Askim
◼ Taim brata i mekim beten bilong kirapim na pinisim miting, ol brata sista long kongrigesen i mas mekim wanem? Sindaun i stap? Kirap sanap? Pasim ai o olsem wanem?
1 Beten ol Kristen i mekim, em i wanpela samting bilong lotuim God Antap Tru, em Jehova. (Sng 65:2) Brata i mekim beten na ol manmeri i harim, ol i mas makim olsem ol i daun long Jehova na ol i save ol i sinman. God bai harim kain beten olsem bilong brata i bilip na em i mekim long nem bilong Krais Jisas.—Sng 66:19.
2 Brata i mekim beten, i stret na i gutpela sapos em i sanap long ai bilong kongrigesen, na dispela i kamapim klia olsem em i daun long Jehova. King Solomon i bin mekim olsem taim em i beten long ai bilong olgeta manmeri bilong Israel.—1 Kin 8:22.
3 Olsem wanem long ol manmeri i harim beten? Ating i gutpela sapos ol tu ol i sanap taim brata i mekim beten long miting bilong kongrigesen, long wanem, dispela pasin i stret na i makim olsem ol i laik daun long Jehova. (1 Kin 8:14) Nehemia 8:1-6 i stori long gutpela pasin ol Israel i mekim na yumi ken bihainim, olsem: Taim ol i lukim pris Esra i opim buk bilong lo bilong God, “olgeta manmeri i sanap.” Taim em i beten pinis, olgeta manmeri i tok, “I tru, i tru.” Tasol yumi mas save sampela ol i hatwok long kirap sanap, na yumi mas sori long ol, olsem ol brata sista i lapun, o skin i no strong, o ol i gat sik, o ol i holim bebi i gat sik o i slip. Sapos ol i sindaun i stap, i no gat rong long dispela, na nogut yumi tingting planti o i gat tok long ol.
4 Taim brata i laik beten, yu ting i stret long em i tokim kongrigesen long pasim ai? Baibel i no stori long sampela i bin mekim olsem. Nogat. I no gat lo i tok yumi mas pasim ai, tasol planti ol i save pasim ai, nogut ol i lukluk na samting i pulim ai bilong ol. Na taim brata i beten, planti ol i save daunim het, long wanem, ol i laik mekim pasin daun long Jehova. Na tu, planti papamama i tokim ol pikinini olsem taim brata i mekim beten, gutpela sapos ol i pasim ai, nogut tingting bilong ol i wokabaut. Tasol taim brata i beten, gutpela sapos sampela taim papamama i opim ai na lukim pikinini—em i mekim pasin olsem em i daun long Jehova o olsem wanem?
5 Planti singsing bilong Kingdom i olsem beten. Olsem na taim kongrigesen i laik mekim singsing, i gutpela sapos kongrigesen i kirap sanap, long wanem, dispela i stret na i makim olsem kongrigesen i daun long Jehova. Plis opim nupela buk singsing long baksait tru. Ol man i mekim singsing ol i sanap i stap. Sapos yumi sanap na mekim singsing, yumi inap pulim gut win na givim bel olgeta long litimapim nem bilong Jehova.
This article is unique to PNG.