Wok Strong Oltaim Long Mekim Wok Bilong Jehova
1 Yumi kisim gutpela wok—yumi inap mekim wok bilong God Jehova. Yumi kisim stretpela save long God na long Pikinini bilong em Jisas na yumi laikim tru tupela. Dispela i kirapim yumi long taitim bun long bihainim laik bilong God. (Jo 17:3) Tru, sampela taim skin bilong yumi i les, tasol Jehova i save strongim yumi na bai yumi stap strong.—Ais 40:29.
2 Sapos yumi laik kamapim bel bilong yumi olsem yumi pilim tru bikpela pasin sori God Jehova na Krais Jisas i bin mekim long yumi, orait, yumi ken mekim wanem? (2 Ko 5:14, 15) Namba wan samting, em yumi mas bihainim gutpela pasin bilong Jisas—em i no les liklik long autim tok bilong nem na Kingdom bilong Papa bilong em. (1 Pi 2:21) Sapos yumi gat strongpela bilip, orait, wok God i bin givim long yumi long autim tok bilong Kingdom bai stap olsem nambawan samting long yumi.—Mt 24:14.
3 Olsem wanem? Yumi mas lusim bikpela hap taim long autim tok o liklik hap taim tasol? Yumi olgeta i no wankain. Sampela i lapun, sampela i gat sik, sampela i gat wok long lukautim famili. Tasol yumi olgeta i mas givim bel olgeta long mekim wok bilong Jehova. Yumi olgeta wan wan i mas wok strong long mekim wok autim tok inap tru long skel bilong yumi, na long dispela rot bai yumi kamapim klia olsem yumi givim bel tru long Jehova na yumi truim dediket bilong yumi. (2 Ti 2:15) Tru, yumi olgeta i no wankain, tasol i gat sampela samting yumi olgeta wan wan inap mekim. Wanem ol samting?
4 Sampela Rot Bilong Mekim Bikpela Wok Moa Long Autim Tok: Namba wan samting em yumi mas i gat laik long mekim wok bilong yumi long autim tok i kamap gutpela moa. Bilong mekim olsem, yumi mas lain long mekim gut wok tisa. Bikpela wok bilong Skul Bilong Wok Autim Tok em bilong helpim yumi long mekim gut wok autim tok. Olsem wanem? Taim yumi redim wanpela tok bilong Skul, yumi save tingim wok bilong autim tok? Taim wasman bilong Skul i kamapim sampela tok bilong helpim yumi long mekim gut tok, yumi save bihainim dispela tok na bai yumi mekim gut wok autim tok? (sg-MP pes 19, 20) Na tu, Miting Bilong Wok i save kamapim planti gutpela tok yumi ken bihainim taim yumi autim tok. Gutpela sapos yumi kirap kwik long bihainim ol dispela tok.
5 Narapela samting em olsem: Yu ken skelim ol wok bilong yu—yu inap stretim na bai yu inap insait long wok painia haptaim o painia oltaim? Sapos yu mekim olsem, dispela bai helpim yu long wok strong oltaim long mekim wok bilong Papa bilong yumi, em Jehova. (1 Ko 15:58) Tasol olsem wanem sapos yu no inap mekim wok painia? Sapos yu lain long pasin bilong laikim tru wok autim tok na tingim gut ol man long teritori, orait, long dispela rot yu inap kisim pasin olsem wanpela painia. Na tu, sapos yu mekim ol gobek na Baibel-stadi, bai yu gat rot long helpim ol man i gat gutpela bel long kisim save long Jehova na long ol gutpela samting em i laik mekim.
6 Sapos yu bihainim singaut bilong i go i stap long wanpela hap i no gat planti Witnes long en, dispela tu inap helpim yu long kamap strong. (Ais 6:8) Sampela brata i bin lusim kongrigesen bilong ol na go i stap long narapela kongrigesen i sot long ol elda samting, o bilong helpim kongrigesen long autim tok long olgeta hap bilong teritori bilong ol. Ol dispela brata i bin kisim planti blesing.
7 Taim yumi kisim save long tok i tru long pastaim, pasin bilong laikim tru Jehova na Krais Jisas i bin kirapim yumi long stretim tru pasin bilong yumi. Tasol olsem wanem? Nau yumi wok long pilim moa yet pasin bilong i stap wanbel wantaim Papa bilong yumi long heven, na yumi pilim moa yet ol samting Pikinini bilong em i bin mekim bilong helpim yumi? Orait, i gat sampela samting moa yumi ken stretim bambai yumi inap mekim bikpela wok moa long autim tok? Gutpela sapos yumi wok strong oltaim long mekim wok bilong Jehova.—Ro 12:11.
[Ol Askim]
1. (a) Kaunim Jon 17:3. Dispela bai kirapim yumi long mekim wanem? (b) God i tok promis long mekim wanem, olsem Aisaia 40:29 i tok?
2. (a) Yumi ken mekim wanem bilong kamapim bel bilong yumi olsem yumi pilim tru bikpela pasin sori Jehova tupela Jisas i bin mekim long yumi? (b) Strongpela bilip bai kirapim yumi long mekim wanem?
3. (a) Olgeta wan wan Kristen i mas mekim wanem? (b) Kaunim 2 Timoti 2:15. Pol i kirapim yumi long mekim wanem?
4. Kolim tupela samting Sosaiti i bin kamapim bilong helpim yumi long mekim gut wok tisa. Bilong wanem i gutpela sapos yumi kirap kwik long bihainim ol gutpela tok yumi harim long ol dispela miting?
5. (a) Wanem samting bai helpim yu long wok strong oltaim long mekim wok bilong Jehova? (b) Sapos yu no inap mekim wok painia, orait yu ken mekim wanem?
6, 7. (a) Taim yumi kisim save long tok i tru, dispela i bin kirapim yumi long mekim wanem? (b) Maski yumi insait long lain bilong Jehova inap planti yia pinis, yumi mas givim wanem askim long yumi yet?