askim bai helpim yumi long tingting oltaim long kirapim Baibel stadi?
2 Tingting Oltaim Long Kirapim Baibel Stadi: Taim man i laik harim tok, yu save askim em long fon namba bilong em na go bek hariap na lukim em, na wok strong long putim mak long kirapim Baibel stadi? Wanem laspela taim yu bin soim pasin bilong mekim Baibel stadi taim yu autim tok long man long namba 1 taim? Wanem laspela taim yu bin tokim man yu save go lusim ol nupela magasin long em olsem yu laik stadi wantaim em long Baibel? Olsem wanem? Yu bin soim vidio Wai na i Gutpela Long Stadi Long Baibel? na Mipela i Save Mekim Wanem Long Taim Bilong Baibel Stadi? long ol wanwok, wanskul, ol neiba, ol wanblut, na ol narapela? Taim yu yusim tebol bilong putim ol litresa, yu wok strong long tokim ol man i kisim ol buk bilong stadi olsem yumi save mekim Baibel stadi wantaim ol man, no gat pe?
3. Bilong autim gut tru tok i tru, yumi mas mekim wanem?
3 Helpim Yumi Kisim Long Jehova na Jisas: Taim Jisas i tokim yumi long wok bilong “kamapim ol disaipel” em i yusim dispela tok “go,” dispela i makim olsem yumi mas wok strong na go pas long toktok wantaim man. Tasol em i no larim yumi yet i mekim dispela wok, nogat, em i tok promis long stap wantaim yumi. (Mat. 28:19, 20) Na tu, Jehova i givim holi spirit long yumi, ol buk na nius, na ol skul yumi mas kisim bambai yumi inap skulim ol manmeri long tok i tru. (Sek. 4:6; 2 Kor. 4:7) Yumi ken beten long Jehova long ‘kirapim laik bilong yumi’ na givim yumi ‘strong’ long mekim dispela bikpela wok.—Fili. 2:13.
4. Bilong wanem yumi mas tingting strong oltaim long kamapim disaipel?
4 Wok bilong autim gutnius i save givim bikpela amamas long yumi. Tasol, amamas bilong yumi i go bikpela moa taim yumi skulim man long tok i tru na helpim em long bihainim yumi long wokabaut long ‘rot i go long laip.’ (Mat. 7:14; 1 Tes. 2:19, 20) Bikpela samting moa, taim yumi tingting oltaim long kamapim disaipel, yumi amamasim Jehova em man “i no laik bai wanpela i kisim bagarap. Em i laik bai olgeta i tanim bel.”—2 Pita 3:9.