Stadi 10
Skul Inap Helpim Yu Long Mekim Gutpela Wok Long Autim Tok
1 Wok bilong Skul em bilong helpim yumi long mekim gutpela wok long autim tok.
2 Taim yu redim wanpela tok bilong Skul, mekim traim long wanpela famili o pren na ol i ken harim. Olsem bai yu inap skelim dispela tok, ol man inap kisim gut o nogat.
3 Tingim wok bilong autim tok. Taim yu harim sampela gutpela tok long Skul tingting long olsem wanem yu ken mekim wok long dispela tok taim yu autim tok. Sapos yu no save painim kwik ol tok bilong Baibel, taim wanpela brata i mekim tok long Skul, wok long opim Baibel bilong yu na painim ol tok em i kamapim. Yu ken katim bikpela tok bilong skripsa, na taim yu autim tok bai yu inap kamapim gut dispela tok.
4 Taim yu redim wanpela tok, tingim gut wok bilong autim tok na makim olsem yu mekim tru wanpela Baibel-stadi o wanpela gobek. Sampela taim ating yu ken makim olsem yu autim tok long ol haus, na man bilong haus i kros liklik long tok bilong yu, o em i no laik harim, na yu wok long stretim tok wantaim em.
5 Taim ol i makim yu olsem man bilong haus, kamapim ol askim olsem man tru bilong ausait i save mekim. Dispela bai helpim yu long bekim gut askim bilong ol man taim yu autim tok.
6 Taim wasman bilong Skul i kamapim sampela tok bilong Buk Bilong Skul bilong helpim sumatin long mekim gut tok, orait tingim gut dispela tok na olsem wanem em inap helpim yu long mekim gut wok autim tok. Sapos wasman i mekim sampela tok long kamapim gut as tok, orait taim yu autim tok, wok long kamapim gut as tok. Mekim olsem inap wanpela wik samting, na bihain wok long bihainim narapela tok wasman i bin givim long wanpela sumatin bilong helpim em long mekim gut tok.
7 Skelim tok bilong yu yet. Taim yu toktok pinis wantaim wanpela man na yu lusim pinis haus bilong em, skelim ol tok yu bin mekim. Yu ken askim skin bilong yu olsem: Mi mekim gut dispela tok o nogat? Sapos yu wok wantaim narapela pablisa, yu ken askim em long skelim tok bilong yu.
8 Bilong helpim yu long mekim gut ol tok, mekim traim long narapela pablisa. Larim pablisa i kamapim sampela askim, na nau yu ken wok long bekim tok long em. Taim yu mekim pinis ol tok, yutupela i ken toktok wantaim long pasin bilong mekim gut dispela tok, na bekim gut tok.—Hi 5:14.
9 Jehova i putim dispela Skul bilong helpim yumi. I olsem Jehova i lainim yumi.—Ais 50:4.