Jehova i Save Skulim Yu?
1 Profet Aisaia i tok olsem: “God, Bikpela i bin skulim mi long gutpela pasin bilong toktok, olsem na mi inap mekim gutpela tok bilong strongim bel bilong ol manmeri i no gat strong.” (Ais 50:4) Wanpela rot em Jehova i skulim yumi long en em Skul Bilong Wok Autim Tok. Tasol yumi olgeta wan wan i mas strong long mekim ol wok bambai dispela Skul i ken helpim yumi. Buk Bilong Skul long pes 11, i tok: “Sapos yumi redim ol tok bilong Skul, orait tok bilong Skul bai helpim gut yumi.” Yumi olgeta i mas bihainim dispela tok, maski yumi nupela long Skul o yumi bin insait long Skul inap planti yia, olsem taim dispela Skul i bin kirap long 1943 na i kam inap long nau.
2 Olgeta sumatin i mas redim gut ol tok. Tok i mas stret long minit bilong en. Ol lo bilong Sedyul Bilong Skul Bilong Wok Autim Tok i tok: “Olgeta sumatin i mas was gut bambai ol i no ken kalapim ol minit bilong tok.” Sapos olgeta taim brata bilong mekim Tok Namba 1 i pulim ol minit bilong tok, orait taim miting i pinis wasman bilong Skul i ken givim sampela tok long dispela brata yet. Wasman bilong Skul i mas kirapim miting long taim stret bilong en, na em i mas bihainim stret ol minit bilong em long givim sampela tok bilong helpim sumatin.
3 Hap bilong Skul, em Kamapim Ol Bikpela Tok Bilong Hap Bilong Baibel, em i ken helpim yumi olgeta wan wan. Brata i lukautim dispela hap em i no ken stori tasol long ol dispela tok. Em i mas helpim kongrigesen long save bilong wanem na olsem wanem ol dispela tok inap long helpim ol.
4 Long Tok Namba 3 sista i ken kirapim tok long kain kain rot, tasol dispela i no namba wan bikpela samting. Bikpela wok bilong Skul em bilong helpim yumi long autim gut ol tok na bai ol man inap kisim gut. Olsem na gutpela sapos sista i mekim dispela tok olsem em i autim tok long ol haus o long ol narapela taim na ples.
5 Bilong mekim Tok Namba 4, sampela taim sumatin i mas kisim tok long Sampela Tok Bilong Baibel, na sampela taim long buk Yangpela, tasol sapos ol i kisim long buk Yangpela, orait ol yangpela o ol nupela sumatin i ken mekim dispela tok. Sumatin i mekim Tok Namba 3 o Tok Namba 4 em i mas mekim wok long nem bilong tok olsem sedyul i makim.
6 Yumi mas was gut taim yumi laik mekim wok long sampela buk samting em sedyul i no kolim. Ating sedyul i makim wanpela o tupela paragraf tasol bilong yumi ken mekim wok long en. Tasol yumi ken mekim gutpela wok long ol dispela paragraf insait long ol minit bilong tok sapos yumi kaunim ol tok bilong Baibel na kamapim gut insait bilong en, na tu yumi ken mekim wok long ol tok piksa samting. Olsem na yumi no ken ting yumi mas mekim wok long ol narapela buk em sedyul i no makim, nogat. Yumi laik bai kongrigesen i ken lukim long buk ol dispela tok yumi mekim, olsem na yumi mas mekim wok long ol buk em sedyul tasol i makim.
7 Yumi lotu long God i gat olgeta gutpela tingting na save i pulap tru long em. (Ro 11:33) Maski yumi stap planti tausen yia, bai yumi wok long lain yet long ol dispela gutpela tingting na save bilong em. Bilong litimapim nem bilong Jehova moa yet, na save gut long rot bilong karim ol hevi, na stap bel gut na bel isi, yumi mas wok strong tru long kisim tingting na save bilong God. Yumi laik bai wok bilong Jehova long skulim yumi i ken helpim tru yumi, olsem na yumi mas strong long go long Skul Bilong Autim Tok long olgeta taim. Na yumi mas redim gut ol tok i save kamap long Skul, na yumi mas insait long Skul. Sapos yumi wok strong long mekim olsem long yia 1991, bai dispela Skul inap helpim gut yumi.