Strongim Olgeta Long Kirapim Baibel Stadi Long Namba 1 Sarere
Long kirap bilong Me 2011, ol i strongim ol pablisa long kirapim Baibel stadi long namba 1 Sarere bilong olgeta wan wan mun. Bilong helpim yumi long mekim olsem, i gat hap stori i stap long laspela pes bilong Wastaua bilong pablik, we i gat het tok olsem “Bekim Ol Askim Bilong Baibel” em ol i bin redim pinis. Long bung bilong autim tok long namba 1 Sarere bai yumi stori long olsem wanem yumi ken yusim dispela hap bilong Wastaua long kirapim Baibel stadi, na tu, mekim wanpela soim.
Ol elda i ken makim olsem wan wan grup bilong autim tok i ken bung long narapela narapela hap long namba 1 Sarere, o olgeta grup i ken bung wantaim long Haus Kingdom. Tasol sapos 2-pela o 3-pela kongrigesen i yusim wanpela Haus Kingdom, ol i ken makim narapela narapela hap bilong mekim dispela bung, na ol i no ken mekim long narapela de.